Yɔŋ Brɔda dɛn, Una Falamakata Mak ɛn Timoti dɛn Ɛgzampul

1-2. Wetin na sɔm tin dɛn we bin fɔ dɔn mek Mak ɛn Timoti nɔ du mɔ fɔ Jiova ɛn dɛn brɔda ɛn sista dɛn?

YƆŊ brɔda dɛn, una want fɔ du mɔ fɔ Jiova ɛn una brɔda ɛn sista dɛn na una kɔngrigeshɔn? Wan dawt nɔ de se una want fɔ du dat. I rili fayn fɔ si bɔku yɔŋ brɔda dɛn we rɛdi fɔ wok fɔ Jiova ɛn ɔda pipul dɛn! (Sam 110:3) Sɔntɛm, tin dɛn go de we go mek i nɔ izi fɔ mek yu du mɔ fɔ Jiova. Bɔt nɔ fred fɔ du mɔ fɔ Jiova bikɔs yu nɔ no wetin go apin. Yu dɔn ɛva fred fɔ du wok we dɛn gi yu bikɔs yu de fred se yu nɔ go ebul fɔ du am. If na so bi, mɛmba se nɔto yu fɔs dɔn fil da we de.

² Na da sem we de Mak ɛn Timoti bin de fil. Bɔt pan ɔl we dɛn nɔ bin no wetin gɛt fɔ apin to dɛn ɔ dɛn bin de fil se dɛn nɔ kwalifay, dɛn bin stil disayd fɔ du mɔ fɔ Jiova ɛn dɛn brɔda ɛn sista dɛn. I go bi se Mak bin de wit in mama na fayn os we apɔsul Pɔl ɛn Banabas bin tɛl am fɔ jɔyn dɛn fɔ du dɛn fɔs mishɔnari patrol. (Akt 12:12, 13, 25) Mak bin lɛf di ples we i dɔn yus to so dat i go du mɔ fɔ Jiova. Fɔs, i bin go na Antiɔk. Dɔn, i bin travul wit Pɔl ɛn Banabas fɔ go na ples dɛn we fa. (Akt 13:1-5) Semweso, i go bi se Timoti bin de wit in mama ɛn papa di tɛm we Pɔl bin tɛl am fɔ jɔyn am fɔ du di prichin wok. Bikɔs Timoti bin yɔŋ ɛn i nɔ bin gɛt bɛtɛ ɛkspiriɛns, dat bin fɔ dɔn mek i fil se i nɔ kwalifay fɔ go wit Pɔl. (Luk bak 1 Kɔrintians 16:10, 11 ɛn 1 Timoti 4:12.) Bɔt i bin gri fɔ go wit Pɔl ɛn i bin gɛt bɔku blɛsin dɛn.​—Akt 16:3-5.

3. (a) Aw wi no se Pɔl bin valyu Mak ɛn Timoti? (2 Timoti 4:6, 9, 11) (Luk bak di pikchɔ dɛn.) (b) Us kwɛstyɔn dɛn wi go tɔk bɔt insay dis atikul?

³ Mak ɛn Timoti bin gɛt fayn ɛkspiriɛns dɛn ɛn dɛn bin lan fɔ du bɔku wok dɛn fɔ Jiova ɛn dɛn brɔda ɛn sista dɛn di tɛm we dɛn bin yɔŋ. Pɔl bin rili valyu dɛn yɔŋman dɛn ya, na dat mek i bin want mek dɛn de nia am we i no se i nɔ go te igen dɛn go kil am. (Rid 2 Timoti 4:6, 9, 11.) Us kwaliti dɛn Mak ɛn Timoti bin gɛt we mek Pɔl bin rili lɛk dɛn? Aw yɔŋ brɔda dɛn go falamakata dɛn? Ɛn aw yɔŋ brɔda dɛn go bɛnifit frɔm Pɔl in fayn advays?

FALAMAKATA MAK—RƐDI FƆ WOK TRANGA WAN FƆ JIOVA ƐN YU BRƆDA ƐN SISTA DƐN

4-5. Aw Mak bin sho se i rɛdi fɔ wok fɔ Jiova ɛn ɔda pipul dɛn?

⁴ Akɔdin to wan rɛfrɛns, fɔ wok fɔ ɔda pipul dɛn min fɔ wok tranga wan fɔ ɛp dɛn ɛn fɔ kɔntinyu fɔ ɛp dɛn ivin tɛm dɛn we i nɔ izi fɔ du dat. Na dat Mak bin du. I go bi se Mak bin fil bad ɛn in at bin pwɛl we Pɔl nɔ bin gri fɔ mek i go wit am we i bin de du in sɛkɔn mishɔnari patrol. (Akt 15:37, 38) Bɔt dat nɔ bin mek Mak lɛf fɔ wok fɔ in brɔda ɛn sista dɛn.

