Wetin Mek I Fayn fɔ Aks fɔ Advays?

1. Aw wi go ebul disayd fɔ du di rayt tin dɛn ɛn mek wetin wi plan fɔ du kɔmɔt fayn? (Prɔvabs 13:10; 15:22)

WI ƆL want fɔ disayd fɔ du di rayt tin dɛn. Ɛn wi ɔl want mek wi plan dɛn kɔmɔt fayn. Gɔd in Wɔd de sho wi aw wi go ebul fɔ rich dɛn gol dɛn de.—Rid Prɔvabs 13:10; 15:22.

2. Wetin Jiova prɔmis se i go du fɔ wi?

² As wi ɔl no, di bɛst Pɔsin we wi kin go to fɔ sɛns ɛn advays na wi Papa, Jiova. I dɔn prɔmis fɔ ɛp wi. I se: “A go gi yu advays, ɛn mi yay go de pan yu.” (Sam 32:8) Dɛn wɔd dɛn ya sho se Jiova nɔ jɔs de gi wi advays, bɔt dɛn de sho se i bisin bɔt wi ɛn i de ɛp wi fɔ fala in advays.

3. Wetin wi go tɔk bɔt insay dis atikul?

³ Insay dis atikul, wi go yuz Gɔd in Wɔd fɔ ɛp wi fɔ ansa 4 kwɛstyɔn dɛn: (1) Us kwaliti dɛn a fɔ gɛt if a want fɔ bɛnifit frɔm gud advays? (2) Udat go gi mi gud advays? (3) Aw a go sho se a rili want fɔ gɛt advays? (4) Wetin mek a fɔ avɔyd fɔ aks pipul dɛn fɔ disayd fɔ mi?

US KWALITI DƐN A FƆ GƐT?

4. Us kwaliti dɛn wi fɔ gɛt fɔ mek wi bɛnifit frɔm gud advays?

⁴ Fɔ mek wi go bɛnifit frɔm gud advays, wi fɔ put wisɛf dɔŋ ɛn gri se nɔto ɔltin wi no. Wi fɔ gri se sɔntɛnde wi nɔ kin gɛt di ɛkspiriɛns ɔ sɛns we wi nid fɔ disayd fɔ du di rayt tin dɛn fɔ wisɛf. If wi na pɔsin we nɔ de put insɛf dɔŋ ɛn gri se nɔto ɔltin wi no, Jiova nɔ go ebul fɔ ɛp wi. Dat go mek we wi rid Gɔd in Wɔd, wi nɔ go si nid fɔ fala di advays we i de gi wi. (Mayk. 6:8; 1 Pit. 5:5) Bɔt if wi na pɔsin we de put insɛf dɔŋ ɛn we no se nɔto ɔltin i no, i go izi fɔ mek wi fala di advays we de na di Baybul ɛn bɛnifit frɔm am.

5. Wetin na sɔm tin dɛn we Devid bin ebul fɔ du we fɔ dɔn mek i prawd?

⁵ Lɛ wi tɔk bɔt wetin wi go lan frɔm Kiŋ Devid in ɛgzampul. Di tin dɛn we i bin ebul fɔ du bin fɔ dɔn mek i prawd. Lɔng tɛm bifo i bi kiŋ, bɔku pipul dɛn bin sabi am bikɔs in na pɔsin we sabi siŋ. Dɛn bin ivin kɔl am fɔ ple myuzik fɔ di kiŋ. (1 Sam. 16:​18, 19) Afta dɛn pik Devid fɔ bi di nɛks kiŋ, Jiova bin gi am In oil spirit. (1 Sam. 16:​11-13) Pipul dɛn bin de prez am bikɔs i bin de kil dɛn ɛnimi dɛn, lɛk di Filistin dɛn jayant we na Golayat. (1 Sam. 17:​37, 50; 18:7) If pɔsin we prawd ebul fɔ du ɔl dɛn tin dɛn ya, sɔntɛm i go tink se i nɔ nid fɔ lisin to ɛnibɔdi fɔ advays. Bɔt nɔto da kayn pɔsin de Devid bin bi.

