Sho se Yu Gladi fɔ di ‘Man dɛn We Na Gift’

1. Wetin na sɔm pan di gift dɛn we Jizɔs dɔn gi wi?

NO MƆTALMAN nɔ de we gɛt fri-an lɛk Jizɔs. We i bin de na di wɔl, i bin pafɔm mirekul dɛn fɔ ɛp pipul dɛn. (Lyuk 9:​12-17) Di gift we pas ɔl we i gi wi na we i day fɔ wi. (Jɔn 15:13) Frɔm we Jizɔs gɛt layf bak, i dɔn kɔntinyu fɔ sho se i gɛt fri-an. Jɔs lɛk aw i prɔmis, i bin beg Jiova fɔ gi in oli spirit fɔ tich ɛn kɔrej wi. (Jɔn 14:16, 17, futnot; 16:13) Ɛn Jizɔs de yuz wi mitin dɛn fɔ kɔntinyu fɔ gi wi di tin dɛn we wi nid we go ɛp wi fɔ mek disaypul dɛn ɔlsay na di wɔl.​—Mat. 28:​18-20.

2. Udat dɛn de pat pan di man dɛn we na “gift” we Ɛfishians 4:​7, 8 tɔk bɔt?

² Lɛ wi tɔk bɔt wan ɔda gift we Jizɔs dɔn gi wi. Apɔsul Pɔl tɔk se afta Jizɔs go na ɛvin, “i gi sɔm man dɛn as gift.” (Rid Ɛfishians 4:7, 8.) Pɔl bin ɛksplen se Jizɔs bin gi dɛn gift dɛn ya fɔ sɔpɔt di kɔngrigeshɔn difrɛn we dɛn. (Ɛfi. 1:​22, 23; 4:​11-13) Tide, dɛn man dɛn ya we na “gift” na ministerial savant dɛn, ɛlda dɛn na di kɔngrigeshɔn, ɛn sakit ovasia dɛn.a As wi ɔl no, dɛn man dɛn ya nɔ pafɛkt, so dɛn kin mek mistek. (Jems 3:2) Bɔt wi Masta Jizɔs Krays de yuz dɛn man dɛn ya fɔ ɛp wi, so dɛn na gift fɔ wi.

3. Gi wan ɛgzampul we de sho aw wi go sɔpɔt di wok we di man dɛn we na “gift” de du.

³ Jizɔs bin gi dɛn man dɛn ya we na “gift” di wok fɔ ɛp di kɔngrigeshɔn fɔ tinap tranga wan. (Ɛfi. 4:12) Bɔt wi ɔl go ebul fɔ ɛp dɛn fɔ du dis impɔtant wok. Fɔ ɛgzampul, sɔm pan wi gɛt di wok fɔ bil Kiŋdɔm Ɔl dɛn. Ɔda wan dɛn de sɔpɔt di wok bay we dɛn de gi tin fɔ it, transpɔt, ɛn du ɔda tin dɛn. Semweso, wi ɔl go ebul fɔ sɔpɔt di wok we ministerial savant dɛn, ɛlda dɛn, ɛn sakit ovasia dɛn de du bay wetin wi de se ɛn du. Lɛ wi tɔk bɔt aw wi de bɛnifit frɔm di tranga wok we dɛn de du, ɛn aw wi go sho se wi gladi fɔ dɛn man dɛn ya ɛn Jizɔs we gi wi dɛn as “gift.”

MINISTERIAL SAVANT DƐN DE “DU TIN DƐN FƆ ƐP PIPUL DƐN”

4. Wetin na sɔm tin dɛn we ministerial savant dɛn bin de du “fɔ ɛp pipul dɛn” insay di fɔstɛm Kristian dɛn tɛm?

⁴ Insay di fɔstɛm Kristian dɛn tɛm, dɛn bin de pik sɔm brɔda dɛn fɔ bi ministerial savant dɛn. (1 Tim. 3:8) I tan lɛk se na dɛn Pɔl bin rayt bɔt we i se dɛn de “du tin dɛn fɔ ɛp pipul dɛn.” (1 Kɔr. 12:28) Dis sho klia wan se ministerial savant dɛn de du impɔtant wok dɛn so dat di ɛlda dɛn go ebul pe atɛnshɔn fɔ tich ɛn kia fɔ di brɔda ɛn sista dɛn. Fɔ ɛgzampul, sɔntɛm ministerial savant dɛn bin de ɛp fɔ kɔpi di Skripchɔ dɛn bak ɔ sɔntɛm na dɛn bin de bay di tin dɛn we dɛn bin nid fɔ kɔpi di Skripchɔ dɛn.

