Lan Aw fɔ Pre to Jiova wit Ɔl Yu At

1-2. (a) Wetin kin mek wi nɔ pre to Jiova wit ɔl wi at? (b) Aw wi no se Jiova kin tek tɛm lisin to wi prea dɛn?

FƆ SE sɔntɛnde yu kin fil se na di sem tin dɛn yu kin tɔk we yu de pre, ɔ yu nɔ de rili tɛl Jiova aw yu de fil? Ɔ yu kin jɔs pre bikɔs yu tink se na sɔntin we yu fɔ du? If na so i bi, mɛmba se nɔto yu wangren dat de apin to. Bikɔs wi bizi, sɔntɛm wi go jɔs rɔsh we wi de pre. Ɔ sɔntɛm i nɔ kin izi fɔ mek wi pre to Jiova ɛn tɛl am aw wi de fil bikɔs wi de tink se wi nɔ fit fɔ pre to am.

² Di Baybul ɛp wi fɔ no se di tin we impɔtant to Jiova na we wi de pre to am wit ɔl wi at, nɔto di fayn wɔd dɛn we wi de yuz we wi de pre. I de “yɛri wetin di wan dɛn we ɔmbul de aks fɔ.” (Sam 10:17) I kin tek tɛm lisin to ɔl wetin wi de se bikɔs i rili bisin bɔt wi.—Sam 139:​1-3.

3. Us kwɛstyɔn dɛn wi go tɔk bɔt insay dis atikul?

³ Sɔntɛm wi go aks wisɛf dɛn kwɛstyɔn dɛn ya: Wetin mek wi nɔ fɔ fred fɔ tɛl Jiova aw wi de fil? Aw wi go pre di kayn we we go mek wi kam nia Jiova mɔ ɛn mɔ? We wi de tink bɔt di prea dɛn we de na di Baybul, aw dat go ɛp wi fɔ lan fɔ pre wit ɔl wi at? Ɛn wetin wi go du if wi at pwɛl pasmak ɛn wi nɔ ebul fɔ tɛl Jiova aw wi de fil? Lɛ wi tɔk bɔt di ansa dɛn to dɛn kwɛstyɔn dɛn ya.

NƆ FRED FƆ PRE TO JIOVA?

4. Wetin go mek wi nɔ fred fɔ pre to Jiova? (Sam 119:145)

⁴ We wi ɔndastand se Jiova na padi we nɔ de kɔmɔt biɛn wi ɛn i want mek bɛtɛ fala wi, dat go mek wi nɔ fred fɔ pre to am ɛn tɛl am wetin wi de tink ɛn aw wi de fil. Na da kayn padi biznɛs de di pɔsin we rayt Sam 119 bin tray fɔ gɛt wit Jiova. I bin de gɛt prɔblɛm dɛn. Sɔm pipul dɛn bin de tɔk lay lay tin dɛn bɔt am. (Sam 119:​23, 69, 78) Ɛn sɔntɛnde in at bin de pwɛl bikɔs ɔf di mistek dɛn we i bin de mek. (Sam 119:5) Bɔt pan ɔl dat, i nɔ bin de fred fɔ tɛl Jiova aw i de fil.—Rid Sam 119:145.

5. Wetin mek wi nɔ fɔ alaw di bad we aw wi de fil fɔ mek wi nɔ pre to Jiova? Gi ɛgzampul.

⁵ Jiova want ivin di wan dɛn we dɔn kɔmit siriɔs sin fɔ pre to am. (Ayz. 55:​6, 7) So wi nɔ fɔ alaw di bad we aw wi de fil fɔ mek wi nɔ pre to Jiova. Fɔ ɛgzampul, imajin se yu go waka na say we yu nɔ wande go. Dɔn yu mis rod ɔ yu lɔs. Bɔt pɔsin we de na di eria go ebul ɛp yu fɔ no usay fɔ go. Fɔ se yu go fred fɔ aks da pɔsin de bikɔs yu de shem fɔ tɔk se yu dɔn lɔs? Nɔ, yu nɔ go du dat! Semweso, ilɛksɛf wi nɔ no wetin fɔ du ɔ wi dɔn kɔmit sin, wi nɔ fɔ fred fɔ pre to Jiova.—Sam 119:​25, 176.

