“Dɛn Wɔd Ya . . . fɔ De na Una At”
Mama ɛn papa dɛn tan lɛk shɛpad. Dɛn fɔ kia fɔ dɛn pikin dɛn we kin izi fɔ ful ɛn atak. (Prɔv. 27:23) Aw mama ɛn papa dɛn go ebul fɔ du dis? Dɛn fɔ spɛn tɛm ɛvride fɔ tɔk to dɛn pikin dɛn fɔ no wetin dɛn de tink ɛn wetin de na dɛn at. (Prɔv. 20:5) Dɔn, mama ɛn papa dɛn fɔ tich dɛn pikin dɛn di kayn we we go mek dɛn gɛt mɔ fet. (1 Kɔr. 3:10-15) Di fim we nem, “Dɛn Wɔd Ya . . . fɔ De na Una At,” de ɛp wi fɔ no se i impɔtant fɔ du famili wɔship ɔltɛm. Una wach di fim togɛda as famili, dɔn una tɔk bɔt dɛn kwɛstyɔn dɛn ya.
(1) Wetin bin mek di Rolan famili nɔ bin gɛt bɛtɛ padi biznɛs wit Gɔd igen? (2) Wetin mek di fɔs tɛm we Brɔda Rolan bin want mek dɛn du famili wɔship, i nɔ bin kɔmɔt fayn? (3) Us advays de na di Baybul we go ɛp mama ɛn papa dɛn fɔ mɛn dɛn pikin dɛn di kayn we we go mek dɛn kɔmɔt fayn? (Dit. 6:6, 7) (4) Wetin go ɛp ɔlman na di famili fɔ go de tɔk fayn ɛn ɔndastand dɛnsɛf? (5) Wetin pikin dɛn kin want fɔ mek dɛn mama ɛn papa dɛn du fɔ dɛn? (6) Aw Brɔda ɛn Sista Bayo bin ɛp Brɔda Rolan ɛn in famili? (Prɔv. 27:17) (7) Wetin di papa fɔ dɔn du bifo tɛm fɔ mek di famili wɔship go kɔmɔt fayn? (8) Wetin Brɔda Rolan bin du fɔ bigin ɛp in famili? (9) Wetin mek i impɔtant fɔ de du famili wɔship ɔltɛm? (Ɛfi. 6:4) (10) Wetin na sɔm tin dɛn we kin fayn fɔ du pan famili wɔship? (11) We Brɔda Rolan bin de ɛp Makɔs fɔ no se i impɔtant fɔ du wetin rayt, aw i bin tɔk fayn to am bɔt stil mek Makɔs no se i min wetin i bin de se? (Jɛr. 17:9) (12) Aw Brɔda ɛn Sista Rolan ɛp Ribɛka fɔ du di rayt tin we i kam pan in padi biznɛs wit Ɔstin? (Mak 12:30; 2 Tim. 2:22) (13) We Brɔda ɛn Sista Rolan adjɔst wetin dɛn du fɔ liv simpul layf, aw dat sho se dɛn gɛt fet? (Mat. 6:33) (14) Aw dis fim sho se di wan dɛn we de oba dɛn famili fɔ ɛp dɛn famili dɛn fɔ gɛt tayt padi biznɛs wit Gɔd? (1 Tim. 5:8) (15) Wetin yu dɔn mekɔp yu maynd fɔ du as yu de oba yu famili?
TIN WE DI WAN DƐN WE DE OBA DƐN FAMILI FƆ NO: Dɛn bin akt dis drama insay di 2011 kɔnvɛnshɔn. Da tɛm de, yu bin nid fɔ ajɔst di we aw yu de du yu famili wɔship? We naw? If yu stil nid fɔ ajɔst di we aw yu de du yu famili wɔship, duya na fɔ pre to Jiova fɔ mek i ɛp yu famili fɔ du tin we go bɛnifit dɛn sote go. Ɛfi. 5:15-17.