Aw Jiova De Si Mi?
1. Aw di Baybul tan lɛk lukin-glas?
1 Ɔmɔs tɛm yu kin luk na lukin-glas? Bɔku pan wi kin du so ɛvride bikɔs dat go ɛp wi fɔ no us pat pan wi bɔdi wi nid fɔ mek fayn. Di Baybul tan lɛk lukin-glas. We wi rid am ɛvride, wi go ebul si wisɛf di we aw Jiova de si wi. (1 Sam. 16:7; Jems 1:22-24) Gɔd in Wɔd go ebul “sho wi ɔl wetin [de insay pɔsin in at].” (Ibru 4:12) We wi rid di Baybul ɛn tink gud wan bɔt wetin wi de rid, aw dat go ɛp wi fɔ ebul si tin dɛn we wi nid fɔ du mɔ pan, so dat wi go ebul fɔ prich fayn?—Sam 1:1-3.
2. Aw di Baybul go mek wi ebul fɔ chɛk wisɛf?
2 Yuz di Baybul as Lukin-Glas: Di stori dɛn we de na di Baybul bɔt fetful pipul dɛn we bin de sav Jiova, de tich wi bɔt di kwaliti dɛn we i lɛk. Fɔ ɛgzampul, Devid bin sho se i gɛt zil fɔ Gɔd in nem. (1 Sam. 17:45, 46) Ayzaya nɔ bin fred fɔ go prich to pipul dɛn we nɔ want fɔ yɛri bɔt Gɔd. (Ayz. 6:8, 9) Jizɔs bin so lɛk in Papa na ɛvin dat, i si in prichin wok as sɔntin we i go ɛnjɔy. I nɔ bin si am as tin we at fɔ du. (Jɔn 4:34) Di fɔstɛm Kristian dɛn bin de prich wit zil, dɛn bin abop pan Jiova, ɛn bin mekɔp dɛn maynd nɔ fɔ lɛf fɔ sav Gɔd. (Akt 5:41, 42; 2 Kɔr. 4:1; 2 Tim. 4:17) We wi tink gud wan bɔt dɛn ɛgzampul ya, i go ɛp wi fɔ luk wisɛf fɔ si tin dɛn we go mek wi du mɔ fɔ sav Jiova.
3. Wetin mek wi nɔ fɔ westɛm fɔ kɔrɛkt ɛni prɔblɛm we wi gɛt?
3 Tray fɔ Kɔrɛkt Ɛni Prɔblɛm: I nɔ go fayn if wi luk wisɛf na lukin-glas ɛn nɔ du natin fɔ kɔrɛkt ɛni prɔblɛm we wi si. Wi fɔ pre to Jiova fɔ ɛp wi fɔ chɛk wisɛf gud wan ɛn fɔ kɔrɛkt di prɔblɛm we wi gɛt. (Sam 139:23, 24; Lyuk 11:13) Bikɔs wetin wi de tɔk bɔt gɛt sɔntin fɔ du wit pipul dɛn layf ɛn plɛnti tɛm nɔ de igen, wi nɔ fɔ wɛstɛm fɔ kɔrɛkt ɛni prɔblɛm we wi gɛt.—1 Kɔr. 7:29; 1 Tim. 4:16.
4. Wetin go apin to pɔsin we tek tɛm luk insay Gɔd in Wɔd ɛn du wetin i de lan?
4 Udat sɔmbɔdi rili bi na in Jiova de si. Dat impɔtant pas wetin mɔtalman de si. (1 Pit. 3:3, 4) Wetin go apin to pɔsin we tek tɛm luk insay Gɔd in Wɔd ɛn du ɔl wetin i lan de? I go bi pɔsin we “nɔ jɛs de lisin am nɔmɔ ɛn fɔgɛt, bɔt i de du wetin i se, Gɔd go blɛs ɔl wetin da pɔsin de put in an pan.” (Jems 1:25) Wi go bi pipul dɛn we gladi ɛn we sabi prich fayn bikɔs “ɛnibɔdi we luk wi go si aw di Masta wɔndaful.”—2 Kɔr. 3:18.