Mɛmba fɔ Pre fɔ Ɔda Pipul Dɛn

1. Aw wi no se wi prea dɛn impɔtant to Jiova?

PREA na wɔndaful gift. Tink bɔt dis: Jiova gi in enjɛl dɛn patikyula wok dɛn fɔ du. (Sam 91:11) I dɔn gi in Pikin bak impɔtant wok dɛn fɔ du. (Mat. 28:18) Bɔt udat i gi di wok fɔ lisin to wi prea dɛn? I nɔ gi nɔbɔdi da wok de, nain wangren gɛt da wok de. Jiova “we de yɛri prea,” de lisin to wi.—Sam 65:2.

2. Aw apɔsul Pɔl sɛt fayn ɛgzampul fɔ pre fɔ ɔda pipul dɛn?

² Pan ɔl we i nɔ bad fɔ pre to Jiova bɔt di tin dɛn we de mɔna wi, wi fɔ pre bak fɔ ɔda pipul dɛn. Na dat apɔsul Pɔl bin du. Fɔ ɛgzampul, i bin pre fɔ di kɔngrigeshɔn na Ɛfisɔs ɛn tɛl dɛn se: “A de kɔntinyu fɔ pre fɔ una we a de pre.” (Ɛfi. 1:16) Pɔl bin de pre fɔ pipul dɛn bak wan bay wan. Fɔ ɛgzampul, i bin tɛl Timoti se: “A de tɛl Gɔd tɛnki, . . . ɛn a nɔ de ɛva stɔp fɔ mɛmba yu we a de rili beg Gɔd de ɛn nɛt.” (2 Tim. 1:3) Pɔl bin gɛt in yon prɔblɛm dɛn we i bin nid fɔ pre bɔt. (2 Kɔr. 11:23; 12:​7, 8) Bɔt stil, i bin de mek tɛm fɔ pre fɔ ɔda pipul dɛn.

3. Wetin kin mek wi fɔgɛt fɔ pre fɔ ɔda pipul dɛn?

³ Sɔntɛnde wi kin fɔgɛt fɔ pre fɔ ɔda pipul dɛn. Wetin mek? Wan sista we nem Sabrinaa gi wan rizin we mek dat kin apin. I tɔk se: “Wi kin gɛt bɔku tin dɛn fɔ du. Wi kin pe atɛnshɔn tumɔs pan wi yon prɔblɛm dɛn, ɛn dat kin mek we wi de pre, wi kin jɔs pre fɔ wisɛf.” Yu dɔn notis se dis kayn tin de apin to yu? If na so i bi, dis atikul go ɛp yu. I go tɔk bɔt (1) wetin mek i impɔtant fɔ pre fɔ ɔda pipul dɛn ɛn (2) aw yu go ebul du dat.

WETIN MEK WI FƆ PRE FƆ ƆDA PIPUL DƐN?

4-5. Aw di pre we wi de pre fɔ ɔda pipul dɛn “rili gɛt pawa”? (Jems 5:16)

⁴ We wi pre fɔ ɔda pipul dɛn, “dat rili gɛt pawa.” (Rid Jems 5:16.) Fɔ se di pre we wi de pre fɔ ɔda pipul dɛn go ɛp fɔ chenj wetin de apin to dɛn? Yɛs, i kin ɛp. Fɔ ɛgzampul, bikɔs Jizɔs bin no se i nɔ go te apɔsul Pita go dinay am, i bin tɔk se: “A dɔn rili beg Gɔd so dat yu nɔ go lɛf fɔ gɛt fet.” (Lyuk 22:32) Pɔl bak bin no se prea kin ɛp fɔ chenj wetin de apin to pɔsin. We i bin de na prizin na Rom bikɔs dɛn lay pan am, i bin rayt lɛta to Faylimɔn ɛn tɛl am se: “A de op se di pre we una de pre fɔ mi go mek a kam bak to una.” (Fay. 22; luk di stɔdi not, “for I am hoping that through your prayers.”) Ɛn na dat bin apin. I nɔ te, dɛn bin pul Pɔl na prizin ɛn i bin ebul fɔ bigin prich bak.

