Ɛp Blaynd Pipul dɛn fɔ Lan bɔt Jiova

1. Aw Jizɔs bin sho se i gɛt sɔri-at fɔ pipul dɛn we blaynd?

¹ Tɛm nɔ bin de fa igen fɔ mek Jizɔs day. We i bin de kɔmɔt na Jɛriko, tu blaynd man dɛn we de beg bin de ala se: “Sɔri fɔ wi, sa!” Pan ɔl we Jizɔs bin de tink bɔt di trɔbul we de bifo am, i bin tinap, kɔl di man dɛn, ɛn mɛn dɛn. (Mat. 20:29-34) Aw wi go falamakata di kayn sɔri-at we Jizɔs bin gɛt fɔ pipul dɛn we blaynd?

2. Aw wi go ebul fɔ prich to blaynd pɔsin we wi mit usay bɔku pipul dɛn de?

² Tray fɔ Ɛp Dɛn: If yu mit blaynd pɔsin usay bɔku pipul dɛn de, na fɔ tɛl am udat yu bi, ɛn mek i no se yu want fɔ ɛp am. Bikɔs dɛn kin tek advantej pan dɛn kayn pipul dɛn de, dat kin mek dɛn fred fɔs we wi kin tɔk to dɛn. Bɔt we yu tɔk to am lɛk padi, ɛn sho se yu rili bisin bɔt am, dat go mek i nɔ fred. Mɛmba se, difrɛn kayn blaynd yay pipul dɛn de; sɔm de si smɔl ɛn sɔm nɔ de si atɔl. We yu mɛmba dat, i go ɛp yu fɔ no aw fɔ ɛp di blaynd pɔsin. Afta yu dɔn ɛp di pɔsin, tɛl am se yu na pɔsin we de tich pipul dɛn di Baybul. Tɛl am se yu want fɔ rid wan skripchɔ fɔ am. Yu kin rid skripchɔ lɛk Sam 146:8 ɔ Ayzaya 35:5, 6. If i sabi rid Brel, aks am if i go want fɔ gɛt buk dɛn pan Brel we go ɛp am fɔ lan mɔ bɔt di Baybul. Yu kin ɛp am fɔ gɛt sɔm odio dɛn frɔm jw.org. If di blaynd pɔsin gɛt kɔmpyuta we gɛt program we de rid raytin we de na skrin, di blaynd pɔsin go gladi fɔ di atikul dɛn we de na jw.org ɛn yu kin ivin dawnlod am pan RTF (Rich Text Format).—Rid di bɔks we se, “We Yu De Ɛp Pɔsin we Blaynd . . .”

3. Aw yu go ebul fɔ fɛn blaynd pipul dɛn na di eria usay una kɔngrigeshɔn fɔ prich?

³ Fɛn Blaynd Pipul Dɛn: I kin at fɔ mek wi mit blaynd pɔsin we wi de prich frɔm os to os bikɔs dɛn kin fred fɔ tɔk to strenja we kin kam na dɛn domɔt. So i nɔ kin izi fɔ “fɛn” dɛn kayn pipul dɛn ya fɔ prich to dɛn. (Mat. 10:11) Yu gɛt wokmet ɔ skulmet we blaynd? Yu fɔs tray fɔ tɔk to am. If una gɛt blaynd skul na di eria usay una kɔngrigeshɔn fɔ prich, una kin gi dɛn Brel buk dɛn fɔ put na dɛn laybri. Yu no ɛnibɔdi we gɛt pɔsin we blaynd na in famili? Una gɛt ɔganayzeshɔn dɛn we de fɔ ɛp blaynd pipul dɛn? Ɛksplen to di pɔsin we in fambul blaynd, di pɔsin we yu mit na di ɔfis, ɔ di wan we de oba di ɔganayzeshɔn fɔ se, Jiova Witnɛs dɛn rili want fɔ ɛp pipul dɛn we blaynd ɛn gi dɛn Brel buk ɔ odio tin dɛn. Sho am wetin Gɔd dɔn prɔmis na di Baybul fɔ se tɛm go kam we nɔbɔdi nɔ go blaynd igen. Yu kin sho am bak di fim we de na jw.org we gɛt di taytul, Without It, I Would Feel Lost. Na ɛkspiriɛns bɔt wan blaynd man we dɔn bɛnifit we i de rid di Baybul pan Brel. If yu ɛksplen wetin mek yu go de, dat go gi yu chans fɔ tɔk to blaynd pipul dɛn.

4. Wetin wi kin lan frɔm Jenɛt in ɛkspiriɛns?

⁴ Wan blaynd sista we nem Jenɛt bin go na wan os usay blaynd pipul dɛn de. I bigin tɔk to wan yɔŋ uman. Jenɛt bin tɛl am se, “Jizɔs bin mɛn blaynd pipul dɛn fɔ sho wetin i go gɛt fɔ du fɔ di wan dɛn we blaynd.” Dɛn rid ɛn tɔk bɔt Rɛvɛleshɔn 21:3, 4 ɛn Jenɛt bin ɛksplen se na Gɔd in Kiŋdɔm go du wetin di skripchɔ se. Di uman sɛt mɔt fɔ sɔm tɛm, na in i tɔk se: “A nɔ wande yɛri dis kayn tin frɔm pɔsin we blaynd. Bɔku pipul dɛn we de si biliv se pipul dɛn blaynd bikɔs dɛn ɔ dɛn gret gret granpa dɛn bin dɔn du bad tin.” Jenɛt sɛn link to di uman fɔ di Baybul Tich buk ɛn naw, dɛn ɔl tu de stɔdi di Baybul tu tɛm pan wik.

5. Pan ɔl we wi nɔ ebul fɔ mɛn di wan dɛn we blaynd lɛk aw Jizɔs bin mɛn dɛn, us blɛsin wi go gɛt we wi sho se wi rili bisin bɔt pipul dɛn we blaynd?

⁵ Na tru se wi nɔ ebul fɔ mɛn di wan dɛn we blaynd lɛk aw Jizɔs bin mɛn dɛn, bɔt wi go ebul fɔ ɛp di wan dɛn we Setan dɔn blaynd dɛn maynd ɛn ivin di wan dɛn we dɛn yay blaynd fɔ mek dɛn lan di tru we de insay Gɔd in Wɔd. (2 Kɔr. 4:4) Jizɔs bin mɛn di tu man dɛn nia Jɛriko bikɔs i bin “sɔri” fɔ dɛn. (Mat. 20:34) If wi falamakata Jizɔs fɔ ɛp blaynd pipul dɛn, wi go gladi fɔ ɛp dɛn fɔ lan bɔt Jiova we go mek nɔbɔdi nɔ blaynd igen.