Lan Aw fɔ Gi Ɔda Pipul dɛn Gud Advays

1. Udat fɔ gi advays? Ɛksplen.

YU LƐK fɔ advays ɔda pipul dɛn? Sɔm pipul dɛn kin gladi fɔ advays ɔda pipul dɛn. Bɔt ɔda pipul dɛn kin fred ɔ dɛn nɔ kin fil fayn we dɛn de advays ɔda pipul dɛn. Ilɛk aw i bi, wi ɔl kin nid fɔ gi advays to ɔda pipul dɛn wan wan tɛm. Wetin mek? Na bikɔs Jizɔs bin se pipul dɛn go no in tru tru disaypul dɛn bikɔs ɔf di lɔv we dɛn gɛt fɔ dɛnsɛf. (Jɔn 13:35) Ɛn wan we we wi go sho se wi lɛk wi brɔda ɛn sista dɛn na we wi de gi dɛn advays we nid de fɔ du am. Gɔd in Wɔd se wi go gɛt “tayt padi” biznɛs wit ɔda pipul dɛn we wi de gi dɛn “gud advays.”—Prɔv. 27:9.

2. Wetin ɛlda dɛn fɔ ebul du? Wetin mek? (Luk bak di bɔks we gɛt di taytul “We Ɛlda De Gi Advays na di Mitin we Wi Kin Gɛt Insay di Wik.”)

² Na ɛlda dɛn mɔ fɔ sabi aw fɔ gi gud advays to ɔda pipul dɛn. Jiova dɔn yuz Jizɔs fɔ pik dɛn man dɛn ya fɔ kia fɔ di kɔngrigeshɔn. (1 Pit. 5:2, 3) Wan we aw dɛn kin du dat na we dɛn de yuz di Baybul fɔ advays di brɔda ɛn sista dɛn we dɛn de gi tɔk dɛn. Dɛn kin gi advays bak to brɔda ɔ sista we dɛn si nid fɔ du am. Ɛn dɛn kin ɛp di wan dɛn we dɔn lɛf Jiova fɔ kam bak na di kɔngrigeshɔn. Aw ɛlda dɛn ɛn wi ɔl na di kɔngrigeshɔn go ebul fɔ gi gud advays?

3. (a) Aw wi go lan fɔ bi pɔsin we de gi gud advays to ɔda pipul dɛn? (Ayzaya 9:6; Luk bak di bɔks we gɛt di taytul “Falamakata Jizɔs We Yu De Gi Advays.”) (b) Wetin wi go tɔk bɔt insay dis atikul?

³ Wi go lan mɔ bɔt aw fɔ bi pɔsin we de gi gud advays bay we wi stɔdi bɔt pipul dɛn na di Baybul we bin sabi fɔ gi gud advays. Jizɔs bin de gi di bɛst advays ɔltɛm. Wan pan di taytul dɛn we i gɛt na “Wɔndaful Kanselɔ.” (Rid Ayzaya 9:6.) Insay dis atikul, wi go tɔk bɔt wetin wi go du we pɔsin aks wi fɔ advays ɛn wetin wi go du we wi nid fɔ gi advays pan ɔl we dɛn nɔ aks wi. Wi go tɔk bak bɔt wetin mek i impɔtant fɔ gi advays di rayt tɛm ɛn fɔ du am di rayt we.

WE PƆSIN AKS WI FƆ ADVAYS

4-5. We pɔsin aks wi fɔ advays, us kwɛstyɔn wi fɔ aks wisɛf fɔs? Gi wan ɛgzampul.

⁴ We pɔsin aks wi fɔ advays, wetin fɔs wi fɔ du? Sɔntɛm wi go gladi ɛn want fɔ ɛp wantɛm wantɛm. Bɔt fɔs, wi fɔ aks wisɛf, ‘A kwalifay fɔ gi advays bɔt da patikyula tin de?’ Sɔntɛnde, di bɛst we we wi kin ɛp na we wi nɔ gi di pɔsin advays bɔt wi sho am pɔsin we go ebul gi am advays bɔt da patikyula tin de.