6. Aw wi no se Devid bin de lisin to advays? (Luk bak di frɔnt pej.)

⁶ Afta dɛn mek Devid kiŋ, i bin pik padi dɛn we de gi am advays. (1 Kro. 27:​32-34) Wi nɔ sɔprayz bikɔs bifo Devid bi kiŋ, i bin dɔn de lisin to gud advays. I nɔ bin jɔs de lisin to di advays we in kɔmpin man dɛn bin de gi am, bɔt i bin lisin we wan uman we nem Abigɛl advays am. Abigɛl bin mared to Nebal we na man we nɔ bin gɛt rɛspɛkt fɔ ɔda pipul dɛn, we nɔ bin gɛt tɛnki, ɛn we bin prawd. Bɔt Devid bin put insɛf dɔŋ ɛn fala di gud advays we Abigɛl bin gi am, ɛn dat bin mek i nɔ du sɔntin we i bin fɔ dɔn rigrɛt leta.—1 Sam. 25:​2, 3, 21-25, 32-34.

7. Us lɛsin dɛn wi kin lan frɔm Devid in ɛgzampul? (Ɛkliziastis 4:13) (Luk bak di pikchɔ dɛn.)

⁷ Wi kin lan sɔm lɛsin dɛn frɔm Devid in ɛgzampul. Fɔ ɛgzampul, i go bi se wi no aw fɔ du sɔntin fayn fayn wan ɔ dɛn put wi oba ɔda pipul dɛn. Bɔt wi nɔ fɔ ɛva tink se wi no ɔltin ɛn wi nɔ nid advays. Ɛn jɔs lɛk Devid, wi fɔ rɛdi fɔ lisin to gud advays, ilɛk udat gi wi am. (Rid Ɛkliziastis 4:13.) If wi du dat, i go pɔsibul fɔ lɛ wi nɔ mek big mistek dɛn we go mek wi ɛn ɔda pipul dɛn at pwɛl.

UDAT GO GI MI GUD ADVAYS?

8. Wetin mek Jonɛtan bin fit fɔ advays Devid?

⁸ Lɛ wi tɔk bɔt wan ɔda lɛsin we wi kin lan frɔm Devid in ɛgzampul. I bin de lisin to di advays we pipul dɛn we bin gɛt tayt padi biznɛs wit Jiova ɛn we rili ɔndastand di patikyula prɔblɛm we i bin gɛt bin de gi am. Fɔ ɛgzampul, we Devid bin want fɔ no if i go pɔsibul fɔ lɛ i mek pis wit Kiŋ Sɔl, i bin lisin to di advays we Jonɛtan we na Sɔl in bɔypikin bin gi am. Wetin mek Jonɛtan bin ebul fɔ gi Devid gud advays? Na bikɔs Jonɛtan nɔ bin jɔs gɛt tayt padi biznɛs wit Jiova, bɔt i bin sabi Sɔl gud gud wan. (1 Sam. 20:​9-13) Wetin dis tich wi?

9. Udat wi fɔ aks fɔ advays? Ɛksplen? (Prɔvabs 13:20)

⁹ We wi nid advays, i go fayn fɔ mek wi aks pɔsin we gɛt tayt padi biznɛs wit Jiova ɛn we no bɔt wi prɔblɛm.a (Rid Prɔvabs 13:20.) Fɔ ɛgzampul, lɛ wi se wan yɔŋ brɔda want fɔ luk fɔ sista fɔ mared. Udat go gi am gud advays? If i aks pɔsin we nɔ mared yet, di pɔsin go ebul gi am gud advays frɔm di Baybul. Bɔt di yɔŋ brɔda go ebul gɛt gud advays mɔ if i aks machɔ Kristian dɛn we dɔn mared we sabi am gud gud wan, ɛn we gɛt gladi-at na dɛn mared-os.

10. Wetin wi de kam tɔk bɔt?

¹⁰ Wi dɔn tɔk bɔt tu kwaliti dɛn we wi nid fɔ gɛt ɛn udat go ebul gi wi gud advays. Naw lɛ wi tɔk bɔt wetin mek wi fɔ sho se wi rili want advays ɛn if wi fɔ aks ɔda pipul dɛn fɔ disayd fɔ wi.

AW A GO SHO SE A RILI WANT ADVAYS?

11-12. (a) Wetin wi kin want fɔ du sɔntɛnde? (b) Wetin Kiŋ Rɛoboam bin du we i bin gɛt impɔtant tin fɔ disayd?

¹¹ Sɔntɛnde, pɔsin kin mek lɛk se i want advays, bɔt di tru na dat, i jɔs want fɔ no if ɔda pipul dɛn gri wit wetin i dɔn ɔlrɛdi disayd fɔ du. Da kayn pɔsin de nɔ rili want advays. I fɔ lan frɔm wetin bin apin to Kiŋ Rɛoboam.

