Tin Dɛn we Wi Fɔ Mɛmba fɔ Wi 2015 Kɔnvɛnshɔn

Tɛm we di Program De Bigin: Dɛn go opin di domɔt na di say usay di kɔnvɛnshɔn gɛt fɔ de 8 oklɔk na mɔnin. Di myuzik fɔ sho se di program de kam stat go bigin ple 9:​20 na mɔnin fɔ ɔl di tri dez. We wi yɛri di myuzik bigin ple, wi ɔl fɔ go sidɔm so dat di program go bigin fayn wan. Frayde ɛn Satide, di program go dɔn arawnd 5 oklɔk, ɛn Sɔnde, arawnd 4 oklɔk.

‘Siŋ fɔ Tɛl Jiova Tɛnki’: Gɔd in pipul dɛn we bin de trade bin de siŋ fɔ prez Jiova ɛn di wan dɛn we de wɔship am tide, de stil si myuzik as impɔtant tin we dɛn de wɔship am. (Sam 28:​7) Ɛnitɛm we di program fɔ stat na mɔnin ɛn aftanun, dɛn go ple kiŋdɔm siŋ dɛn. Dɛn siŋ ya nɔto jɔs ɛnikayn siŋ bɔt dɛn mek dɛn fɔ mek wi go lan bɔt Jiova ɛn wɔship am. So we di chiaman anawns se di myuzik de kam bigin ple, dat de sho se tɛm dɔn rich fɔ mek wi sidɔm ɛn lisin to di myuzik ɛn nɔ to tɛm fɔ de tɔk tɔk. We wi du dat, i sho se wi valyu di wok we di wan dɛn we de na di Wachtawa ɔkɛstra de du. Dɛn brɔda dɛn ya de yuz dɛn yon mɔni fɔ travul tu tɛm insay di ia fɔ go na Patasin, Nyu Yɔk fɔ go mek fayn fayn myuzik dɛn we wi kin ɛnjɔy. Afta wi dɔn lisin to di myuzik dɛn we dɛn mek, ɔlman fɔ jɔyn fɔ siŋ wi Kiŋdɔm siŋ dɛn fɔ prez Jiova.

Aw fɔ Pak Yu Motoka: Bɔku tɛm, tifman dɛn ɛn ɔda bad pipul dɛn kin luk fɔ pipul dɛn we nɔ de nia dɛn os fɔ tif dɛn prɔpati. Mek shɔ se yu motoka lɔk ɔltɛm ɛn nɔ lɛf ɛnitin we go mek pɔsin want fɔ tif insay de.

Fɔ Kip Sit fɔ Pɔsin: Ɛni mɔnin we dɛn opin di domɔt, duya nɔ rɔsh fɔ go sidɔm lɛk se yu ɛn di ɔda pipul dɛn de pan rɔnres. We wi de sho se wi nɔ bisin bɔt wisɛf nɔmɔ, dat de sho ɔda pipul dɛn se wi na tru Kristian dɛn ɛn dat go mek ɔda pipul dɛn prez Gɔd. (Jɔn 13:​34, 35; 1 Kɔr. 13:​5; 1 Pit. 2:​12) Na di wan dɛn we yu ɛn dɛn yuz di sem motoka, ɔ una de na di sem os, ɔ pɔsin we yu de stɔdi, yu fɔ kip sidɔm ples fɔ. Dɛn go arenj spɛshal sidɔm ples fɔ di wan dɛn we sik ɔ we dɔn ol. Bikɔs di sidɔm ples dɛn nɔ bɔku, na wan ɔ tu pɔsin we de ɛp di pɔsin we ol ɔ sik fɔ sidɔm wit am.

Tek Tɛm Drɛs: Wi fɔ tek tɛm drɛs fɔ go di kɔnvɛnshɔn. Di we aw wi fɔ drɛs nɔ fɔ fiba di bad we aw pipul dɛn de drɛs na di wɔl. (1 Tim. 2:​9) Dat go mek wi gladi fɔ wɛr wi kɔnvɛnshɔn baj ɛn nɔ shem fɔ prich we wi gɛt di chans. We wi drɛs ɛn biev fayn na wi kɔnvɛnshɔn, dat nɔ go jɔs mek pipul dɛn we want fɔ no mɔ bɔt di Baybul admaya wi, bɔt i go mek Jiova gladi.—Zɛf. 3:​17.

