Invayt Pipul dɛn fɔ di Kɔnvɛnshɔn

1. Ustɛm wi go bigin fɔ invayt pipul dɛn fɔ di 2015 kɔnvɛnshɔn?

¹ If yu de plan fɔ mek spɛshal it fɔ yu padi ɔ fambul we yu go yuz bɔku tɛm ɛn mɔni fɔ mek, yu go gɛt zil fɔ invayt dɛn. Semweso, di brɔda dɛn dɔn du bɔku tin fɔ arenj fɔ di kɔnvɛnshɔn. Tri wiks bifo wi kɔnvɛnshɔn stat, wi go gɛt chans fɔ invayt pipul dɛn fɔ go di kɔnvɛnshɔn. Wetin go ɛp wi fɔ gi di inviteshɔn dɛn wit zil?

2. Wetin go mek wi rili want fɔ invayt pipul dɛn fɔ di kɔnvɛnshɔn?

² We wi tink gud wan bɔt aw wi go bɛnifit frɔm wetin wi go lan na di kɔnvɛnshɔn, dat go mek wi rili want fɔ invayt pipul dɛn. (Ayz. 65:13, 14) Wi fɔ mɛmba se wi spɛshal prichin fɔ invayt pipul dɛn ɛvri ia, kin mek plɛnti pipul dɛn go di kɔnvɛnshɔn. (Rid di bɔks we gɛt di taytul “Nɔto fɔ Natin.”) Sɔm pipul dɛn we wi go invayt gɛt fɔ kam di kɔnvɛnshɔn. I nɔ mata ɔmɔs pipul dɛn atɛnd di kɔnvɛnshɔn, wetin impɔtant na dat di zil we wi gɛt fɔ wi spɛshal prichin we wi de invayt pipul dɛn go briŋ prez to Jiova ɛn sho se in na gud Gɔd.—Sam 145:3, 7; Rɛv. 22:17.

3. Aw wi go sheb di inviteshɔn fɔ di kɔnvɛnshɔn?

³ Di ɛlda dɛn na di difrɛn kɔngrigeshɔn dɛn fɔ disayd aw pɔblisha dɛn fɔ sheb di inviteshɔn. Dɛn fɔ disayd if i go fayn fɔ mek pɔblisha dɛn lɛf di inviteshɔn na say usay pɔsin nɔ de na os, ɔ if dɛn fɔ yuz am we dɛn de du pɔblik prichin na di say usay dɛn kɔngrigeshɔn fɔ prich. If na wikɛnd una de prich, una kin gi di magazin dɛn wit di inviteshɔn if chans de. We di spɛshal prichin fɔ invayt pipul dɛn fɔ di kɔnvɛnshɔn dɔn, wi go gladi fɔ mɛmba se wi bin ɛp fɔ invayt bɔku pipul dɛn fɔ jɔyn wi fɔ go lan bɔku fayn fayn tin dɛn we Jiova dɔn arenj fɔ gi wi na di kɔnvɛnshɔn!

Nɔto fɔ Natin

Fɔ sɔm tɛm, we wan sista bin de sheb di inviteshɔn dɛn, i bin de wɔnda if i bin nid fɔ du ɔl wetin i bin de du jɔs fɔ gi pipul dɛn di inviteshɔn. I bin de aks insɛf se ‘Pipul dɛn go rili atɛnd di kɔnvɛnshɔn wit wi?’ Di Satide mɔnin fɔ di kɔnvɛnshɔn, i si wan man we de na wan rilijɔn we dɛn kɔl Sik. So i grit di man ɛn sho am in nem. I kam fɔ no se di man kam di kɔnvɛnshɔn bikɔs dɛn bin dɔn gi am di inviteshɔn. I bin aks sɔm kwɛstyɔn dɛn we di sista bin ansa. Di man tɔk se i ɛnjɔy di program ɛn i lɛk di we aw di pipul dɛn de drɛs ɛn aw dɛn de biev. Leta da sem de de, di sista bin bigin tɔk to wan man ɛn in wɛf we bin sidɔm nia am. Dɛnsɛf bin dɔn gɛt di inviteshɔn ɛn dɛn travul bay bɔs fɔ kam di kɔnvɛnshɔn. Dɛn bin de ɛnjɔy di program ɛn dɛn plan fɔ atɛnd Sɔnde. Na da tɛm de di sista no se i impɔtant we wi kin gɛt spɛshal prichin fɔ sheb di inviteshɔn dɛn.
Na wan kɔnvɛnshɔn we bin de dis biɛn tɛm, wan brɔda ɛn in wɛf we na rɛgyula payɔnia dɛn tɔk to wan man ɛn in wɛf we dɔn ol. Di man ɛn in wɛf we dɛn tɔk to tɛl dɛn se dis na bin di fɔs tɛm we dɛn atɛnd program lɛk dis. Di payɔnia dɛn aks di man ɛn in wɛf se: “Udat invayt una?” Dɛn ansa se: “We wi kam na os wande, wi mit di inviteshɔn ɔnda wi domɔt.” Dɛn rid am ɛn fil di fɔm we de biɛn de. Ɔda brɔda ɛn sista dɛn we kam di kɔnvɛnshɔn gi di man ɛn in wɛf tin fɔ it. Dɛn rili ɛnjɔy di program ɛn dɛn bin plan fɔ atɛnd di ɔda de. Dɛn bin arenj fɔ go fɛn dɛn bak ɛn fɔ ɛp dɛn fɔ no mɔ.