⁵ Mak bin gri fɔ go wit in kɔzin we na Banabas ɔdasay. Lɛk 11 ia afta dat, Mak na bin wan pan di pipul dɛn we bin sɔpɔt Pɔl di fɔs tɛm we dɛn put am na prizin na Rom. (Fay. 23, 24) Infakt, bikɔs Pɔl bin gladi fɔ di sɔpɔt we Mak bin sɔpɔt am, i bin tɔk se Mak “dɔn rili kɔrej [am].”​—Kol. 4:10, 11.

6. Aw Mak bɛnifit we i bin de spɛn tɛm wit machɔ Kristian dɛn? (Luk di futnot.)

⁶ Mak bin bɛnifit we i bin de spɛn tɛm wit machɔ Kristian dɛn. Afta Mak spɛn sɔm tɛm wit Pɔl na Rom, i bin go mit apɔsul Pita na Babilɔn. Bikɔs ɔf di tayt padi biznɛs we Mak ɛn Pita bin gɛt, Pita bin kɔl am “Mak . . . mi bɔypikin.” (1 Pit. 5:13) I go bi se we Mak ɛn Pita bin de wok togɛda, Pita bin tɛl dis in yɔŋ padi bɔku fayn tin dɛn bɔt Jizɔs in layf ɛn in prichin wok we Mak bin leta rayt bɔt insay in Gɔspɛl.a

7. Aw wan yɔŋ brɔda we nem Sɔŋ-Wu bin falamakata Mak in ɛgzampul? (Luk bak di pikchɔ.)

⁷ Mak bin bizi de wok fɔ Jiova ɛn de nia machɔ brɔda dɛn. Aw yu go falamakata Mak? Sɔntɛm yu go want fɔ du mɔ na Jiova in savis, lɛk fɔ bi ministerial savant ɔ ɛlda, bɔt yu stil nɔ kwalifay yet. If na so i bi, lɛ dat nɔ mek yu at pwɛl, bifo dat kɔntinyu fɔ luk fɔ tin dɛn we yu go du fɔ sav Jiova ɛn ɛp di kɔngrigeshɔn. Na dis bin apin to wan brɔda we nem Sɔŋ-Wu we na ɛlda naw. We i bin yɔŋ, i bin de kɔmpia insɛf wit ɔda yɔŋ brɔda dɛn. Di ɛlda dɛn bin pik sɔm pan di yɔŋ brɔda dɛn fɔ du mɔ wok dɛn na di kɔngrigeshɔn bifo am. Dis bin mek Sɔŋ-Wu in at pwɛl, ɛn as tɛm de go i bin tɛl machɔ brɔda dɛn bɔt aw i de fil. Wan ɛlda bin advays am fɔ du wetin i ebul fɔ ɛp ɔda pipul dɛn ilɛksɛf pipul dɛn nɔ notis di gud tin dɛn we i de du. Sɔŋ-Wu bin fala di advays, ɛn i bin stat fɔ ɛp brɔda ɛn sista dɛn we dɔn ol ɛn di wan dɛn we bin nid ɛp fɔ go na mitin. We i tink bɔt wetin bin apin, i tɔk se: “Dat bin mek a ɔndastand wetin i rili min fɔ wok fɔ ɔda pipul dɛn. A bin gɛt di kayn gladi-at we pɔsin de gɛt we i de ɛp ɔda pipul dɛn.”

FALAMAKATA TIMOTI—SHO SE YU RILI BISIN BƆT ƆDA PIPUL DƐN

8. Wetin mek Pɔl bin pik Timoti fɔ de travul wit am? (Filipians 2:19-22)

⁸ Pɔl bin nid brɔda dɛn we gɛt maynd fɔ travul wit am we i bin de go bak na siti dɛn usay dɛn bin dɔn mek i sɔfa. Fɔs, i bin pik Saylas we na brɔda we gɛt ɛkspiriɛns fɔ go wit am. (Akt 15:22, 40) Leta, Pɔl bin pik bak Timoti fɔ go wit am. Wetin mek Pɔl bin want fɔ go wit Timoti? Wan rizin na bikɔs di brɔda dɛn bin de tɔk fayn bɔt Timoti. (Akt 16:1, 2) I bin rili bisin bak bɔt pipul dɛn.​—Rid Filipians 2:19-22.