⁵ Lɛ wi tɔk bɔt dis ɛgzampul. Lɛ wi se wi tayt padi gɛt siriɔs wɛlbɔdi prɔblɛm. I tɛl wi se i dɔn bigin fɔ du risach bɔt di difrɛn tritmɛnt dɛn we de, dɔn i aks wi fɔ tɛl am us tritmɛnt wi tink se go fayn fɔ am. Pan ɔl we yu go gɛt tritmɛnt we yu go want fɔ mek i tek, bɔt yu nɔto dɔktɔ ɔ yu nɔ sabi aw fɔ trit da kayn sik de. We tin lɛk dat apin, di bɛst we aw yu go ɛp yu padi na fɔ ɛp am fɔ luk fɔ pɔsin we kwalifay fɔ advays am.

6. Wetin mek i go fayn fɔ mek wi wet bifo wi gi advays?

⁶ Ilɛksɛf wi fil se wi kwalifay fɔ gi advays bɔt patikyula tin, wi kin disayd fɔ wet fɔ shɔt tɛm bifo wi ansa pɔsin we aks wi fɔ advays. Wetin mek? Prɔvabs 15:28 tɔk se “pɔsin we de du wetin rayt de tink bifo i ansa.” Wetin wi go du if wi tink se wi sabi di ansa? Wi kin stil tek sɔm tɛm fɔ du risach, pre, ɛn tink gud gud wan. Dat go mek wi gɛt mɔ kɔnfidɛns se di ansa we wi de gi gri wit wetin Jiova want. Lɛ wi tɔk bɔt prɔfɛt Netan in ɛgzampul.

7. Wetin yu lan frɔm prɔfɛt Netan in ɛgzampul?

⁷ Kiŋ Devid bin tɛl prɔfɛt Netan se i want fɔ bil tɛmpul fɔ Jiova. Wantɛm wantɛm Netan bin advays am fɔ bil am. Bɔt Netan bin fɔ dɔn wet smɔl ɛn aks Jiova fɔs. Wetin mek? Na bikɔs Jiova nɔ bin want lɛ Devid bil di tɛmpul. (1 Kro. 17:1-4) Jɔs lɛk aw wi si frɔm dis ɛgzampul, we pɔsin aks wi fɔ advays am, i go mek sɛns fɔ lɛ wi “slo fɔ tɔk.”—Jems 1:19.

8. Us ɔda rizin de we mek wi fɔ tek tɛm we wi de gi advays?

⁸ Lɛ wi tɔk bɔt wan ɔda rizin we mek wi fɔ tek tɛm we wi de advays pɔsin: If wi gi pɔsin advays ɛn bad tin apin, wisɛf go gɛt blem fɔ di bad tin we apin. Fɔ tru, wi gɛt gud rizin fɔ tek tɛm tink gud gud wan bifo wi gi advays.

WE WI DE GI ADVAYS PAN ƆL WE PƆSIN NƆ AKS WI

9. Wetin ɛlda dɛn fɔ shɔ bɔt bifo dɛn gi advays? (Galeshians 6:1)

⁹ Wan wan tɛm, ɛlda dɛn kin disayd fɔ gi advays to brɔda ɔ sista we dɔn bigin go na “di rɔng say.” (Rid Galeshians 6:1.) Wan stɔdi not fɔ dis vas tɔk se da kayn pɔsin de “dɔn bigin go na di rɔng say, pan ɔl we sɔntɛm i nɔ go dɔn kɔmit siriɔs sin yet.” Di ɛlda dɛn gol na fɔ ɛp di pɔsin fɔ kɔntinyu fɔ de na di rod we go mek i gɛt layf we go de sote go. (Jems 5:19, 20) Bɔt fɔ mek di advays we dɛn de gi go ɛp di pɔsin, dɛn fɔ mek shɔ se i dɔn ɔlrɛdi go na di rɔng say. Jiova de alaw wi ɔl fɔ yuz wi kɔnshɛns fɔ disayd wetin wi want fɔ du. (Rom. 14:1-4) Bɔt wetin go apin if brɔda ɔ sista go na di rɔng say ɛn di ɛlda dɛn disayd se dɛn nid fɔ advays am?