⁵ Bɔt dis nɔ min se wi ebul fos Jiova fɔ du sɔntin we wi pre to am. I kin notis di we aw in savant dɛn rili want di tin we dɛn de pre fɔ, ɛn sɔntɛnde i kin disayd fɔ du wetin dɛn de pre fɔ. We wi no dat, i de ɛp wi fɔ pre to Jiova wit ɔl wi at bɔt wetin de apin ɛn lɛf ɔltin nain an bikɔs wi no se i go du sɔntin bɔt am.—Sam 37:5; luk 2 Kɔrintians 1:11 ɛn di stɔdi not dɛn.

6. Aw di pre we wi de pre fɔ ɔda pipul dɛn kin afɛkt aw wi de fil bɔt dɛn? (1 Pita 3:8)

⁶ We wi de pre fɔ ɔda pipul dɛn, dat go ɛp wi fɔ “rili sho se [wi] gɛt sɔri-at.” (Rid 1 Pita 3:8.) Pɔsin we gɛt sɔri-at kin notis we ɔda pɔsin de sɔfa, ɛn i kin want fɔ du sɔntin fɔ ɛp am. (Mak 1:​40, 41) Wan ɛlda we nem Maykɛl tɔk se: “We a kin pre bɔt wetin ɔda pipul dɛn nid, dat kin ɛp mi fɔ ɔndastand wetin de apin to dɛn ɛn i kin mek a lɛk dɛn mɔ. A kin fil lɛk se dɛn na mi tayt padi dɛn, pan ɔl we sɔntɛm dɛn nɔ go no.” Wan ɛlda we nem Richad tɔk bɔt wan ɔda bɛnifit. I tɔk se: “We wi kin pre fɔ pɔsin, i kin mek wi want fɔ du sɔntin fɔ ɛp am.” I tɔk bak se: “We wi de ɛp di pɔsin wit wetin i nid, i kin tan lɛk se wi de alaw Jiova fɔ yuz wi fɔ ansa di pre we wi dɔn pre fɔ di pɔsin.

7. We wi de pre fɔ ɔda pipul dɛn, aw dat go ɛp wi fɔ si wi prɔblɛm dɛn di rayt we? (Filipians 2:​3, 4) (Luk bak di pikchɔ dɛn.)

⁷ We wi de pre fɔ ɔda pipul dɛn, dat de ɛp wi fɔ tink di rayt we bɔt wi prɔblɛm dɛn. (Rid Filipians 2:​3, 4.) Wi ɔl gɛt wi yon prɔblɛm dɛn bikɔs wi de na wɔl we Setan de kɔntrol. (1 Jɔn 5:19; Rɛv. 12:12) We wi de pre fɔ ɔda pipul dɛn ɔltɛm, dat de ɛp wi fɔ mɛmba se “di sem kayn tin dɛn we de mek [wi] de sɔfa na dɛn bak de mek [wi] brɔda dɛn ɔlsay na di wɔl de sɔfa.” (1 Pit. 5:9) Wan sista we na payɔnia we nem Katrin tɔk se: “We a de pre fɔ ɔda pipul dɛn, dat de ɛp mi fɔ mɛmba se dɛnsɛf gɛt dɛn yon prɔblɛm dɛn. We a mɛmba dat, i de mek a nɔ pe atɛnshɔn tumɔs pan mi yon prɔblɛm dɛn.”