9. Aw Timoti bin sho se i rili bisin bɔt in brɔda ɛn sista dɛn?

⁹ Frɔm we Timoti ɛn Pɔl bigin fɔ wok togɛda, Timoti bin sho se i bisin mɔ bɔt ɔda pipul dɛn pas aw i bisin bɔt insɛf. Na dat mek Pɔl bin gɛt kɔnfidɛns fɔ lɛf am na Beria fɔ ɛnkɔrej di nyu disaypul dɛn we bin de de. (Akt 17:13, 14) We Timoti bin lɛf na Beria wit Saylas, i go mɔs dɔn bɛnifit frɔm Saylas in ɛgzampul. Bɔt leta, Pɔl bin sɛn Timoti in wangren na Tɛsalonayka fɔ go ɛp di Kristian dɛn na da siti de fɔ tinap tranga wan. (1 Tɛs. 3:2) Insay di nɛks 15 ia, Timoti bin lan fɔ “kray wit di wan dɛn we [bin] de kray,” ɛn fɔ sho sɔri-at to ɛnibɔdi we de sɔfa. (Rom. 12:15; 2 Tim. 1:4) Aw yɔŋ brɔda dɛn go falamakata Timoti?

10. Aw wan brɔda we nem Wu Je bin lan fɔ sho se i bisin mɔ bɔt ɔda pipul dɛn?

¹⁰ Wan brɔda we nem Wu Je bin lan fɔ sho se i bisin mɔ bɔt ɔda pipul dɛn. We in na bin yɔŋman, i nɔ bin izi fɔ mek i spɛn tɛm fɔ tɔk wit brɔda ɛn sista dɛn we dɔn ol. So i bin jɔs de grit dɛn na Kiŋdɔm Ɔl ɛn pas. Wan ɛlda bin advays Wu Je fɔ bigin tɔk wit di brɔda ɛn sista dɛn bay we i de tɛl dɛn wetin i lɛk bɔt dɛn. Di ɛlda bin ɛnkɔrej am bak fɔ tink bɔt wetin di ɔda pɔsin go lɛk fɔ tɔk bɔt. Wu Je bin fala dis advays we i bin de spɛn tɛm wit ɔda pipul dɛn. Naw in na ɛlda. I tɔk se: “Naw i izi fɔ mek a tɔk wit ɔlkayn pipul dɛn ilɛk ɔmɔs ia dɛn ol. A gladi bikɔs a ebul fɔ rili ɔndastand wetin de apin to ɔda pipul dɛn. Dis dɔn ɛp mi fɔ no wetin mi brɔda ɛn sista dɛn nid ɛn wetin a kin du fɔ ɛp dɛn.”

11. Aw yɔŋ brɔda dɛn go lan fɔ sho se dɛn bisin bɔt ɔda pipul dɛn na dɛn kɔngrigeshɔn? (Luk bak di pikchɔ.)

¹¹ Yɔŋ brɔda dɛn, unasɛf go ebul fɔ lan fɔ sho se una bisin bɔt ɔda pipul dɛn. We una de na mitin, una sho se una bisin bɔt di brɔda ɛn sista dɛn ilɛk dɛn yɔŋ ɔ ol. Aks dɛn aw dɛn de du ɛn lisin we dɛn de tɔk. As tɛm de go, yu go ebul no aw fɔ ɛp dɛn. Sɔntɛm yu go notis se wan ol brɔda ɛn in wɛf nid pɔsin fɔ ɛp dɛn fɔ sabi yuz di JW Library^® ap. Ɔ sɔntɛm yu go kam fɔ no se dɛn nɔ mek arenjmɛnt fɔ wok wit pɔsin na fil savis. Yu go ebul ɛp dɛn brɔda ɛn sista dɛn de fɔ sabi yuz dɛn ilɛktronik divays dɛn ɔ arenj fɔ wok wit dɛn na fil savis? We yu de ɛp yu brɔda ɛn sista dɛn dɛn we dɛn ya, yu go sɛt fayn ɛgzampul fɔ ɔlman na di kɔngrigeshɔn.