Tek Tɛm we Yu De Yuz Ilɛktronik Tin Dɛn: Wi go sho se wi de biev fayn we wi de yuz ilɛktronik tin dɛn bay we wi de ajɔst di sɛtin dɛn we de na wi fon ɔ ilɛktronik tin dɛn di kayn we we nɔ go ambɔg ɔda pipul dɛn. Pan ɔl we wi kin yuz kamɛra, vidio rɛkɔda, ɛn ɔda ilɛktronik tin dɛn, duya tek tɛm lɛ yu nɔ blɔk ɔda pipul dɛn ɔ ambɔg dɛn. Wi go sho bak se wi de biev fayn bay we wi nɔ tɛks ɔ sɛn imel we di program de ɔn.

Lɔnch: Duya, bifo yu kɔmɔt na di say usay di kɔnvɛnshɔn de fɔ go fɛn it lɔnch tɛm, i go fayn fɔ mek yu briŋ it we yu de kam. Yu kin yuz smɔl kulman we yu go ebul fɔ put ɔnda di say usay yu de sidɔm. Nɔ kam wit big big kulman ɛn glas tin dɛn na di say usay di kɔnvɛnshɔn de.

Kɔntribyushɔn: Wi go sho se wi gladi fɔ di difrɛn tin dɛn we dɛn dɔn du fɔ mek di kɔnvɛnshɔn kɔmɔt fayn, bay we wi de gi mɔni fɔ ɛp mek di prichin wok go bifo. If pɔsin want fɔ gi chɛk, i fɔ rayt de se na “Watch Tower” gɛt di mɔni.

Mɛrɛsin: If yu de tek mɛrɛsin we dɔctɔ bin dɔn mak fɔ yu, duya na fɔ mek shɔ se yu briŋ di wan we yu go nid bikɔs nɔn nɔ go de na di kɔnvɛnshɔn. If yu gɛt dayabitis, mek shɔ se yu nɔ trowe di nidul ɛn sirinj dɛn we yu de yuz insay di say dɛn fɔ trowe dɔti na di kɔnvɛnshɔn. Put am na di say we dɛn de trowe dɛn denja tin dɛn.

Advays: Duya na fɔ tek tɛm mek yu nɔ du ɛnitin we go mek yu ɔ ɔda pɔsin fɔdɔm. Ɛni ia bɔku pipul dɛn kin damej, mɔ di wan dɛn we kin wɛr ay-il sus. I go fayn mek yu wɛr di rayt sus we go mek yu waka fayn na ples we rɔndɔŋ, stɛp dɛn, ɛn pan dɛn ayɛn dɛn we gɛt smɔl smɔl spes dɛn midul we dɛn kin kɔba gɔta wit, ɛn ɛni ɔda say dɛn.

Sayn Langwej: Fɔ mek di dɛf pipul dɛn go bɛnifit, dɛn go translet di program insay ASL. I go fayn fɔ invayt yu fambul dɛn, padi dɛn, ɛn Baybul stɔdi dɛn we dɛf fɔ mek dɛn atɛnd ɔl di tri dez. Dɛn go ebul fɔ wach di drama pan DVD.

Duya Go to Dis Pɔsin (S-43) Fɔm: Wi kin yuz dis fɔm fɔ rayt ɔl wetin di pɔsin we wi go gi di fɔm nid fɔ no bɔt di pɔsin we wi prich to na di kɔnvɛnshɔn. We yu dɔn fil di fɔm, kɛr am go na di Buk dipatmɛnt ɔ gi di fɔm to di sɛktri na yu kɔngrigeshɔn.

Dipatmɛnt fɔ Ɛp fɔ Wok: If yu go want fɔ ɛp fɔ du ɛni wok na di kɔnvɛnshɔn, na fɔ go na di Dipatmɛnt fɔ Ɛp fɔ Wok. Pikin dɛn we nɔ rich 16 ia yet sɛf kin ɛp fɔ wok if dɛn mama ɔ papa gri fɔ de nia dɛn we dɛn de wok ɔ fɔ mek dɛn de nia ɛni ɔda big pɔsin we dɛn mama ɔ papa gri fɔ mek dɛn de wit.