10-12. Wetin ɛlda dɛn fɔ du we dɛn de gi advays we pɔsin nɔ aks dɛn? Gi ɛgzampul. (Luk bak di pikchɔ dɛn.)

¹⁰ I nɔ kin izi fɔ ɛlda dɛn fɔ gi advays to pɔsin we nɔ aks dɛn. Wetin mek? Apɔsul Pɔl bin tɔk se pɔsin kin go di rɔng say ɛn i nɔ go ivin notis. So if di ɛlda dɛn want fɔ gi am advays, sɔntɛm i nɔ go ɔndastand wetin mek dɛn de advays am. Na dat mek bifo di ɛlda dɛn advays di pɔsin, dɛn nid fɔ du sɔm tin dɛn we go mek i rɛdi fɔ lisin.

¹¹ Fɔ gi advays we pɔsin nɔ aks yu tan lɛk we fama de tray fɔ plant na grɔn we strɔng. Bifo fama bigin fɔ plant, i de dig di grɔn ɛn rɛdi am fɔ plant. Dɔn i plant di sid. Faynali, i de wata di sid fɔ ɛp am fɔ gro. Semweso, bifo ɛlda gi advays we dɛn nɔ aks am fɔ gi, i go fayn fɔ mek i du sɔm tin dɛn we go mek i izi fɔ mek di brɔda ɔ sista lisin to di advays. Fɔ ɛgzampul, di ɛlda kin wet fɔ di rayt tɛm fɔ tɔk ɛn mek di brɔda ɔ sista no se i rili bisin bɔt am. If yu na pɔsin we de gi advays ɛn pipul dɛn no se yu na pɔsin we lɛk ɔda pipul dɛn ɛn yu gud, i go izi fɔ mek ɔda pipul dɛn lisin to yu advays.

¹² We di ɛlda ɛn di brɔda ɔ sista de tɔk, di ɛlda go mek am izi fɔ lɛ di brɔda ɔ sista tek di advays bay we i mɛmba am se ɔlman kin mek mistek ɛn sɔntɛnde wi ɔl nid advays. (Rom. 3:23) Di ɛlda go sho am klia wan frɔm di Baybul aw i dɔn bigin go di rɔng say, ɛn i go du am di kayn we we de sho se i nɔ vɛks ɛn i gɛt dip rɛspɛkt fɔ am. We di brɔda ɔ sista gri se i dɔn mek mistek, di ɛlda go “plant di sid” bay we i tek tɛm ɛksplen to am wetin i nid fɔ du fɔ tray fɔ kɔrɛkt in mistek. Faynali, di ɛlda go “wata” di sid bay we i tɛl di brɔda ɔ sista tɛnki ɛn pre wit am.—Jems 5:15

13. Aw ɛlda dɛn go mek shɔ se di pɔsin ɔndastand di advays we dɛn gi am?

¹³ Sɔntɛnde, wetin di pɔsin we de gi di advays de tɔk ɛn wetin di pɔsin we i de advays de yɛri na tu difrɛn tin. Wetin ɛlda dɛn go du fɔ mek dat nɔ apin? Dɛn go ebul tɔk bɔt di men pɔynt dɛn bay we dɛn tek tɛm aks di rayt kwɛstyɔn dɛn ɛn du am wi rɛspɛkt. (Ɛkli. 12:11) Di ansa dɛn go ɛp di ɛlda we de gi di advays fɔ mek shɔ se di pɔsin ɔndastand di advays we i dɔn gi am.