BƐNIFIT FRƆM DI FAYN ADVAYS WE PƆL BIN GI

12. Aw yɔŋ brɔda dɛn go bɛnifit frɔm di fayn advays we Pɔl bin gi Timoti?

¹² Pɔl bin gi Timoti fayn advays fɔ ɛp am fɔ gɛt mɔ gladi-at ɛn fɔ du in wok fayn fayn wan. (1 Tim. 1:18; 2 Tim. 4:5) Yɔŋ brɔda dɛn, unasɛf go ebul bɛnifit frɔm Pɔl in advays. Aw? Rid di tu lɛta dɛn we Pɔl bin rayt to Timoti lɛk se na yu i bin rayt dɛn to ɛn si us advays yu go aplay na yu layf. Lɛ wi tɔk bɔt sɔm ɛgzampul dɛn.

13. Wetin go ɛp yu fɔ kɔntinyu fɔ de biɛn Jiova?

¹³ “Tren yusɛf ɛn plan fɔ bi fetful to Gɔd.” (1 Tim. 4:7b) Wetin i min fɔ fetful to Gɔd? I min we pɔsin de biɛn Jiova ɛn rɛdi fɔ du ɔl wetin i ebul fɔ mek i gladi. Bikɔs wi nɔ bɔn wit dis kwaliti, wi nid fɔ tray fɔ gɛt am. Aw wi go du dat? Bɔku tɛm, dɛn kin yuz di wɔd we dɛn translet as “tren yusɛf” we dɛn de tɔk bɔt di tren we pɔsin we de du spɔt de tren tranga wan we i de rɛdi fɔ kɔmpitishɔn. Dɛn spɔtman dɛn de kin nid fɔ kɔntrol dɛnsɛf. Wisɛf nid fɔ tren wisɛf so dat wi go gɛt abit dɛn we go mek wi padi biznɛs wit Jiova tayt mɔ ɛn mɔ.

14. Wetin fɔ bi wi gol we wi de rid di Baybul? Gi ɛgzampul.

¹⁴ As yu de tray fɔ gɛt di abit fɔ de rid di Baybul, mɛmba se yu gol na fɔ kam nia Jiova mɔ ɛn mɔ. Fɔ ɛgzampul, we yu de rid di stori bɔt Jizɔs ɛn di yɔŋ jɛntriman, wetin i de tich yu bɔt Jiova? (Mak 10:17-22) Di yɔŋman bin biliv se na Jizɔs na di Mɛsaya, bɔt i nɔ bin gɛt fet fɔ fala am. Bɔt pan ɔl dat, Jizɔs bin “lɛk am.” Jizɔs bin tɔk fayn to di yɔŋ jɛntriman. Wi si klia wan se Jizɔs bin want mek i disayd fɔ du di rayt tin. Jizɔs bin de sho bak aw Jiova lɛk di yɔŋman. (Jɔn 14:9) As yu de tink bɔt dis akawnt ɛn di tin dɛn we de apin to yu, aks yusɛf, ‘Wetin a nid fɔ du fɔ kam nia Jiova mɔ ɛn mɔ ɛn fɔ wok tranga wan fɔ mi brɔda ɛn sista dɛn?’

15. Wetin mek yɔŋ brɔda fɔ pe atɛnshɔn to di ɛgzampul we i de sɛt? Gi ɛgzampul. (1 Timoti 4:12, 13)

¹⁵ “Bi ɛgzampul to di fetful wan dɛn.” (Rid 1 Timoti 4:12, 13.) Pɔl nɔ bin jɔs ɛnkɔrej Timoti fɔ sabi aw fɔ rid ɛn tich, bɔt i bin ɛnkɔrej am bak fɔ gɛt kwaliti dɛn lɛk lɔv, fet, ɛn fɔ liv klin layf. Wetin mek? Na bikɔs di tin dɛn we pɔsin de du impɔtant pas wetin i de tɔk. Imajin se yu gɛt asaynmɛnt fɔ gi tɔk na mitin bɔt aw wi fɔ gɛt zil fɔ du di prichin wok. Yu go gɛt mɔ kɔnfidɛns fɔ tɔk bɔt dis tɔpik if yu de du yu bɛst fɔ prich. Yu ɛgzampul go mek pipul dɛn rɛdi fɔ du wetin yu de ɛnkɔrej dɛn fɔ du.​—1 Tim. 3:13.

16. (a) Us fayv eria dɛn Kristian dɛn we yɔŋ fɔ bi ɛgzampul? (b) Aw yɔŋ brɔda go sɛt fayn ɛgzampul “bay di we aw [i] de tɔk”?