PIPUL DƐN WE WI FƆ PRE FƆ

8. Gi ɛgzampul dɛn bɔt pipul dɛn we wi kin pre fɔ.

⁸ Udat dɛn wi fɔ pre fɔ? Wi kin pre fɔ pipul dɛn as grup. Fɔ ɛgzampul, wi kin pre fɔ di wan dɛn we gɛt wɛlbɔdi prɔblɛm, yɔŋ wan dɛn we dɛn kɔmpin dɛn de provok ɔ mɔna na skul fɔ du tin dɛn we nɔ rayt, ɔ di wan dɛn we dɔn ol. Bɔku pan wi brɔda ɛn sista dɛn de sɔfa bikɔs dɛn famili ɔ di gɔvmɛnt de agens dɛn. (Mat. 10:​18, 36; Akt 12:5) Sɔm pan wi brɔda ɛn sista dɛn kin rɔnawe lɛf dɛn os bikɔs fɛt-fɛt de na dɛn eria. Ɔda wan dɛn de sɔfa bikɔs ɔf nachɔral dizasta. Sɔntɛm wi nɔ go sabi dɛn brɔda ɛn sista dɛn ya bay nem. Bɔt we wi pre fɔ dɛn, wi de sho se wi de obe Jizɔs in kɔmand we se wi fɔ “lɛk [wi] kɔmpin dɛn.”—Jɔn 13:34.

9. Wetin mek wi fɔ pre fɔ di wan dɛn we de bifo na Jiova in ɔganayzeshɔn? Wetin mek wi fɔ pre fɔ dɛn wɛf dɛn?

⁹ Wi kin pre bak fɔ di wan dɛn we de bifo na Jiova in ɔganayzeshɔn. Pipul dɛn lɛk di Gɔvnin Bɔdi mɛmba dɛn ɛn di wan dɛn we de ɛp dɛn, Branch Kɔmiti mɛmba dɛn, ovasia dɛn na di branch ɔfis dɛn, sakit ovasia dɛn, ɛlda dɛn, ɛn ministerial savant dɛn. Bɔku pan dɛn brɔda dɛn ya gɛt dɛn yon prɔblɛm dɛn, bɔt pan ɔl dat dɛn kin wok tranga wan fɔ ɛp wi. (2 Kɔr. 12:15) Fɔ ɛgzampul, wan sakit ovasia we nem Mak tɔk se: “Wan pan di tin dɛn we nɔ rili izi fɔ mi na we a nɔ de nia mi mama ɛn papa we dɔn ol. Dɛn ɔl tu gɛt wɛlbɔdi prɔblɛm. Pan ɔl we mi sista ɛn in man de ɛp fɔ kia fɔ dɛn, a kin fil am we a nɔ de nia dɛn fɔ ɛp dɛn.” Sɔntɛm wi nɔ no ɔl di prɔblɛm dɛn we de mek dɛn brɔda dɛn ya we de wok tranga wan wɔri, bɔt i go fayn fɔ mɛmba dɛn we wi de pre. (1 Tɛs. 5:​12, 13) Wi kin pre bak fɔ dɛn wɛf dɛn, bikɔs dɛn de sɔpɔt dɛn man dɛn fɔ kɔntinyu fɔ du dɛn wok na di kɔngrigeshɔn.

10-11. Fɔ se Jiova kin gladi we wi kin pre fɔ wi brɔda ɛn sista dɛn as grup? Ɛksplen.

¹⁰ Jɔs lɛk aw wi dɔn tɔk, bɔku tɛm wi kin pre fɔ wi brɔda ɛn sista dɛn as grup. Fɔ ɛgzampul, pan ɔl we wi nɔ go tink bɔt patikyula pɔsin, wi kin pre to Jiova fɔ ɛp di wan dɛn we de na prizin ɔ fɔ kɔrej di wan dɛn we pɔsin we dɛn lɛk dɔn day. Wan ɛlda we nem Dɔnald tɔk se, “Bikɔs wi gɛt bɔku brɔda ɛn sista dɛn we gɛt prɔblɛm dɛn, sɔntɛnde we wi de pre fɔ dɛn, i kin jɔs tan lɛk se wi de put dɛn ɔl ɔnda wan ‘ɔmbrɛla.’”