¹² Rɛoboam bin bi kiŋ na Izrɛl afta in papa we na Kiŋ Sɔlɔmɔn day. We Rɛoboam bi kiŋ, di pipul dɛn bin gɛt bɔku gud tin dɛn, bɔt dɛn bin fil se Sɔlɔmɔn bin de tɛl dɛn fɔ du pas wetin dɛn ebul fɔ du. Di pipul dɛn bin go to Rɛoboam ɛn beg am fɔ mek i ridyus dɛn wok. Rɛoboam bin tɛl dɛn fɔ gi am tɛm fɔ tink bɔt wetin i go disayd. Fɔs, i bin aks di bigman dɛn we bin de ɛp Sɔlɔmɔn fɔ advays am. (1 Kiŋ 12:​2-7) Bɔt i nɔ bin fala di advays we dɛn bigman dɛn de bin gi am. Wetin go dɔn mek i du dat? Fɔ se Rɛoboam bin dɔn ɔlrɛdi disayd wetin i go du ɛn jɔs want pɔsin fɔ gri wit wetin i dɔn ɔlrɛdi disayd fɔ du? If na so i bi, i bin gɛt wetin i bin de luk fɔ. Di advays we di yɔŋman dɛn we dɛn ɔl gro ɔp bin gi am sho se dɛn gri wit wetin i bin dɔn ɔlrɛdi disayd fɔ du. (1 Kiŋ 12:​8-14) Rɛoboam tɛl di pipul dɛn wetin in padi dɛn bin advays am fɔ du. Bikɔs ɔf dat, di neshɔn bin sheb ɛn frɔm da tɛm de Rɛoboam bin de gɛt prɔblɛm ɔltɛm.—1 Kiŋ 12:​16-19.

13. Aw wi go no if wi rili want advays?

¹³ Wetin wi lan frɔm Rɛoboam in ɛgzampul? We wi aks fɔ advays, wi fɔ rili want am. Aw wi go no if wi want advays? Wi fɔ aks wisɛf dis kwɛstyɔn, ‘Fɔ se a kin aks fɔ advays ɛn disayd wantɛm wantɛm nɔ fɔ fala di advays bikɔs nɔto dat a want fɔ yɛri?’ Lɛ wi tɔk bɔt wan ɛgzampul.

14. We dɛn gi wi advays, wetin wi fɔ mɛmba? Gi wan ɛgzampul. (Luk bak di pikchɔ.)

¹⁴ Imajin se dɛn prɔmis fɔ gi wan brɔda wok we dɛn go pe am bɔku mɔni. Bɔt bifo i tek di wok, i aks wan ɛlda fɔ advays. Di brɔda tɛl di ɛlda se di wok go mek i lɛf in famili fɔ sɔm tɛm. Di ɛlda mɛmba di brɔda bɔt di Baybul prinsipul we sho se in men wok na fɔ mek shɔ se in famili gɛt tayt padi biznɛs wit Jiova. (Ɛfi. 6:4; 1 Tim. 5:8) Lɛ wi se di brɔda nɔ lɛk wetin di ɛlda tɛl am ɛn i disayd fɔ tɔk to difrɛn brɔda dɛn bɔt di wok te i gɛt pɔsin we tɛl am wetin i want fɔ yɛri. Fɔ se di brɔda rili want advays, ɔ i dɔn ɔlrɛdi disayd wetin fɔ du ɛn i jɔs de luk fɔ pɔsin we go gri wit wetin i dɔn disayd fɔ du? Wi fɔ mɛmba se wi at kin ful wi. (Jɛr. 17:9) Sɔntɛnde, di advays we wi nid nɔto in wi kin want fɔ yɛri.

FƆ SE A FƆ AKS ƆDA PIPUL DƐN FƆ DISAYD FƆ MI?

15. Wetin wi fɔ tek tɛm nɔ fɔ du? Wetin mek?

¹⁵ Wi ɔl gɛt di wok fɔ disayd fɔ wisɛf. (Gal. 6:​4, 5) Jɔs lɛk aw wi dɔn lan, pɔsin we gɛt sɛns go luk fɔ advays na di Baybul ɛn aks machɔ Kristian dɛn bifo i disayd wetin i go du. Bɔt wi fɔ tek tɛm mek wi nɔ aks ɔda pipul dɛn fɔ disayd fɔ wi. Sɔm pipul dɛn kin du dat bay we dɛn aks pɔsin we dɛn gɛt rɛspɛkt fɔ se, “Wetin yu go du if yu gɛt dis kayn prɔblɛm?” Ɔda pipul dɛn kin disayd fɔ du di sem tin we ɔda pɔsin bin disayd fɔ du ɛn nɔ tink fɔ dɛnsɛf.