GI ADVAYS DI RAYT TƐM ƐN DI RAYT WE

14. Fɔ se wi fɔ gi advays di tɛm we wi vɛks? Ɛksplen.

¹⁴ Wi ɔl nɔ pafɛkt, so wi kin du ɔ tɔk tin dɛn we kin mek ɔda pipul dɛn vɛks. (Kol. 3:13) Gɔd in Wɔd tɔk se sɔntɛnde wi kin ivin du tin dɛn we kin mek ɔda pipul dɛn vɛks. (Ɛfi. 4:26) Bɔt wi fɔ tray tranga wan nɔ fɔ gi pɔsin advays we wi vɛks. Wetin mek? Bikɔs “mɔtalman in wamat nɔ de mek wetin rayt na Gɔd in yay apin.” (Jems 1:20) If wi advays pɔsin we wi at wam, sɔntɛm wi go mek di prɔblɛm wɔs. Dis nɔ min se wi nɔ fɔ ɛva mek di pɔsin we mek wi vɛks no aw wi de fil. Bɔt wi go ebul fɔ tɛl di pɔsin aw wi de fil if wi wet fɔ mek wi at kol. Notis di gud ɛgzampul we Ilayu bin sɛt we i de advays Job.

15. Wetin wi lan frɔm Ilayu in ɛgzampul? (Luk bak di pikchɔ.)

¹⁵ Ilayu bin tek sɔm dez de lisin we Job bin de difɛnd insɛf we in tri lay lay padi dɛn bin de tɔk lay lay tin dɛn bɔt am. Ilayu bin sɔri fɔ Job. Bɔt i bin vɛks bak pan Job bikɔs Job bin de tɔk tin dɛn bɔt Jiova we nɔto tru ɛn i bin de pe tumɔs atɛnshɔn to insɛf. Pan ɔl dat, Ilayu bin wet fɔ in tɔn fɔ tɔk ɛn i bin tek tɛm tɔk ɛn sho dip rɛspɛkt we i bin de advays Job. (Job 32:2; 33:1-7) Ilayu in ɛgzampul de tich wi wan impɔtant tin: I kin fayn fɔ gi advays di rayt tɛm ɛn di rayt we, ɛn wi fɔ sho se wi gɛt rɛspɛkt fɔ di pɔsin ɛn wi lɛk am.—Ɛkli. 3:1, 7.

KƆNTINYU FƆ GI ƐN LISIN TO ADVAYS

16. Us lɛsin yu lan frɔm Sam 32:8?

¹⁶ Di tim skripchɔ fɔ dis atikul tɔk se ‘Jiova de gi wi advays ɛn in yay de pan wi.’ (Rid Sam 32:8.) Dis sho se i de kɔntinyu fɔ sɔpɔt wi. I nɔ jɔs de gi wi advays, bɔt i de ɛp wi bak fɔ fala di advays we i de gi wi. Dat na fayn ɛgzampul fɔ wi! We wi gɛt di ɔnɔ fɔ advays ɔda pipul dɛn, wi kin falamakata Jiova bay we wi kɔntinyu fɔ ɛnkɔrej dɛn ɛn ɛp dɛn fɔ disayd fɔ du di rayt tin dɛn.

17. Aw ɛlda dɛn kin mek wi fil we dɛn gi wi advays frɔm di Baybul? (Ayzaya 32:1, 2)

¹⁷ I impɔtant naw pas ɛni ɔda tɛm fɔ mek wi gi ɛn lisin to gud advays. (2 Tim. 3:1) Ɛlda dɛn we de yuz di Baybul fɔ gi advays “tan lɛk watasay dɛn na land we wata nɔ de.” (Rid Ayzaya 32:​1, 2.) Padi dɛn we no wetin wi want fɔ yɛri, bɔt tɛl wi wetin wi nid fɔ yɛri de gi wi gift we rili valyu lɛk “gold apul na silva sɛtin.” (Prɔv. 25:11) Lɛ wi ɔl kɔntinyu fɔ gɛt di sɛns we wi nid fɔ gi ɛn lisin to gud advays.