Jiova Witnɛs dɛn Kin Ɛp we Bad Tin Apin Sɔnsay?

Yɛs, Jiova Witnɛs dɛn kin ɛp bɔku tɛm we bad tin kin apin sɔnsay. Wi kin gi difrɛn tin dɛn fɔ ɛp di wan dɛn we na wi kɔmpin Jiova Witnɛs dɛn ɛn di wan dɛn we nɔto Jiova Witnɛs. Wi de fala di Baybul in advays we de na Lɛta Fɔ Galeshya 6:10, we se: “Una fɔ du gud to ɔlman, patik[yu]la wi kɔmpin Kristiɛn dɛn, bikɔs dɛn tan lɛkɛ wan fambul wit wi.” Wi kin tray bak fɔ ɛnkɔrej di wan dɛn we di wan dɛn we kin rili sɔfa we dɛn bad tin dɛn de dɔn apin.—Sɛkɛn Lɛta Fɔ Kɔrint 1:3, 4.

Ɔganayzeshɔn

Afta wan bad tin apin na wan ples, di ɛlda dɛn na di kɔngrigeshɔn dɛn we di tin mit, tray fɔ kɔl ɔl di wan dɛn we de na dɛn kɔngrigeshɔn fɔ si if natin nɔ du dɛn ɛn fɔ no aw fɔ ɛp di wan dɛn we di tin mit. Afta dat, di ɛlda dɛn go tɛl di branch ɔfis fɔ Jiova Witnɛs dɛn ɔltin we dɛn no frɔm wetin di brɔda dɛn tɛl dɛn.

If di kɔngrigeshɔn dɛn we de na di eria nɔ go ebul fɔ gi ɔl di tin dɛn we di brɔda dɛn we di bad tin mit, go nid, dɔn di Gɔvnin Bɔdi fɔ Jiova Witnɛs dɛn go arenj fɔ sɛn di tin dɛn we di brɔda dɛn nid. Na dis sem we di fɔstɛm Kristian dɛn bin de du fɔ kia fɔ dɛn kɔmpin Kristian dɛn we tin fɔ it nɔ bin de. (Fɔs Lɛta Fɔ Kɔrint 16:1-4) Di branch ɔfis we de na di eria go mek wan grup we dɛn kɔl Dizasta Rilif Kɔmiti. Dis grup go ɔganayz ɛn sho wetin-ɛn-wetin fɔ du. Ɔda brɔda ɛn sista dɛn we na ɔda ples dɛn, go yuz dɛn tɛm ɛn dɛn mɔni fɔ go ɛp di brɔda dɛn we di bad tin apin to.—Prɔvabs 17:17.

Usay di Mɔni De Kɔmɔt?

Wan we aw di branch ɔfis fɔ Jiova Witnɛs dɛn kin yuz di mɔni dɛn we pipul dɛn kin gi fɔ ɛp kɛr di wok go bifo, na bay we dɛn kin sɛn am fɔ ɛp di wan dɛn we di trɔbul mit. (Akt 11:27-30; Sɛkɛn Lɛta Fɔ Kɔrint 8:13-15) Bikɔs dɛn nɔ de pe di wan dɛn we de du dis wok, so di mɔni we pipul dɛn de gi na fɔ ɛp di wan dɛn we di bad tin mit, nɔto fɔ kia fɔ di wan dɛn we de bifo na wi ɔganayzeshɔn. Wi de tek tɛm wit ɔl di mɔni we pipul dɛn kin gi fɔ ɛp kɛr di wok go bifo.—Sɛkɛn Lɛta Fɔ Kɔrint 8:20.