Mared Na Arenjmɛnt we Fɔ De Te Wan Pɔsin Day

Kristian dɛn we de ɛnjɔy dɛn mared bikɔs dɛn de du wetin Gɔd want de bring prez to Jiova ɛn dɛnsɛf de gladi. (Mak 10:​9) Fɔ mek Kristian dɛn mared go las ɛn fɔ mek dɛn gladi, dɛn fɔ tek tɛm fala di advays dɛn we de na di Baybul we dɛn de pik pɔsin fɔ mared.

I fayn fɔ mek pɔsin wet te “i nɔ tu yɔŋ” bifo i bigin fɔ luk fɔ pɔsin fɔ mared, bikɔs na da tɛm de pɔsin de rili fil fɔ du mami ɛn dadi biznɛs we kin mek i nɔ izi fɔ mek i tink di rayt we. (1Kɔ 7:​36) I mek sɛns fɔ yuz di tɛm we yu nɔ mared yet fɔ gɛt tayt padi biznɛs wit Gɔd ɛn fɔ gɛt fayn Kristian kwaliti dɛn. Da tɛm de, yu go ebul fɔ du mɔ tin dɛn fɔ mek yu mared go bifo.

Bifo yu gri fɔ mared pɔsin, tek yu tɛm fɔ no “aw [i] tan insay [in] at.” (1Pi 3:​4) If yu bigin fɔ gɛt siriɔs dawt bɔt sɔntin dɛn, na fɔ tɔk bɔt dɛn wit di pɔsin we yu plan fɔ mared. Jɔs lɛk ɛni ɔda padi biznɛs, insay di mared-os yu fɔ pe atɛnshɔn mɔ to wetin yu go du fɔ di wan we yu mared to nɔto wetin i go du fɔ yu. (Fil 2:​3, 4) If una aplay Baybul prinsipul dɛn bifo una mared, i go izi fɔ mek una go kɔntinyu fɔ aplay dɛn we una mared ɛn dat go mek una gɛt gladi-at na una mared-os.

WACH DI VIDIO WE GƐT DI TAYTUL, RƐDI YUSƐF FƆ MARED—PAT 3: “SIDƆM TINK GUD WAN,” DƆN UNA ANSA DI KWƐSTYƆN DƐN WE DE DƆŊ:

• Aw di sista in padi biznɛs wit Jɔn bin de go bifo?

• Wetin i notis we i bigin fɔ sabi am gud gud wan?

• Aw in mama ɛn papa bin ɛp am ɛn wetin i bin disayd fɔ du we mek sɛns?