Avɔyd dɛn Prɔblɛm dɛn ya we Yu De Kɔndɔkt Baybul Stɔdi

Nɔ Tɔk Bɔku: Yu nɔ fɔ fil se yu fɔ ɛksplen ɔltin. Jizɔs bin yuz kwɛstyɔn dɛn fɔ ɛp ɔda pipul dɛn fɔ tink fɔ dɛnsɛf ɛn gɛt di rayt ansa. (Mat. 17:​24-27) We yu aks kwɛstyɔn dɛn dat go mek di stɔdi fayn ɛn i go ɛp yu fɔ no wetin yu Baybul stɔdi de ɔndastand ɛn wetin i biliv. (be-E pej 253, par. 3 ɛn par. 4) We yu aks kwɛstyɔn, yu fɔ peshɛnt ɛn wet fɔ di ansa. If di Baybul stɔdi gi rɔng ansa, bifo yu tɛl am di kɔrɛkt wan, ɛp am fɔ tink fɔ insɛf fɔ gɛt di kɔrɛkt ansa bay we yu aks am mɔ kwɛstyɔn dɛn. (be-E pej 238, par. 1 ɛn par. 2) Tɔk di kayn we we go mek di Baybul stɔdi ɔndastand di nyu tin dɛn we yu de tɔk bɔt.—be-E pej 230, par. 4.

Nɔ Mek I At fɔ Ɔndastand: Nɔ de tink se yu fɔ tɔk bɔt ɔl wetin yu sabi bɔt di tɔpik. (Jɔn 16:​12) Pe atɛnshɔn to di men pɔynt dɛn na di paregraf. (be-E pej 226, par. 4 ɛn par. 5) We yu tɔk bɔt smɔl smɔl tin dɛn na di paregraf, pan ɔl we dɛn kin fayn dat kin mek yu mis di men pɔynt dɛn. (be-E pej 235, par. 3) Wans di Baybul stɔdi dɔn ɔndastand di men pɔynt dɛn, yu fɔ go to di nɛks paregraf.

Nɔ Tɔk Bɔt Ɔltin na di Paregraf: Di men tin we wi want fɔ du na fɔ tɔch di Baybul stɔdi in at, nɔto fɔ tɔk bɔt ɔltin na di paregraf. (Lyuk 24:​32) Yuz di pawa we Gɔd in Wɔd gɛt bay we yu pe atɛnshɔn to di men skripchɔ dɛn we de na di paregraf. (2Kɔr 10:​4; Ibru 4:​12; be-E pej 144, par. 1 to par. 3) Yuz ɛgzampul dɛn we izi fɔ ɔndastand. (be-E pej 245, par. 2 to par. 4) Tink bɔt di prɔblɛm dɛn we di Baybul stɔdi gɛt, di tin dɛn we i biliv, ɛn tray fɔ mek wetin yu de tɔk bɔt fit dɛn tin dɛn de. Yu kin aks kwɛstyɔn dɛn lɛk dɛn wan ya: “Aw yu fil bɔt wetin yu de lan na dis chapta ɔ lɛsin?” “Wetin dis de tich wi bɔt Jiova?” “Us bɛnifit yu go gɛt we yu fala da kayn advays dɛn de?”—be-E pej 238, par. 3 to par. 5; pej 259, par. 1.