¹¹ Fɔ se Jiova kin gladi fɔ dɛn kayn prea dɛn de? Yɛs, i kin gladi. Afta ɔl, wi nɔ no di patikyula tin dɛn we ɔl wi brɔda ɛn sista dɛn nid. So i kin fayn fɔ pre fɔ wi brɔda ɛn sista dɛn as grup. (Jɔn 17:20; Ɛfi. 6:18) Dɛn kayn prea dɛn de, de sho se wi “lɛk ɔl [wi] brɔda dɛn.”—1 Pit. 2:17.

WE WI DE PRE FƆ PATIKYULA PIPUL DƐN

12. We wi tray fɔ notis wetin de apin to ɔda pipul dɛn, aw dat go ɛp wi fɔ pre fɔ patikyula tin dɛn we de apin to dɛn?

¹² Tray fɔ notis wetin de apin to ɔda pipul dɛn. Apat frɔm we wi de pre fɔ wi brɔda ɛn sista dɛn as grup, i fayn bak fɔ kɔl dɛn nem dɛn we wi de pre fɔ dɛn. Pɔsin de na yu kɔngrigeshɔn we gɛt siriɔs wɛlbɔdi prɔblɛm? Yɔŋ pɔsin de na yu kɔngrigeshɔn we in at pwɛl bikɔs in skulmet dɛn de tɛmt am fɔ du tin dɛn we nɔ fayn? Una gɛt mama ɔ papa na una kɔngrigeshɔn we nain wangren de tray tranga wan fɔ ‘disiplin in pikin ɛn tren am lɛk aw Jiova se’? (Ɛfi. 6:4) We yu tray fɔ notis wetin de apin to ɔda pipul dɛn, dat go mek yu lɛk dɛn ɛn sɔri fɔ dɛn mɔ ɛn mɔ, ɛn i go mek yu pre fɔ dɛn.b—Rom. 12:15.

13. Wetin wi go du we go ɛp wi fɔ pre fɔ di wan dɛn we wi nɔ sabi?

¹³ Kɔl pipul dɛn nem we yu de pre fɔ dɛn. Wi kin du dat ilɛksɛf wi nɔ wande sabi dɛn. Fɔ ɛgzampul, tink bɔt wi brɔda ɛn sista dɛn we de na prizin na ples dɛn lɛk Krimia, Ɛritrea, Rɔshia, ɛn Singapɔ. We yu go na jw.org, yu go si wi brɔda ɛn sista dɛn we de na prizin dɛn nem dɛn.c Wan sakit ovasia we nem Brayan tɔk se: “A dɔn notis se we a de rayt mi kɔmpin Kristian we de na prizin in nem ɛn kɔl am lawd wan, dat de ɛp mi fɔ mɛmba am ɛn pre fɔ am we mi wan de pre.”

14-15. Wetin go ɛp wi fɔ pre fɔ patikyula tin dɛn?

¹⁴ Pre fɔ patikyula tin dɛn. Maykɛl we wi bin dɔn tɔk bɔt bin se: “We a kin go na jw.org ɛn rid bɔt wi brɔda dɛn we de na prizin, a kin tray fɔ imajin aw a go fil if na mi de de. A no se a go wɔri bɔt mi wɛf, ɛn a go want fɔ mek shɔ se i gɛt di tin dɛn we i nid. So dat de ɛp mi fɔ no us patikyula tin dɛn a fɔ pre fɔ we a de pre fɔ wi brɔda dɛn we mared we de na prizin.”—Ibru. 13:​3, futnot.