AW WI GO PRE DI KAYN WE WE GO MEK WI KAM NIA JIOVA MƆ ƐN MƆ?

6-7. We wi de pre to Jiova, wetin go ɛp wi fɔ tɛl am aw wi de rili fil? Gi wan ɛgzampul. (Luk bak di futnot.)

⁶ We wi de pre to Jiova ɛn tɛl am wetin wi de tink ɛn aw wi de fil, dat go mek wi padi biznɛs wit am tayt mɔ ɛn mɔ. So wetin go ɛp wi fɔ pre to Jiova dis kayn we?

⁷ Tink bɔt di kwaliti dɛn we Jiova gɛt.a Di mɔ we wi de tink bɔt Jiova in kwaliti dɛn, na di mɔ wi go fil fri fɔ tɛl am wetin wi de tink ɛn aw wi de fil. (Sam 145:​8, 9, 18) Lɛ wi tɔk bɔt wan sista we nem Kristin in ɛgzampul, we in papa bin lɛk fɛt-fɛt. I tɔk se: “I nɔ bin izi fɔ mek a tɔk to Jiova lɛk se na mi Papa. A bin de fil se di mistek dɛn we a bin de mek go mek i nɔ lɛk mi.” Us kwaliti Jiova gɛt we bin ɛp am? I tɔk se: “Bikɔs a no se Jiova in lɔv nɔ de chenj, dat mek a gɛt kɔnfidɛns se i lɛk mi. A bin no se i go de wit mi ɔltɛm. Ilɛksɛf a mek mistek, i go kɔntinyu fɔ lɛk mi ɛn ɛp mi. Dis de ɛp mi fɔ tɛl am di we aw a de fil, ilɛksɛf mi at pwɛl ɔ a gladi.”

8-9. Wetin na sɔm bɛnifit dɛn we wi de gɛt we wi tink bɔt wetin wi want fɔ pre to Jiova bɔt bifo wi pre? Gi ɛgzampul.

⁸ Tink bɔt wetin yu go se. I go fayn fɔ mek yu aks yusɛf sɔm kwɛstyɔn dɛn bifo yu pre. Fɔ ɛgzampul: ‘Us patikyula prɔblɛm dɛn a gɛt rayt naw? Ɛnibɔdi de we a nid fɔ fɔgiv? Ɛnitin dɔn apin to mi dis biɛn tɛm we a nid Jiova fɔ ɛp mi wit?’ (2 Kiŋ 19:​15-19) Di ɔda tin we wi kin du na fɔ fala di we aw Jizɔs bin tich wi fɔ pre bay we wi de tink bɔt wetin wi go se we wi de pre to Jiova bɔt In nem, In Kiŋdɔm, ɛn wetin I want.—Mat. 6:​9, 10.

⁹ We wan sista we nem Aliska bin kam fɔ no se in man nɔ gɛt bɛtɛ tɛm fɔ liv igen bikɔs i gɛt bren kansa, i nɔ bin izi fɔ mek i pre. I tɔk se: “Mi at bin so pwɛl dat we a bigin fɔ pre, a nɔ bin ivin ebul tink bɔt wetin fɔ se.” Wetin bin ɛp am? I tɔk se: “A kin tek smɔl tɛm fɔ tink bɔt wetin a want fɔ se bifo a pre, ɛn dis dɔn ɛp mi fɔ mek shɔ se we a de pre a nɔ fɔ jɔs pe atɛnshɔn to misɛf. We a du dis, i de ɛp mi fɔ mek a nɔ wɔri ɛn ebul pre to Jiova bɔt difrɛn tin dɛn.”