¹⁶ Pɔl bin tɔk bɔt fayv eria dɛn insay 1 Timoti 4:12 we yɔŋ brɔda go sɛt fayn ɛgzampul. Yu nɔ tink se i go fayn fɔ mek yu spɛn tɛm fɔ stɔdi bɔt dɛn wan bay wan? Fɔ ɛgzampul, lɛ wi se yu want fɔ sɛt fayn ɛgzampul “bay di we aw yu de tɔk.” Tink bɔt we dɛn aw yu go yuz di tin dɛn we yu de tɔk fɔ ɛnkɔrej ɔda pipul dɛn. If yu stil de na os wit yu mama ɛn papa, yu nɔ tink se i go fayn fɔ mek yu de tɛl dɛn tɛnki ɔltɛm fɔ di tin dɛn we dɛn de du fɔ yu? Afta mitin, yu nɔ tink se i go fayn fɔ tɛl pɔsin we bin gɛt pat na di mitin wetin yu lɛk bɔt di asaynmɛnt we i du? Sɔntɛm yu kin tray bak fɔ gi kɔmɛnt na mitin insay yu yon wɔd. Di tray we yu de tray tranga wan fɔ sɛt fayn ɛgzampul bay di we aw yu de tɔk go sho se yu de go bifo pan yu padi biznɛs wit Gɔd.​—1 Tim. 4:15.

17. Wetin go ɛp yɔŋ brɔda fɔ rich in spirichwal gol dɛn? (2 Timoti 2:22)

¹⁷ “Rɔnawe pan di tin dɛn we yɔŋ pipul dɛn kin want fɔ du, bɔt tray tranga wan fɔ de du wetin rayt.” (Rid 2 Timoti 2:22.) Pɔl bin ɛnkɔrej Timoti fɔ avɔyd ɛnitin we go mek i nɔ rich in spirichwal gol dɛn ɛn we go pwɛl in padi biznɛs wit Jiova. Sɔntɛm yu go kam fɔ notis se sɔm patikyula tin dɛn de we yu de du we nɔ bad, bɔt dɛn de mek yu nɔ gɛt bɛtɛ tɛm fɔ du spirichwal tin dɛn. Fɔ ɛgzampul, tink bɔt ɔmɔs tɛm yu de spɛn pan spɔt, di intanɛt, ɔ fɔ ple vidio gem dɛn. Yu go ebul yuz sɔm pan da tɛm de fɔ du mɔ fɔ Jiova ɛn yu brɔda ɛn sista dɛn? Sɔntɛm yu kin gri fɔ ɛp fɔ kia fɔ una Kiŋdɔm Ɔl ɔ fɔ du kat witnɛsin. If yu de du dɛn tin dɛn ya, yu go mɔs gɛt nyu padi dɛn we go ɛp yu fɔ sɛt spirichwal gol dɛn ɛn rich dɛn.

YU GO GƐT BƆKU BLƐSIN DƐN WE YU DE WOK FƆ JIOVA ƐN ƆDA PIPUL DƐN

18. Us blɛsin dɛn Mak ɛn Timoti bin gɛt?

¹⁸ Mak ɛn Timoti bin mek bɔku sakrifays dɛn fɔ du mɔ fɔ Jiova ɛn ɔda pipul dɛn, ɛn dat bin mek dɛn gɛt bɔku blɛsin dɛn. (Akt 20:35) Mak bin travul go difrɛn ples dɛn fɔ ɛp in brɔda ɛn sista dɛn. I bin rayt bak fayn tin dɛn bɔt Jizɔs in layf ɛn in prichin wok. Timoti bin ɛp Pɔl fɔ stat nyu kɔngrigeshɔn dɛn ɛn fɔ ɛp di brɔda ɛn sista dɛn fɔ tinap tranga wan. Wan dawt nɔ de se Jiova bin gladi fɔ di sakrifays dɛn we Mak ɛn Timoti bin mek.

19. Wetin mek yɔŋ brɔda dɛn fɔ pe atɛnshɔn to di advays we Pɔl bin gi Timoti? Wetin go apin we dɛn du dat?

¹⁹ Wi go ebul si klia wan aw Pɔl bin lɛk Timoti frɔm di tin dɛn we i rayt to am insay in lɛta dɛn. Dɛn lɛta dɛn de sho bak se Jiova rili lɛk una dɛn yɔŋ brɔda dɛn. I want mek bɛtɛ fala una. So du yu bɛst fɔ fala Pɔl in advays ɛn tray fɔ du mɔ fɔ Jiova ɛn yu brɔda ɛn sista dɛn. If yu du dat, yu go ɛnjɔy wɔndaful layf naw ɛn yu “go ol di rial layf wit tu an” we wi go ɛnjɔy tumara bambay.​—1 Tim. 6:18, 19.