¹⁵ If wi tray fɔ imajin wetin kin apin to wi brɔda ɛn sista dɛn we de na prizin, dat go ɛp wi fɔ tink bɔt ɔda tin dɛn we wi fɔ pre fɔ. Fɔ ɛgzampul, wi kin pre fɔ mek di prizin ɔfisa dɛn trit dɛn fayn ɛn fɔ mek di wan dɛn we de na pawa alaw wi brɔda ɛn sista dɛn fɔ gɛt fridɔm fɔ wɔship Jiova. (1 Tim. 2:​1, 2) Wi kin pre fɔ mek di ɛgzampul we dɛn de sɛt ɛnkɔrej di wan dɛn we de na dɛn kɔngrigeshɔn ɔ fɔ mek di wan dɛn we nɔ de sav Jiova notis di fayn we aw dɛn de biev ɛn lisin to wi mɛsej. (1 Pit. 2:12) Ɛn wi kin du di sem tin we wi de pre fɔ wi brɔda ɛn sista dɛn we gɛt ɔda prɔblɛm dɛn. We wi tray fɔ notis wetin de apin to ɔda pipul dɛn, kɔl dɛn nem we wi de pre, ɛn pre fɔ patikyula tin dɛn, wi go sho se wi ‘lɛk wisɛf mɔ ɛn mɔ.’—1 Tɛs. 3:12.

WI FƆ TINK DI RAYT WE BƆT WI PREA DƐN

16. Aw wi go tink di rayt we bɔt wi prea dɛn? (Matyu 6:8)

¹⁶ Jɔs lɛk aw wi dɔn lan, wi prea dɛn kin ɛp fɔ chenj wetin de apin to pɔsin. Bɔt wi nid fɔ tink di rayt we bɔt wi prea dɛn. We wi de pre, wi fɔ mɛmba se Jiova ɔlrɛdi no bɔt di prɔblɛm, ɛn wi nɔ nid fɔ tɛl am di bɛst we aw fɔ sɔlv am. Bifo wi brɔda ɛn sista dɛn no wetin dɛn nid ɔ ivin bifo wi no, Jiova kin dɔn ɔlrɛdi no. (Rid Matyu 6:8.) So wetin mek wi fɔ pre fɔ ɔda pipul dɛn? Apat frɔm di rizin dɛn we wi dɔn tɔk bɔt na dis atikul, we wi pre fɔ ɔda pipul dɛn, wi de sho se wi lɛk dɛn. Na lɔv de mek wi pre fɔ wi kɔmpin dɛn. Ɛn Jiova kin gladi we i de si in savant dɛn de falamakata am fɔ sho lɔv.

17-18. Us ɛgzampul wi go kɔmpia wi prea to?

¹⁷ Ivin if wi prea dɛn nɔ ɛp fɔ chenj wetin de apin to wi brɔda ɛn sista dɛn, i de sho se wi lɛk dɛn, ɛn Jiova de notis dat. Lɛ wi tɔk bɔt dis ɛgzampul: Imajin se wan famili de we gɛt tu smɔl pikin dɛn, wan bɔbɔ ɛn wan titi. Bɔt di bɔbɔ nɔ wɛl. So in sista beg dɛn papa se: “Papa duya ɛp mi brɔda. I rili sik!” Di papa ɔlrɛdi de du sɔntin fɔ ɛp di bɔbɔ bikɔs insɛf lɛk am ɛn i de rili kia fɔ am. Bɔt di papa go rili gladi fɔ si se in galpikin rili bisin bɔt in brɔda, ɛn i de beg am fɔ ɛp in brɔda.

¹⁸ Na dat Jiova de ɛnkɔrej wi fɔ du. I want mek wi sho se wi bisin bɔt wi kɔmpin dɛn ɛn pre fɔ dɛn. We wi du dat, wi de sho se wi nɔ jɔs bisin bɔt wisɛf, ɛn Jiova kin gladi fɔ dat. (2 Tɛs. 1:3; Ibru. 6:10) Dɔn bak, lɛk aw wi dɔn tɔk, sɔntɛnde wi prea dɛn kin ɛp fɔ chenj wetin de apin to pɔsin. So lɛ wi du wi bɛst fɔ kɔntinyu fɔ pre fɔ wi kɔmpin dɛn.