5. Wetin na sɔm pan di wok dɛn we ministerial savant dɛn de du tide fɔ ɛp pipul dɛn?

⁵ Lɛ wi tɔk bɔt sɔm pan di wok dɛn we ministerial savant dɛn de du fɔ ɛp pipul dɛn na yu kɔngrigeshɔn. (1 Pit. 4:10) Sɔntɛm dɛn go gi dɛn di wok fɔ kia fɔ di kɔngrigeshɔn akawnt ɔ tɛritri dɛn, fɔ mek ɔda fɔ pɔblikeshɔn dɛn ɛn gi di pɔblisha dɛn, fɔ wok na di sawnd sistɛm, fɔ bi atɛndant, ɔ fɔ ɛp fɔ mek di say dɛn we dɔn pwɛl na di Kiŋdɔm Ɔl. Ɔl dɛn wok dɛn ya impɔtant bikɔs i de mek wi ɛnjɔy di mitin dɛn ɛn du di prichin wok di kayn we we ɔganayz. (1 Kɔr. 14:40) Apat frɔm dɛn wok dɛn ya, sɔm ministerial savant dɛn kin du pat dɛn na di mitin we wi kin gɛt insay di wik ɛn gi pɔblik tɔk dɛn. Dɛn kin pik ministerial savant bak fɔ ɛp grup ovasia. Sɔntɛnde, ministerial savant dɛn we kwalifay kin jɔyn ɛlda dɛn fɔ du shɛpadin visit.

6. Wetin na sɔm rizin dɛn we mek wi gladi fɔ wi ministerial savant dɛn we de wok tranga wan?

⁶ Aw di wok we di ministerial savant dɛn de du de ɛp di kɔngrigeshɔn? Wan sista we nem Bibalib we de na Bolivia tɔk se, “A de tɛl wi ministerial savant dɛn tɛnki bikɔs a de rili ɛnjɔy di mitin dɛn. Bikɔs ɔf di wok we dɛn de du, a ebul fɔ siŋ, gi kɔmɛnt dɛn, lisin to tɔk dɛn, ɛn lan frɔm di vidio ɛn pikchɔ dɛn. Dɛn kin ɛp fɔ mek shɔ se di wan dɛn we atɛnd di mitin sef ɛn ɛp di wan dɛn we kɔnɛkt na Zum fɔ bɛnifit frɔm di mitin. Afta di mitin, na dɛn kin de bifo fɔ ɛp fɔ klin di Kiŋdɔm Ɔl, fɔ kia fɔ di kɔngrigeshɔn akawnt, ɛn mek shɔ se wi gɛt di pɔblikeshɔn dɛn we wi nid. A rili gladi fɔ dɛn!” Lɛsli we de na Kolombia ɛn we in man na ɛlda tɔk se: “Mi man abop pan ministerial savant dɛn fɔ ɛp am fɔ du difrɛn wok dɛn. If dɛn nɔ bin de, mi man bin fɔ gɛt mɔ wok, so a gladi fɔ di zil we ministerial savant dɛn gɛt ɛn we dɛn rɛdi fɔ ɛp.” Wan dawt nɔ de se na da sem we de yusɛf de fil.​—1 Tim. 3:13.

7. Aw wi go sho se wi gladi fɔ di ministerial savant dɛn? (Luk bak di pikchɔ.)

⁷ Pan ɔl we wi go gladi fɔ di ministerial savant dɛn, di Baybul ɛnkɔrej wi fɔ: “Sho se [wi] gɛt tɛnki.” (Kol. 3:15) Wan ɛlda we nem Kristɔf we de na Finland tɔk bɔt aw i kin sho se i gladi fɔ di ministerial savant dɛn. I tɔk se, “A kin sɛn kad ɔ tɛks mɛsej usay a go kot wan skripchɔ ɛn tɔk bɔt patikyula tin we di ministerial savant du we dɔn ɛnkɔrej mi ɔ wetin mek a gladi fɔ di wok we i de du na di kɔngrigeshɔn.” Paskal ɛn Jeɛl we de na Nyu Kalidonia kin pre fɔ di ministerial savant dɛn. Paskal tɔk se, “Dis biɛn tɛm, wi dɔn de pre fɔ di ministerial savant dɛn fɔ tɛl Jiova tɛnki fɔ dɛn ɛn beg am fɔ de wit dɛn ɛn ɛp dɛn.” Jiova de yɛri dɛn kayn prea dɛn de ɛn di wan ol kɔngrigeshɔn de bɛnifit.​—2 Kɔr. 1:11.