10. Wetin mek wi fɔ tray fɔ spɛn mɔ tɛm fɔ pre? (Luk bak di pikchɔ dɛn.)

¹⁰ Spɛn mɔ tɛm fɔ pre. Pan ɔl we wi kin stil kam nia Jiova we wi pre fɔ shɔt tɛm, wi go ebul fɔ rili tɛl am aw wi de fil we wi spɛn mɔ tɛm fɔ pre to am.b Aliska in man we nem Ilayja tɔk se: “A kin tray fɔ pre bɔku tɛm insay di de, ɛn mi padi biznɛs wit Jiova dɔn tayt mɔ ɛn mɔ bikɔs a kin spɛn lɔng tɛm fɔ pre to am. Jiova de peshɛnt lisin to mi we a de pre to am, so a kin tek mi tɛm fɔ pre.” Tray fɔ du dis: Fɛn tɛm ɛn ples we yu go ebul fɔ pre, sɔntɛm say we yu go ivin pre lawd wan, we natin nɔ go ambɔg yu, ɛn gɛt di abit fɔ de spɛn mɔ tɛm fɔ pre.

TINK BƆT DI PREA DƐN WE DE NA DI BAYBUL

11. Aw wi de bɛnifit we wi tink bɔt di prea dɛn we de na di Baybul? (Luk bak di bɔks we gɛt di taytul “Yu De Fil di Sem We Lɛk Dɛn?”)

¹¹ Yu go bɛnifit bak we yu tink bɔt Jiova in savant dɛn prea dɛn, siŋ dɛn, ɔ sam dɛn we de na di Baybul. As yu de rid bɔt aw Gɔd in savant dɛn bin de tɛl am ɔl wetin de na dɛn at, dat go mek yusɛf du di sem tin. Sɔntɛm dɛn prea dɛn go ɛp yu bak fɔ lan nyu wɔd dɛn we yu go yuz we yu de pre. Ɛn sɔntɛm yu go fɛn prea dɛn we gɛt sɔntin fɔ du wit wetin de apin to yu.

12. Us kwɛstyɔn dɛn wi kin aks wisɛf we wi de rid wan patikyula prea na di Baybul?

¹² We yu de rid wan patikyula prea we de na di Baybul, yu kin aks yusɛf dɛn kwɛstyɔn dɛn ya: ‘Udat tɔk dɛn wɔd dɛn ya ɛn wetin bin de apin to am? Di wɔd dɛn we de na dis prea fiba wetin de apin to mi? Us lɛsin dɛn a lan frɔm di prea?’ Sɔntɛm yu go nid fɔ du mɔ risach fɔ gɛt ansa to dɛn kwɛstyɔn dɛn ya, bɔt yu go bɛnifit we yu du am. Lɛ wi tɔk bɔt sɔm ɛgzampul dɛn.

13. Us lɛsin wi lan bɔt prea frɔm Ana in ɛgzampul? (1 Samiɛl 1:​10, 11) (Luk bak di di frɔnt pej.)

¹³ Rid 1 Samiɛl 1:​10, 11. Dis patikyula tɛm we Ana bin de pre, i bin gɛt tu big prɔblɛm dɛn we bin de mɔna am. I nɔ bin ebul bɔn pikin ɛn in met bin de mek layf nɔ izi fɔ am. (1 Sam. 1:​4-7) If yu gɛt prɔblɛm we de mek layf nɔ izi fɔ yu, wetin yu go lan frɔm Ana in prea? In at bin kol ɛn i bin lɛf fɔ wɔri afta i spɛn lɔng tɛm fɔ pre to Gɔd ɛn tɛl am ɔl wetin de nain at. (1 Sam. 1:​12, 18) Wisɛf go lɛf fɔ wɔri we wi “lɛf wetin de mɔna [wi] na Jiova in an” bay we wi de tɛl am aw wi de fil bɔt di patikyula prɔblɛm we de mɔna wi.—Sam 55:22.

14. (a) Wetin bak wi kin lan frɔm Ana in ɛgzampul? (b) We wi tink gud gud wan bɔt di prea dɛn we de na di Baybul, aw dat go ɛp wi fɔ no wetin fɔ tɔk we wi de pre? (Luk di futnot.)

