Wetin Wi Go Du fɔ Ɛp Afta Dizasta Apin?

Dɛn biɛn tɛm, nachɔral dizasta dɛn de apin fast fast. We dizasta apin, wi nid fɔ ɔganayz ɛn wok fayn fayn wan so dat wi go gi wi brɔda ɛn sista dɛn di tin dɛn we dɛn nid. Bikɔs ɔf dis, di Gɔvnin Bɔdi dɔn arenj fɔ mek ɔl branch ɔfis dɛn gɛt Dizasta Rilif Dipatmɛnt.

We di brɔda dɛn na da dipatmɛnt no se dizasta dɔn apin, wantɛm wantɛm dɛn de kɔl di lokal ɛlda dɛn fɔ no uskayn ɛp di pɔblisha dɛn go nid. If di pɔblisha dɛn nɔ ebul sɔlv di prɔblɛm bikɔs di ples pwɛl bad bad wan, di branch ɔfis kin sɛn ɛlda dɛn we kwalifay fɔ de bifo pan di rilif wok. Dɛn brɔda dɛn ya kin aks fɔ brɔda ɛn sista dɛn we want fɔ ɛp ɔ fɔ mek dɛn kam wit sɔm patikyula tin dɛn we dɛn go nid ɔ sɔntɛm dɛn go bay ɛn sheb di tin dɛn we dɛn nid na da eria de.

Bɔku bɛnifit de we dɛn de du am dis kayn we. I de mek dɛn nɔ du dɔbul wok, mek dɛn nɔ kɔnfyus we dɛn de wok, ɛn nɔ west mɔni ɛn matirial dɛn, we kin apin we ɔlman de du tin fɔ insɛf.

Di brɔda dɛn we di branch ɔfis dɔn pik kin disayd ɔmɔs mɔni dɛn nid ɛn ɔmɔs brɔda ɛn sista dɛn, dɛn go nid fɔ du di rilif wok. Dɛn kin tray bak fɔ sabi di gɔvmɛnt wokman dɛn we de na di eria ɛn bɔku tɛm, dɛn kin ɛp wi fɔ du di rilif wok kwik kwik wan. So duya nɔ disayd fɔ kɔlɛkt mɔni fɔ yusɛf, sɛn rilif tin dɛn, ɔ travul go na di say we di dizasta apin pas dɛn aks yu fɔ du am.

Bɔt we dizasta apin wi kin want fɔ ɛp. (Ibr 13:​16) Wi lɛk wi brɔda ɛn sista dɛn! So wetin wi go ebul fɔ du? Wan impɔtant tin we wi kin du na fɔ pre fɔ di wan dɛn we dizasta apin to ɛn di wan dɛn we de ɛp dɛn. Wi kin gi bak mɔni fɔ di wɔlwayd wɔk. Di Gɔvnin Bɔdi go dayrɛkt di branch ɔfis dɛn fɔ disayd di bɛst we aw fɔ yuz dɛn mɔni dɛn de. If yu want fɔ ɛp, yu kin sho se yu rɛdi fɔ du dat bay we yu fil di Local Design/Construction Volunteer Application (DC-50) fɔm.

WACH DI VIDIO WE GƐT DI TAYTUL, BAD BAD FLƆDIN WE BIN APIN NA BRAZIL, DƆN UNA ANSA DI KWƐSTYƆN WE DE DƆŊ:

Wetin yu rili lɛk bɔt di we aw Jiova Witnɛs dɛn du rilif wok afta di flɔdin we apin na Brazil insay 2020?