DI ƐLDA DƐN NA DI KƆNGRIGESHƆN DE “WOK TRANGA WAN FƆ UNA”

8. Wetin go dɔn mek Pɔl rayt se ɛlda dɛn insay di fɔstɛm Kristian dɛn tɛm bin de “wok tranga wan”? (1 Tɛsalonians 5:​12, 13)

⁸ Ɛlda dɛn we bin de insay di fɔstɛm Kristian dɛn tɛm bin de wok tranga wan fɔ di kɔngrigeshɔn. (Rid 1 Tɛsalonians 5:​12, 13; 1 Tim. 5:17) Na dɛn bin “de oba” di kɔngrigeshɔn, ɛn na dɛn bin de kɔndɔkt mitin dɛn ɛn disayd tin dɛn fɔ di kɔngrigeshɔn. Dɛn bin de “advays” dɛn brɔda ɛn sista dɛn ɛn gi fayn advays dɛn we go ɛp fɔ protɛkt di kɔngrigeshɔn. (1 Tɛs. 2:​11, 12; 2 Tim. 4:2) As wi ɔl no, dɛn man dɛn ya bin de wok tranga wan bak fɔ kia fɔ dɛn famili ɛn fɔ kɔntinyu fɔ gɛt tayt padi biznɛs wit Jiova.​—1 Tim. 3:​2, 4; Tay. 1:​6-9.

9. Wetin na sɔm pan di wok dɛn we ɛlda dɛn de du tide?

⁹ Di ɛlda dɛn tide rili bizi. Dɛn de prich di gud nyuz. (2 Tim. 4:5) Dɛn de sɛt fayn ɛgzampul bay we dɛn de prich wit zil, ɔganayz di prichin wok na di tɛritri we dɛn de, ɛn tren wi fɔ prich ɛn tich gud gud wan. Dɛn na jɔj dɛn bak we gɛt sɔri-at ɛn we de trit ɔlman fia wan. We pɔsin na di kɔngrigeshɔn kɔmit siriɔs sin, di ɛlda dɛn de tray tranga wan fɔ ɛp da pɔsin de fɔ gɛt tayt padi biznɛs bak wit Jiova. We dɛn de du dat, dɛn kin tray tranga wan bak fɔ mek di kɔngrigeshɔn kɔntinyu fɔ klin na Jiova in yay. (1 Kɔr. 5:​12, 13; Gal. 6:1) Di ɛlda dɛn na shɛpad dɛn, ɛn dat na di men wok we dɛn de du. (1 Pit. 5:​1-3) Dɛn kin gi tɔk dɛn frɔm di Baybul we dɛn kin dɔn pripia fayn fayn wan, tray fɔ sabi ɔlman na di kɔngrigeshɔn, ɛn du shɛpadin visit. Apat frɔm dɛn wok dɛn ya, sɔm kin ɛp fɔ bil ɛn mek di say dɛn we dɔn pwɛl na ɔda Kiŋdɔm Ɔl dɛn, ɔganayz kɔnvɛnshɔn, ɛn wok na di Hospital Liaison Committees ɛn Patient Visitation Groups. Ɛlda dɛn de wok tranga wan fɔ wi!

10. Wetin na sɔm rizin dɛn we mek wi gladi fɔ wi ɛlda dɛn we de wok tranga wan?

¹⁰ Jiova bin dɔn tɔk se shɛpad dɛn go kia fɔ wi fayn fayn wan ɛn wi “nɔ go fred igen ɔ panik.” (Jɛr. 23:4) Joana we na wan sista na Finland bin si se dɛn wɔd dɛn ya na tru di tɛm we in mama bin sik siriɔs wan. I tɔk se: “Pan ɔl we i nɔ kin izi fɔ tɛl ɔda pipul dɛn aw a de fil, wan ɛlda we a nɔ bin sabi bɛtɛ bin peshɛnt wit mi, pre wit mi, ɛn ɛp mi fɔ no se Jiova lɛk mi. A nɔ mɛmba di tin dɛn we i bin tɔk, bɔt a mɛmba se a bin lɛf fɔ wɔri. A biliv se na Jiova bin sɛn am fɔ ɛp mi di rayt tɛm.” Aw di ɛlda dɛn na yu kɔngrigeshɔn dɔn ɛp yu?