¹⁴ We Ana pul Samiɛl pan bɔbi, i go wit am to Ay Prist Ilay. (1 Sam. 1:​24-28) I bin pre to Jiova ɛn tɛl am tɛnki bikɔs i dɔn si se Jiova de protɛkt in fetful savant dɛn ɛn kia fɔ dɛn.c (1 Sam. 2:​1, 8, 9) I go bi se di prɔblɛm dɛn we Ana bin de gɛt nɔ bin dɔn, bɔt i bin pe atɛnshɔn to di we aw Jiova bin de blɛs am. Us lɛsin wi lan frɔm dis? Wi go ebul fɔ kɔntinyu fɔ bia wit wi prɔblɛm dɛn if wi pe atɛnshɔn to di we aw Jiova dɔn de ɛp wi te naw.

15. We dɛn nɔ trit wi fia wan, wetin wi go lan frɔm Prɔfɛt Jɛrimaya in prea? (Jɛrimaya 12:1)

¹⁵ Rid Jɛrimaya 12:1. Jɛrimaya in at bin pwɛl we i si sɔm pipul dɛn de du bad tin dɛn, ɛn i bin tan lɛk se ɔltin fayn fɔ dɛn. In at bin pwɛl bak bikɔs in kɔmpin Izrɛlayt dɛn nɔ bin de trit am fayn. (Jɛr. 20:​7, 8) Wi ɔndastand di we aw i bin de fil bikɔs pipul dɛn kin provok wi, ɛn wi de si pipul dɛn we nɔ ɔnɛs de go bifo na layf. Pan ɔl we Jɛrimaya bin tɔk bɔt aw in at pwɛl bikɔs ɔf wetin bin de apin, i nɔ bin ɛva dawt se Jiova de du tin tret. We i si aw Jiova bin pɔnish In trangayes pipul dɛn, dat bin mek i gɛt mɔ kɔnfidɛns se Jiova na Gɔd we de du tin tret. (Jɛr. 32:19) Wisɛf fɔ fil fri fɔ tɛl Jiova aw di bad tin dɛn we de apin de mek wi fil ɛn biliv se we di rayt tɛm rich, i go du sɔntin fɔ kɔrɛkt dɛn.

16. Wetin wi kin lan frɔm wan Livayt in prea? (Sam 42:​1-4) (Luk bak di pikchɔ dɛn.)

¹⁶ Rid Sam 42:​1-4. Na wan Livayt we bin de na ɛgzayl we nɔ bin ebul fɔ wɔship Jiova na di tɛmpul wit in kɔmpin dɛn bin rayt dis siŋ. Di sam we i rayt de sho aw i bin de fil. Sɔntɛm wi go ebul ɔndastand di we aw i bin de fil if wi nɔ ebul kɔmɔt na wi os bikɔs wi sik, ɔ dɛn put wi na prizin bikɔs ɔf wi fet. Sɔntɛnde wi kin fil fayn ɛn ɔda tɛm dɛn wi at kin rili pwɛl. Bɔt ilɛk aw wi de fil, i go fayn fɔ mek wi tɛl Jiova. Dis go ɛp wi fɔ ɔndastand aw wi de fil ɛn mɛmba wetin rili impɔtant. Fɔ ɛgzampul, di Livayt bin kam fɔ no se i go gɛt ɔda chans dɛn fɔ prez Jiova. (Sam 42:5) I bin tink bak bɔt aw Jiova de kia fɔ am. (Sam 42:8) We wi de pre to Gɔd wit ɔl wi at, dat go ɛp wi fɔ ɔndastand di we aw wi de fil, ɛp wi fɔ tink di rayt we, ɛn gɛt di trɛnk we wi nid fɔ bia.

17. (a) Wetin wi go lan frɔm Prɔfɛt Jona in prea? (Jona 2:​1, 2) (b) Aw sɔm wɔd dɛn we de na di Sam buk kin ɛp wi we wi gɛt prɔblɛm dɛn? (Luk di futnot.)