16. Us prɔblɛm bin de na Kɔrint bɔt bif we dɛn sakrifays to aydɔl dɛn? Udat bin gɛt rayt fɔ disayd if dɛn fɔ it da kayn bif de? (1 Kɔrintians 8:7; 10:​25, 26)

¹⁶ Tink bɔt wetin bin apin we gɛt fɔ du wit bif we dɛn sakrifays to aydɔl dɛn na di kɔngrigeshɔn we bin de na Kɔrint insay di fɔstɛm Kristian dɛn tɛm. Pɔl bin tɛl dɛn Kristian dɛn de se: “Wi no se aydɔl na natin na di wɔl ɛn wi no se na wangren Gɔd de, no ɔda wan nɔ de.” (1 Kɔr. 8:4) Bikɔs ɔf wetin Pɔl bin tɔk, sɔm brɔda ɛn sista dɛn na di kɔngrigeshɔn bin disayd se dɛn go it bif we dɛn de sɛl na makit pan ɔl we sɔntɛm dɛn go dɔn sakrifays am to aydɔl dɛn. Ɔda wan dɛn bin disayd se dɛn nɔ go it da kayn bif de bikɔs i go ambɔg dɛn kɔnshɛns. (Rid 1 Kɔrintians 8:7; 10:​25, 26.) Dis na tin we pɔsin bin nid fɔ disayd fɔ insɛf. Pɔl nɔ bin ɛva advays di Kristian dɛn na Kɔrint fɔ disayd fɔ ɔda pipul dɛn ɔ fɔ du wetin dɛn kɔmpin dɛn bin de du. Ɔlman go “ansa fɔ insɛf to Gɔd.”—Rom. 14:​10-12.

17. Wetin go apin if wi jɔs de du wetin ɔda pipul dɛn de du? Gi wan ɛgzampul. (Luk bak di pikchɔ dɛn.)

¹⁷ Aw da sem kayn tin de kin apin tide? Fɔ ɛgzampul, lɛ wi tɔk bɔt blɔd frakshɔn dɛn. Ɔlman we na Kristian fɔ yuz in kɔnshɛns we di Baybul dɔn tren fɔ disayd fɔ insɛf if i go tek blɔd frakshɔn ɔ i nɔ go tek am.b Sɔntɛm i nɔ go izi fɔ mek wi ɔndastand dis tɔpik gud gud wan, bɔt di tin dɛn we wi de disayd bɔt aw fɔ yuz blɔd frakshɔn dɛn na pat pan di lod we wi fɔ tot fɔ wisɛf. (Rom. 14:4) If wi jɔs de du wetin ɔda pɔsin disayd fɔ du, sɔntɛm dat go mek wi kɔnshɛns wik. Wi go ebul fɔ tren wi kɔnshɛns ɛn mek i wok fayn bay we wi de yuz am. (Ibru. 5:14) So ustɛm wi fɔ aks machɔ Kristian fɔ advays? Na afta wi dɔn du wi yon risach ɛn wi stil nid ɛp fɔ ɔndastand aw Baybul prinsipul dɛn gɛt sɔntin fɔ du wit wetin wi want fɔ disayd.

KƆNTINYU FƆ AKS FƆ ADVAYS

18. Wetin Jiova dɔn du fɔ wi?

¹⁸ Jiova dɔn sho se i rili trɔst wi bay we i de alaw wi fɔ disayd wetin wi want fɔ du. I dɔn gi wi in Wɔd di Baybul. Ɛn i dɔn gi wi padi dɛn we gɛt sɛns, we de ɛp wi fɔ ɔndastand aw fɔ aplay Baybul prinsipul dɛn. I dɔn du di wok we i fɔ du as wi Papa. (Prɔv. 3:​21-23) Wetin wi go du fɔ sho se wi gladi fɔ di ɛp we Jiova de ɛp wi?

19. Aw wi go kɔntinyu fɔ mek Jiova gladi?

¹⁹ Tink bɔt dis: Mama ɛn papa dɛn kin gladi fɔ si we dɛn pikin dɛn de gro, bi pɔsin we gɛt sɛns, ɛn rɛdi fɔ ɛp ɔda pipul dɛn as dɛn de sav Jiova. Semweso, Jiova kin gladi we i de si se wi de kɔntinyu fɔ bi machɔ Kristian we de aks fɔ advays ɛn we de disayd fɔ du tin dɛn we de ɔnɔ Am.