11. Aw wi go sho se wi gladi fɔ di ɛlda dɛn? (Luk bak di pikchɔ.)

¹¹ Jiova want mek wi sho se wi rili gladi fɔ di ɛlda dɛn “bikɔs ɔf di wok we dɛn de du.” (1 Tɛs. 5:​12, 13) Ɛnriɛta we insɛf de na Finland tɔk se: “Ɛlda dɛn rɛdi fɔ ɛp ɔda pipul dɛn, bɔt dis nɔ min se dɛn gɛt ɛkstra taym ɛn trɛnk ɔ dɛn nɔ gɛt dɛn yon prɔblɛm dɛn. Sɔntɛnde, a kin jɔs tɛl dɛn se: ‘Yu no wetin? Yu na gud ɛlda. A op se yu no dat.’” Wan sista we de na Tɔkiyec we nem Sera tɔk se: “Ɛlda dɛn nid ɛnkɔrejmɛnt fɔ mek dɛn go kɔntinyu fɔ du dɛn wok. So wi kin sɛn kad to dɛn, invayt dɛn na wi os fɔ kam it wit wi, ɔ prich wit dɛn na fil savis.” Ɛni ɛlda de na yu kɔngrigeshɔn we yu rili gladi fɔ bikɔs ɔf di tranga wok we i de du? Na fɔ luk fɔ we dɛn fɔ sho am se yu gladi fɔ wetin i de du.—1 Kɔr. 16:18.

SAKIT OVASIA DƐN DE ƐNKƆREJ WI FƆ TINAP TRANGA WAN

12. Us arenjmɛnt bin ɛp di fɔstɛm Kristian dɛn fɔ tinap tranga wan? (1 Tɛsalonians 2:​7, 8)

¹² Krays Jizɔs bin gi bak sɔm ‘man dɛn we na gift’ fɔ ɛp di kɔngrigeshɔn wan ɔda we. I bin yuz di ɛlda dɛn na Jerusɛlɛm fɔ sɛn Pɔl, Banabas ɛn ɔda brɔda dɛn fɔ go waka na di difrɛn kɔngrigeshɔn dɛn. (Akt 11:22) Wetin mek? Na fɔ di sem rizin we kin mek dɛn pik ministerial savant ɛn ɛlda dɛn, dat na fɔ ɛp di kɔngrigeshɔn fɔ tinap tranga wan. (Akt 15:​40, 41) Dɛn man dɛn ya bin mek bɔku sakrifays dɛn ɛn dɛn bin ivin put dɛn layf pan denja fɔ tich ɛn ɛnkɔrej ɔda pipul dɛn.​—Rid 1 Tɛsalonians 2:​7, 8.

13. Wetin na sɔm pan di wok dɛn we sakit ovasia dɛn gɛt?

¹³ Sakit ovasia dɛn kin travul ɔltɛm. Sɔm kin travul fɔ lɔng tɛm fɔ go na difrɛn kɔngrigeshɔn dɛn. Ɛni wik, sakit ovasia kin gi tɔk dɛn, du shɛpadin visit dɛn, kɔndɔkt mitin fɔ payɔnia dɛn, ɛlda dɛn, ɛn mitin fɔ fil savis. I kin pripia tɔk dɛn ɛn ɔganayz sakit asɛmbli ɛn kɔnvɛnshɔn dɛn. I kin tich na payɔnia skul dɛn, arenj spɛshal mitin fɔ payɔnia dɛn na di sakit, ɛn sɔntɛnde i kin du ɔda ɔjɛnt ɛn impɔtant wok dɛn we di branch ɔfis kin gi am.

14. Wetin na sɔm rizin dɛn we mek wi gladi fɔ wi sakit ovasia dɛn we de wok tranga wan?

¹⁴ Aw di kɔngrigeshɔn dɛn kin bɛnifit frɔm di fayn wok we di sakit ovasia dɛn de du? We wan brɔda we de na Tɔkiye de tɔk bɔt di wok we di sakit ovasia dɛn de du, i se: “Ɛnitɛm we dɛn kam, dɛn kin mek a spɛn mɔ tɛm fɔ ɛp mi brɔda ɛn sista dɛn. A dɔn mit bɔku sakit ovasia dɛn; bɔt nɔn pan dɛn nɔ ɛva mek a fil se i tu bizi ɔ i nɔ want fɔ tɔk to mi.” Joana, we wi bin dɔn tɔk bɔt bin wok wit wan sakit ovasia na fil savis, bɔt dɛn nɔ bin mit ɛnibɔdi na os. I tɔk se, “Bɔt a nɔ go ɛva fɔgɛt da de de. Mi tu sista dɛn bin jɔs dɔn muf go ɔdasay ɛn a bin de rili mis dɛn. Di sakit ovasia bin ɛnkɔrej mi ɛn ɛp mi fɔ si se rayt naw sɔntɛm wi nɔ go ebul fɔ de nia wi famili ɔ padi dɛn, bɔt insay di nyu wɔl wi go gɛt bɔku bɔku chans fɔ spɛn tɛm wit dɛn.” Bɔku pan wi bak kin mɛmba di fayn tɛm we wi dɔn spɛn wit wi sakit ovasia dɛn.​—Akt 20:37–21:1.

