Kɔntinyu fɔ Gladi Pan Ɔl We Yu Dɔn Ol

1-2. Aw Jiova de si in fetful savant dɛn we dɔn ol? (Sam 92:12-14; luk bak di di frɔnt pej.)

PIPUL dɛn ɔlsay na di wɔl kin si ol ej difrɛn we dɛn. Fɔ ɛgzampul, yu mɛmba di fɔs tɛm we yu si wet ia na yu ed? Sɔntɛm yu bin want fɔ pul am bifo ɔda pɔsin si am. Bɔt yu mɛmba se ilɛk yu pul di wet ia, i go kɔntinyu fɔ kam. Dis ɛgzampul de sho se bɔku pipul dɛn nɔ want fɔ ol.

² Bɔt wi Papa we de na ɛvin de si in savant dɛn we dɔn ol difrɛn we. (Prɔv. 16:31) I tɔk se dɛn tan lɛk stik dɛn we de du wɛl. (Rid Sam 92:12-14.) Wetin mek i se so? Na bikɔs bɔku tɛm, stik dɛn we dɔn ol kin fayn bikɔs dɛn gɛt bɔku lif ɛn flawa dɛn. Wan pan dɛn stik dɛn de, de na Jepan we dɛn kɔl di Japanese flowering cherry, ɛn dɛn kin de fɔ lɔng tɛm. Sɔm pan dɛn dɔn pas wan tawzin ia, ɛn dɛn rili fayn. Jɔs lɛk dɛn stik dɛn de, Jiova de si in fetful savant dɛn we dɔn ol as pipul dɛn we rili fayn. I nɔ jɔs de pe atɛnshɔn to dɛn wet ia. I valyu di fayn kwaliti dɛn we dɛn ol wan dɛn ya gɛt. Dɛn dɔn sav Jiova fɔ lɔng tɛm ɛn dɛn dɔn kɔntinyu fɔ de biɛn Am di tɛm we tin fayn ɛn di tɛm we tin nɔ fayn.

3. Gi ɛgzampul bɔt aw Jiova dɔn yuz ol pipul dɛn fɔ du wetin i want.

³ Jiova de kɔntinyu fɔ valyu in fetful savant dɛn ilɛksɛf dɛn dɔn ol.a Infakt, bɔku tɛm Jiova kin yuz ol pipul dɛn fɔ du wetin i want. Fɔ ɛgzampul, Sera bin dɔn ol di tɛm we Jiova bin se i go bɔn bɔypikin. Di bɔypikin go bi papa to wan big neshɔn ɛn di Mɛsaya go kɔmɔt nain famili layn. (Jɛn. 17:15-19) Mozis bin dɔn ol di tɛm we Jiova tɛl am fɔ pul di Izrɛlayt dɛn kɔmɔt na Ijipt. (Ɛks. 7:6, 7) Ɛn Apɔsul Jɔn insɛf bin dɔn ol we Jiova yuz am fɔ rayt fayv buk dɛn na di Baybul.

4. Akɔdin to Prɔvabs 15:15, wetin go ɛp ol wan dɛn fɔ bia wit di prɔblɛm dɛn we de mit dɛn? (Luk bak di pikchɔ.)

⁴ We pipul dɛn de ol, dɛn kin gɛt bɔku prɔblɛm dɛn. Wan sista tɔk se, “Ol ej nɔ rili izi.” Bɔt we di wan dɛn we dɔn ol gɛt gladi-at,b dat kin ɛp dɛn fɔ bia wit di prɔblɛm dɛn we kin mit dɛn bikɔs dɛn dɔn ol. (Rid Prɔvabs 15:15.) Insay dis atikul, wi go tɔk bɔt sɔm tin dɛn we ol pipul dɛn go du fɔ mek dɛn kɔntinyu fɔ gɛt gladi-at. Wi go tɔk bak bɔt aw ɔda brɔda ɛn sista dɛn go ɛp di ol wan dɛn we de na dɛn kɔngrigeshɔn. Fɔs, lɛ wi tɔk bɔt wetin mek i nɔ kin izi fɔ gɛt gladi-at we wi de ol.

