Yu De Rɛdi fɔ di Mɛmorial?

Jizɔs in las Pasova bin gɛt fɔ bi tin we rili impɔtant. Bikɔs i bin no se in tɛm fɔ day nɔ de fa igen, i bin arenj fɔ it di Pasova it wit in apɔsul dɛn ɛn introdyus di Ivintɛm It fɔ Mɛmba di Masta we dɛn fɔ de du ɛvri ia. So i bin sɛn Pita ɛn Jɔn fɔ go rɛdi di rum. (Lyu 22:​7-13; luk di pikchɔ na di frɔnt pej.) Dis de mɛmba wi se wi nid fɔ rɛdi fɔ di Mɛmorial we go bi Mach 27. Di Kɔngrigeshɔn dɛn go dɔn mek arenjmɛnt fɔ udat fɔ gi di tɔk, fɔ di bred ɛn di wayn, ɛn ɔda tin dɛn. Bɔt wetin wi ɔl go du fɔ rɛdi fɔ di Mɛmorial?

Pripia yu at. Rid ɛn tink gud wan bɔt di Mɛmorial Baybul ridin. Wi kin fɛn di shɛdul na di buk we nem, Stɔdi di Skripchɔ dɛn Ɛvride. Di shɛdul na Apɛndiks B12 insay di nyu, New World Translation of the Holy Scriptures gɛt mɔ infɔmeshɔn. (Luk bak na di Epril 2020 Layf ɛn Prichin Wok Mitin Buk.) Famili dɛn kin luk fɔ tin dɛn fɔ tɔk bɔt na dɛn famili wɔship bɔt wetin mek di ransɔm impɔtant we dɛn luk na di Watch Tower Publications Index ɔ di Buk we De Ɛp Jiova Witnɛs dɛn fɔ No bɔt Sɔntin.

Invayt ɔda pipul dɛn fɔ atɛnd. Du ɔl wetin yu ebul fɔ tek pat pan di kampen fɔ sheb sheb di inviteshɔn. Tink bɔt di wan dɛn we yu go invayt, lɛk yu ritɔn visit dɛn, di wan dɛn we yu bin de stɔdi di Baybul wit, yu padi dɛn ɛn fambul dɛn. Ɛlda dɛn nɔ fɔ fɔgɛt fɔ invayt di wan dɛn we inaktiv. Mɛmba se if yu invayt pɔsin we nɔ de na yu eria, yu kin fɛn di tɛm ɛn ples fɔ di Mɛmorial usay i de we yu klik na di say we se LAN BƆT WI we de ɔp na di jw.org om pej, dɔn pik “Mɛmorial.”

Wetin bak wi kin du fɔ pripia?