Fɔgiv Ɔda Pipul dɛn wit Ɔl Yu At

DI BAYBUL IN ADVAYS: ‘Una kɔntinyu fɔ de . . . fɔgiv unasɛf ɔltɛm, ivin if pɔsin dɔn du una bad. Una fɔ de fɔgiv unasɛf ɔltɛm, jɔs lɛk aw Jiova de fɔgiv una ɔltɛm.’​—Lɛta Fɔ Kɔlɔse 3:​13.

Wetin i min? Insay di Baybul, sin tan lɛk dɛt ɛn we yu fɔgiv ɔda pɔsin in sin i tan lɛk we yu tɛl am se i nɔ gɛt dɛt fɔ pe yu igen. (Lyuk 11:​4) Wan buk se insay di Skripchɔ dɛn, di Grik wɔd fɔ “fɔgiv” min “yu lɛf di dɛt we pɔsin fɔ pe yu ɛn yu nɔ aks am fɔ am igen.” So, we wi fɔgiv pɔsin we dɔn du wi bad, wi de fɔgɛt bɔt di bad tin we di pɔsin dɔn du wi. Di rɛdi we wi rɛdi fɔ fɔgiv ɔda pɔsin we dɔn du wi bad nɔ min se wi gladi fɔ di bad tin we di pɔsin du ɔ tray fɔ mek lɛk se nɔto bad tin di pɔsin dɔn du wi. Bɔt, wi kin jɔs disayd fɔ fɔgiv di pɔsin, pan ɔl we wi gɛt rayt fɔ vɛks pan di pɔsin we “du [wi] bad.”

Yu tink se dis advays go ɛp wi tide? Bikɔs wi nɔ pafɛkt, wi ɔl de sin. (Lɛta Fɔ Rom 3:​23) So i rili mek sɛns fɔ lɛ wi fɔgiv ɔda pipul dɛn, bikɔs i nɔ go tu te, wisɛf go want mek ɔda pipul dɛn fɔgiv wi. Apat frɔm dat, we wi disayd fɔ fɔgiv ɔda pipul dɛn, wisɛf go bɛnifit. Wetin mek wi se so?

We wi kip grɔj na wi at ɛn wi nɔ fɔgiv ɔda pipul dɛn, wi go ambɔg wisɛf. I kin mek wi nɔ gladi, i kin mek layf tranga fɔ wi, ɛn i kin mek wi fil bad bɔt wisɛf. Dis kin ambɔg wi wɛlbɔdi wan. Insay wan ripɔt na di Journal of the American College of Cardiology, dɔktɔ Yoichi Chida ɛn wan masta sabi bukman we nem Andru Stɛpto we de stɔdi bɔt aw mɔtalman de biev bin tɔk se: “Dɛn dɔn kam fɔ no se we pɔsin de vɛks kwik ɛn kip grɔj na in at, i kin mek i gɛt sik we go ambɔg in at.”

Lɛ wi tɔk bɔt di bɛnifit we wi go gɛt if wi de fɔgiv ɔda pipul dɛn. We wi fɔgiv ɔda pipul dɛn wit ɔl wi at, wi go mek wanwɔd ɛn pis de, ɛn dat go mek wi padi biznɛs wit ɔda pipul dɛn nɔ pwɛl. Di tin we impɔtant mɔ na dat, wi go sho se wi de falamakata Gɔd, we de fɔgiv di wan dɛn we dɔn sin ɛn i nɔ de mɛmba dɛn sin igen. Ɛn i want mek wisɛf du di sem tin.​—Mak 11:​25; Lɛta Fɔ Ɛfisɔs 4:​32; 5:​1.