AW OL EJ KIN AFƐKT YU GLADI-AT?

5. Wetin kin mek sɔm ol pipul dɛn at pwɛl?

⁵ Wetin kin mek yu at pwɛl? Sɔntɛm yu at kin pwɛl bikɔs yu nɔ ebul fɔ du di tin dɛn we yu bin de du trade. Sɔntɛm yu de wish fɔ mek yu yɔŋ bak ɛn gɛt wɛlbɔdi. (Ɛkli. 7:10) Wan sista we nem Rubi tɔk se: “I nɔ kin izi fɔ mek a wɛr klos bikɔs a kin fil pen ɛn a nɔ ebul fɔ muv mi bɔdi lɛk aw a bin de du trade. I kin ivin at fɔ mek a es mi fut fɔ wɛr sɔks. Mi an dɛn kin at ɛn a nɔ ebul yuz mi finga dɛn fayn, so dis kin mek i nɔ izi fɔ mek a ivin du smɔl smɔl wok dɛn.” Ɛn Arɔld we bin de wok na Bɛtɛl tɔk se, “Sɔntɛnde a kin vɛks bikɔs a nɔ ebul fɔ du ɔl di tin dɛn we a bin de du trade. Mi na bin strɔng man ɛn a bin lɛk fɔ ple besbɔl. We wi bin de ple, pipul dɛn bin de se, ‘Una gi Arɔld di bɔl bikɔs i go mek wi win.’ Bɔt naw, a nɔ ivin tink se a ebul fɔ sɛn bɔl.”

6. (a) Us ɔda tin dɛn kin mek sɔm ol pipul dɛn at pwɛl? (b) Wetin go ɛp ol wan dɛn fɔ disayd if dɛn fɔ stɔp fɔ drayv? (Rid di atikul we de insay dis Wachtawa we gɛt di taytul, “A Fɔ Stɔp fɔ Drayv?”)

⁶ Sɔntɛm yu at kin pwɛl bikɔs yu nɔ ebul du sɔm tin dɛn fɔ yusɛf igen. Dis kin apin mɔ if yu nid pɔsin fɔ kam ɛp yu ɔ yu nid fɔ go liv wit wan pan yu pikin dɛn. Ɔ i kin apin bikɔs yu nɔ ebul drayv igen ɔ go usay yu want fɔ go bikɔs yu nɔ de si fayn igen ɔ yu gɛt ɔda wɛlbɔdi prɔblɛm. I nɔ kin rili izi! Bɔt i go fayn fɔ mek wi mɛmba se ilɛk wi nɔ ebul fɔ kia fɔ wisɛf, wi nɔ ebul fɔ de na os wi wangren, ɔ wi nɔ ebul fɔ drayv, dat nɔ min se Jiova ɛn ɔda pipul dɛn nɔ valyu wi. Ɛn wan dawt nɔ de se Jiova ɔndastand aw wi de fil. Wetin impɔtant to Jiova na di kayn pɔsin we wi bi insay. I no se wi lɛk in ɛn wi brɔda ɛn sista dɛn, ɛn wi gladi fɔ wetin dɛn de du.—1 Sam. 16:7.

7. Wetin go ɛp yu if yu at pwɛl bikɔs yu fil se yu nɔ go de alayv di tɛm we Amagɛdɔn go kam?

⁷ Sɔntɛm yu at kin pwɛl bikɔs yu de mɛmba se yu nɔ go de alayv di tɛm we Amagɛdɔn go kam. If na so yu de fil, wetin go ɛp yu? Tray fɔ mɛmba se Jiova de peshɛnt wet fɔ di tɛm we i go dɔnawe wit dis wikɛd wɔl. (Ayz. 30:18) Bɔt i gɛt gud rizin we mek i de peshɛnt. Di peshɛnt we i de peshɛnt de mek bɔku pipul dɛn gɛt chans fɔ sabi am ɛn sav am. (2 Pit. 3:9) So ɛnitɛm we yu at pwɛl, tray fɔ mɛmba se na bikɔs Jiova peshɛnt, na dat mek bɔku pipul dɛn de lan bɔt am ɛn gɛt chans fɔ sev. Sɔntɛm sɔm pan dɛn go bi yu fambul dɛn!

