Lɛta Frɔm di Gɔvnin Bɔdi

Wi Brɔda ɛn Sista dɛn We Wi Ɔl Biliv di Sem Tin:

Wi de wɔship Jiova, wi Gɔd, wi lɛk in Wɔd we na di Baybul. Wi biliv tranga wan se we in kam pan istri, di Baybul de tɛl wi di kɔrɛkt tin, i de sho wi aw fɔ liv wi layf di bɛst we, ɛn wi dɔn si klia wan aw Jiova dɔn sho in lɔv fɔ wi mɔtalman. (Sam 119:105; Lyuk 1:3; 1 Jɔn 4:19) Wi rili want fɔ ɛp ɔda pipul dɛn fɔ lan di valyu tin dɛn na Gɔd in Wɔd. Na dat mek wi rili gladi fɔ mek una gɛt dis buk we nem, “Lɛsin dɛn we Wi Kin Lan Frɔm di Baybul.” Mek wi tɛl una smɔl tin bɔt am.

Na fɔ pikin dɛn mɔ wi mek dis buk. Bɔt wi kin yuz am bak fɔ ɛp big pipul dɛn we want fɔ lan mɔ bɔt di Baybul. Ɛn bikɔs di Baybul na buk we de fɔ ɔlman, wi nɔ gɛt wan dawt se wi ɔl go bɛnifit we wi stɔdi di

buk, we de tɔk bɔt aw mɔtalman layf bigin frɔm di tem we Gɔd mek di wɔl. Wi bin tray tranga wan fɔ mek di Baybul akawnt dɛn klia ɛn izi fɔ ɔndastand ɛn wi tray bak fɔ put dɛn di we aw dɛn bin apin.

Dis buk nɔ jɔs de tɔk bɔt di Baybul stori dɛn nɔmɔ. Di wɔd dɛn ɛn di pikchɔ dɛn we dɛn yuz insay dis buk, de mek wi si Baybul stori dɛn klia wan, ɛn i de mek wi imajin di we aw di pipul dɛn bin de fil.

Dis buk de ɛp wi fɔ si aw di Baybul na buk we tɔk bɔt pipul dɛn—di wan dɛn we obe Jiova ɛn di wan dɛn we nɔ bin obe am. Ɛn i de muv wi fɔ lan lɛsin dɛn frɔm dɛn ɛgzampul dɛn. (Romans 15:4; 1 Kɔrintians 10:6) Dis buk gɛt 14 sɛkshɔn dɛn. We yu bigin ɛni sɛkshɔn, i tɔk smɔl tin bɔt di lɛsin dɛn we wi go lan.

If yu na mama ɔ papa, yu kin rid wan lɛsin to yu pikin ɛn tɔk bɔt di pikchɔ dɛn we de de. Dɔn una ɔl tu kin rid di pat na di Baybul usay di lɛsin kɔmɔt. Ɛp yu pikin fɔ ɔndastand se di lɛsin we una tɔk bɔt na in i rid na di Baybul. Yu kin du di sem tin bak we yu de ɛp big pɔsin fɔ ɔndastand di Baybul in mɛsej.

Wi de op se dis buk go ɛp ɔl di wan dɛn we rili want fɔ no bɔt Gɔd fɔ lan bɔt in Wɔd we na di Baybul ɛn aplay di lɛsin dɛn na dɛn layf ilɛksɛf dɛn yɔŋ ɔ dɛn ol. Dis de ɛp dɛnsɛf fɔ wɔship Jiova ɛn de pat pan in famili we i lɛk.