Yu De Rɛdi fɔ di Mɛmorial?

Na bin Naysan 13 insay di ia 33. Jizɔs bin no se i gɛt wan las ivintɛm fɔ de wit in disaypul dɛn bifo i day. I go sɛlibret di las Pasova wit dɛn ɛn stat wan nyu sɛlibreshɔn we nem, di Ivintɛm It fɔ Mɛmba di Masta. Nid go mɔs de fɔ pripia fɔ dis impɔtant program. So i bin sɛn Pita ɛn Jɔn fɔ go rɛdi di ples ɛn ɔda tin dɛn fɔ di program. (Lyuk 22:7-13) Frɔm datɛnde, i impɔtant fɔ mek Kristian dɛn we want fɔ du di Mɛmorial fɔ rɛdi fɔ dis program. (Lyuk 22:19) Wetin na sɔm tin dɛn we wi fɔ du fɔ rɛdi fɔ di Mɛmorial we de kam Epril 3?

Wetin di Ɛlda dɛn fɔ Du fɔ Rɛdi:

Dɛn fɔ arenj fɔ yuz di Kiŋdɔm Ɔl ɔ ɛni ɔdasay we go fayn fɔ di program. Di say we dɛn fɔ yuz fɔ gɛt sidɔm ples we go du fɔ ɔlman, layt, ɛn di ples nɔ fɔ wam fɔ di pipul dɛn we go de na di ɔl. Dɛn fɔ arenj bak fɔ mek dɛn klin di ples fayn bifo di program bigin.
Pik pɔsin we rili sabi gi tɔk, pɔsin we go bi di chiaman, ɛn di brɔda dɛn we go pre pan di bred ɛn wayn.
If dɛn go gɛt pas wan Mɛmorial na di sem ples, di ɛlda dɛn fɔ arenj di tɛm we dɛn go stat di program. Dɛn fɔ arenj bak aw fɔ go insay di ɔl, aw fɔ kɔmɔt, ɛn usay fɔ pak.
Pik ɛn ɔganayz di atɛndant dɛn ɛn di wan dɛn we go pas di bred ɛn wayn.
Arenj fɔ gɛt di rayt bred ɛn wayn. Arenj bak fɔ gɛt plet dɛn, wayn glas, fayn tebul, ɛn fayn tebulklos.

Wetin di Pɔblisha dɛn fɔ Du fɔ Rɛdi?:

Dɛn fɔ arenj fɔ du mɔ na di prichin wok di tɛm we wi de invayt pipul dɛn fɔ kam di Mɛmorial.
Rayt ɔl di pipul dɛn nem we yu go want fɔ invayt. Pipul dɛn lɛk yu Baybul stɔdi dɛn, fambul dɛn, skulmet dɛn, wokmet dɛn, ɛn padi dɛn. Ɛn mek shɔ se yu invayt dɛn.
Rid ɛn tink gud wan bɔt di Mɛmorial Baybul ridin.
Rɛdi fɔ kam kwik na di Mɛmorial so dat yu go ebul fɔ wɛlkɔm di wan dɛn we go kam.