¹⁷ Rid Jona 2:​1, 2. Jona pre to Jiova ɛn tɔk dɛn wɔd dɛn ya we i bin de insay di big fish in bɛlɛ. Pan ɔl we Jona nɔ bin obe Jiova, i bin gɛt kɔnfidɛns se Jiova go yɛri in prea. We Jona bin de pre, i bin yuz bɔku wɔd dɛn we de na di Sam dɛn.d I go bi se i bin sabi dɛn Sam dɛn de gud gud wan. So we i tink bɔt dɛn, dat bin mek i no se Jiova go ɛp am. Semweso, if wi tray fɔ sabi sɔm vas dɛn na di Baybul ɔfɛd, wi go ebul mɛmba dɛn, ɛn dɛn go kɔrej wi we wi de pre to Jiova di tɛm dɛn we wi gɛt prɔblɛm.

KƆNTINYU FƆ KAM NIA JIOVA BAY WE YU DE PRE TO AM

18-19. If sɔntɛnde i nɔ kin izi fɔ tɛl Jiova aw wi de fil, aw di wɔd dɛn we de na Romans 8:​26, 27 go kɔrej wi? Gi wan ɛgzampul.

¹⁸ Rid Romans 8:​26, 27. Sɔntɛnde bikɔs wi kin wɔri pasmak, wi nɔ kin ebul fɔ tɛl Jiova aw wi de fil. Bɔt dat nɔ fɔ mek wi at pwɛl. Bikɔs dɛn tɛm dɛn de, Gɔd in oli spirit kin “beg” fɔ wi. Wetin dat min? I min se Jiova bin yuz in spirit fɔ mek dɛn rayt bɔku prea dɛn na di Baybul. So we wi nɔ ebul tɔk aw wi de fil, Jiova kin si dɛn prea dɛn de as prea we kɔmɔt frɔm wi, ɛn i kin ansa dɛn.

¹⁹ Na dis bin ɛp wan sista we de na Rɔshia we nem Yelena. Dɛn bin arɛst am bikɔs i de pre ɛn rid di Baybul. Yelena bin rili strɛs ɛn i nɔ bin izi fɔ mek i pre. I tɔk se: “A bin mɛmba se ɛnitɛm a wɔri ɛn nɔ no wetin fɔ tɔk we a de pre, Jiova go si di wɔd dɛn we in fetful savant dɛn trade bin de tɔk we dɛn de pre . . . as wɔd dɛn we misɛf go want fɔ tɔk. . . . Dis bin kɔrej mi di tɛm we tin nɔ bin rili izi.”

20. Aw wi go rɛdi wi maynd fɔ pre we wi strɛs?

²⁰ We wi strɛs, i nɔ kin izi fɔ mek wi pe atɛnshɔn we wi de pre. Wetin go ɛp wi? Wi kin lisin to di odio rɛkɔdin fɔ di Sam buk. Wi kin tray bak fɔ rayt di we aw wi de fil lɛk aw Kiŋ Devid bin du. (Sam 18, 34, 142; di ɛdin dɛn.) Bɔt no lɔ nɔ de bɔt aw fɔ rɛdi wisɛf fɔ pre. (Sam 141:2) Du wetin yu tink se fayn fɔ yu.

21. Wetin mek wi kin pre to Jiova wit ɔl wi at?

²¹ We wi no se Jiova de ɔndastand aw wi de fil ivin bifo wi tɔk ɛnitin, dat de rili kɔrej wi. (Sam 139:4) Bɔt i want fɔ yɛri we wi de tɛl am aw wi de fil ɛn aw wi rili abop pan am. So nɔ fred fɔ pre to yu Papa we de na ɛvin. Lan frɔm di prea dɛn we de nain Wɔd. Pre wit ɔl yu at. Tɛl am wetin de mek yu gladi ɛn wetin de mek yu at pwɛl. Bikɔs Jiova na yu tru tru Padi, i rɛdi fɔ ɛp yu ɔltɛm!