15. (a) Akɔdin to wetin de na 3 Jɔn 5-8, aw wi go sho se wi gladi fɔ sakit ovasia dɛn? (Luk bak di pikchɔ.) (b) Wetin mek wi fɔ sho se wi gladi fɔ di brɔda dɛn we de wok tranga wan na di kɔngrigeshɔn dɛn wɛf dɛn? Aw wi go du dat? (Luk di bɔks we gɛt di taytul “Mɛmba Dɛn Wɛf Dɛn.”)

¹⁵ Apɔsul Pɔl bin ɛnkɔrej Geɔs fɔ du gud to di brɔda dɛn we dɛn de sɛn fɔ kam ɛp di kɔngrigeshɔn fɔ tinap tranga wan ɛn “ɛp dɛn di we we go mek Gɔd gladi.” (Rid 3 Jɔn 5-8.) Wan we we wi go du dat na we wi invayt di sakit ovasia fɔ kam it wit wi. Wan ɔda we we wi go du dat na we wi de go fil savis we i kam na wi kɔngrigeshɔn. Lɛsli we wi bin dɔn tɔk bɔt, de du ɔda tin dɛn bak fɔ sho se i gladi. I tɔk se: “A kin pre fɔ mek Jiova gi dɛn di tin dɛn we dɛn nid. Mi ɛn mi man dɔn rayt lɛta dɛn bak fɔ tɛl dɛn aw di kam we dɛn kam na wi kɔngrigeshɔn dɔn ɛp wi.” Mɛmba se sakit ovasia dɛn kin gɛt prɔblɛm dɛn ɛn dɛn kin taya jɔs lɛk wi. Sɔntɛnde, dɛn kin sik, gɛt tin dɛn we kin mek dɛn wɔri, ɛn dɛn kin ivin gɛt pwɛlat. Sɔntɛm di fayn wɔd dɛn we yu go tɔk ɔ di smɔl gift we yu go gi yu sakit ovasia go bi ansa to in prea!​—Prɔv. 12:25.

WI NID ‘MAN DƐN WE NA GIFT’

16. Akɔdin to Prɔvabs 3:​27, us kwɛstyɔn dɛn brɔda dɛn kin aks dɛnsɛf?

¹⁶ Wi nid mɔ brɔda dɛn fɔ wok as ‘man dɛn we na gift’ ɔlsay na di wɔl. If yu na brɔda we dɔn baptayz, yu tink se yu go “ebul fɔ ɛp”? (Rid Prɔvabs 3:27.) Yu rɛdi fɔ wok fɔ mek yu go kwalifay fɔ bi ministerial savant? If yu na ministerial savant, yu rɛdi fɔ wok fɔ kwalifay fɔ bi ɛlda fɔ mek yu go wok fɔ yu brɔda ɛn sista dɛn?d Yu go ebul fɔ ajɔst di tin dɛn we yu de du fɔ mek yu go aplay fɔ atɛnd di Skul fɔ Pipul dɛn We De Prich bɔt Gɔd in Kiŋdɔm? Da skul de go tren yu ɛn mek Jizɔs yuz yu pas aw i de du naw. If yu fil se yu nɔ go ebul fɔ du dɛn tin dɛn ya, na fɔ pre to Jiova. Beg am fɔ mek i gi yu in oli spirit fɔ mek yu go ebul du ɛni wok we dɛn gi yu fayn fayn wan.​—Lyuk 11:13; Akt 20:28.

17. Wetin di ‘man dɛn we na gift’ de mek wi no bɔt wi Kiŋ we na Krays Jizɔs?

¹⁷ Di brɔda dɛn we Jizɔs dɔn pik fɔ bi ‘man dɛn we na gift’ de sho se na Jizɔs de bifo di wok we de apin insay dis las dez. (Mat. 28:20) Yu nɔ gladi bikɔs wi gɛt Kiŋ we lɛk wi, we gɛt fri-an, we no wetin wi nid, ɛn we de gi wi brɔda dɛn we kwalifay fɔ ɛp wi? So luk fɔ we dɛn fɔ sho se yu gladi fɔ dɛn man dɛn ya we de wok tranga wan. Ɛn nɔ ɛva fɔgɛt fɔ tɛl Jiova tɛnki we na di men Pɔsin we de gi “gud gift ɛn ɔl pafɛkt prɛzɛnt.”​—Jems 1:17.