Imitate Their Faith
1. Insay di wik we de stat Ɔktoba 19, us buk wi go bigin fɔ stɔdi na di Kɔngrigeshɔn Baybul Stɔdi?
1 Insay di wik we de stat Ɔktoba 19, 2015, wi go bigin fɔ stɔdi di buk we nem, Imitate Their Faith na di Kɔngrigeshɔn Baybul Stɔdi. Dis buk gɛt Baybul stori dɛn bɔt 14 man ɛn uman dɛn we bin gɛt fet. Di kayn we aw di buk de, de mek i tan lɛk wi de si dɛn fetful pipul dɛn ya ɛn i de ɛp wi fɔ si dɛn as rial pipul dɛn we bin gɛt prɔblɛm dɛn we dɛn de sav Jiova. Di buk de tich wi lɛsin dɛn we wi go lan frɔm di stori dɛn ɛn i de ɛp wi fɔ no aw fɔ fala di advays dɛn we de insay de.—Ibru 6:12.
2. Ɛksplen sɔm tin dɛn we de insay di Imitate Their Faith buk.
2 Sɔm Tin dɛn we De Insay di Buk: Di buk gɛt map we de sho usay di pɔsin bin de ɛn di ia we i liv fɔ. Apat frɔm dat, ɛni chapta gɛt wan say we gɛt di taytul “To Think About . . . ,” we de ɛp wi fɔ tink gud wan bɔt di stori dɛn ɛn aw wi go fala di advays dɛn we wi dɔn lan frɔm di stori dɛn. Di buk gɛt pikchɔ dɛn we gɛt fayn kɔlɔ, ɛn tin dɛn we dɛn dɔn lan mɔ bɔt fɔ mek wi ebul imajin aw di stori dɛn rili apin.
3. Wetin wi fɔ du so dat wi go bɛnifit we wi de stɔdi dis buk?
3 Aw Yu Go Bɛnifit? Di lɛta we di Gɔvnin Bɔdi rayt insay di buk ɛnkɔrej wi se: “Yuz yu maynd, yu yay, yu yes, ɛn tray fɔ imajin wetin bin apin. Tray fɔ fil aw dɛn pipul dɛn ya na di Baybul bin de fil ɛn tray fɔ si wetin dɛn bin de si. Kɔmpia wetin dɛn bin du to wetin yu bin fɔ dɔn du if wetin apin to dɛn bin apin to yu.” Dat nɔ min se wi fɔ bigin tink bɔt ɔda tin dɛn, bɔt na fɔ imajin wetin di Baybul tɔk bɔt di stori ɛn fɔ tray fɔ fil aw di pipul dɛn bin de fil. Wi go nid tɛm fɔ tink gud wan bɔt wetin wi lan. (Nɛi. 8:8) If di lɛsin bigin midul wan chapta, di wan we de kɔndɔkt, go yuz 30 sɛkɔn ɔ wan minit fɔ tɔk smɔl bɔt di lɛsin we de bifo di wan we una fɔ du. Di wan we de kɔndɔkt kin aks wan ɔ tu kwɛstyɔn dɛn we una de dɔn if di lɛsin we una de du nɔ gɛt di say we se “To Think About . . .”
4. Wetin mek wi nid fɔ stɔdi di buk we nem Imitate Their Faith?
4 Pipul dɛn we de na di wɔl de tray ɔltɛm ɛn de fɛn ɔlkayn we fɔ mek wi nɔ gɛt bɛtɛ fet. Dis buk ɛn Di Wachtawa dɛn we gɛt dɛn sem kayn atikul dɛn ya na gift we Jiova de gi wi fɔ ɛp wi fɔ gɛt mɔ fet. (Jems 1:17) Lɛ wi tray fɔ bɛnifit frɔm dɛn tin dɛn ya bay we wi de atɛnd di Kɔngrigeshɔn Baybul Stɔdi ɔltɛm ɛn bay we wi kɔmɛnt ɛnitɛm wi gɛt chans we wi de du di stɔdi!