8. Aw di prɔblɛm dɛn we ol pipul dɛn kin gɛt kin afɛkt dɛn?

⁸ Ilɛk wi yɔŋ ɔ ol, we wi sik, i kin izi fɔ mek wi tɔk ɔ du sɔntin we wi kin rigrɛt leta. (Ɛkli. 7:7; Jems 3:2) Fɔ ɛgzampul, we Job we na fetful man bin de sɔfa, i bin de tɔk “fulish tɔk dɛn.” (Job 6:1-3) Dɔn bak, wɛlbɔdi prɔblɛm kin mek ol pipul dɛn tɔk ɔ du tin dɛn we dɛn nɔ yus fɔ du. Bɔt wi nɔn nɔ want fɔ yuz wi ej ɔ wɛlbɔdi prɔblɛm as ɛkskyuz fɔ trit pipul dɛn bad ɔ fɔ fil se dɛn fɔ du sɔntin fɔ wi ɔltɛm. Ɛn if wi no se wi dɔn tɔk sɔntin we nɔ fayn, wi nɔ fɔ westɛm fɔ se sɔri.—Mat. 5:23, 24.

AW YU GO KƆNTINYU FƆ GƐT GLADI-AT?

9. Wetin mek yu fɔ gri fɔ mek ɔda pipul dɛn ɛp yu? (Luk bak di pikchɔ dɛn.)

⁹ Gri fɔ mek ɔda pipul dɛn ɛp yu. (Gal. 6:2) Sɔntɛm i nɔ go izi fɔ mek yu du dat. Wan sista we nem Gritul tɔk se: “Sɔntɛnde i nɔ kin izi fɔ mek a alaw ɔda pipul dɛn fɔ ɛp mi bikɔs a fil se a go ambɔg dɛn. I te smɔl bifo a put misɛf dɔŋ ɛn chenj di we aw a de tink ɛn gri se a nid ɛp.” We yu gri fɔ mek ɔda pipul dɛn ɛp yu, yu de mek dɛn gɛt di gladi-at we pɔsin de gɛt we i de gi. (Akt 20:35) Ɛn wan dawt nɔ de se yu go gladi we yu si se ɔda pipul dɛn rili lɛk yu ɛn dɛn bisin bɔt yu.

10. Wetin mek yu fɔ mɛmba fɔ sho se yu gɛt tɛnki? (Luk bak di pikchɔ.)

¹⁰ Sho se yu gɛt tɛnki. (Kol. 3:15; 1 Tɛs. 5:18) Wi kin gladi we ɔda pipul dɛn de du gud to wi, bɔt sɔntɛnde wi kin fɔgɛt fɔ tɛl dɛn tɛnki. Bɔt if wi de smayl ɛn tɛl dɛn tɛnki, wi go mek dɛn no se wi valyu dɛn ɛn wi gladi fɔ wetin dɛn de du fɔ wi. Wan sista we nem Lia we de kia fɔ ol pipul dɛn na Bɛtɛl tɔk se: “Wan pan di sista dɛn we a de kia fɔ kin rayt smɔl not fɔ tɛl mi tɛnki. I nɔ kin rayt bɔku tin, bɔt dɛn kin rili mek a fil fayn. A kin lɛk fɔ rid in mɛsej dɛn. I de mek a gladi bikɔs a no se i gladi fɔ wetin a de du fɔ am.”

11. Aw yu go ɛp ɔda pipul dɛn? (Luk bak di pikchɔ.)

¹¹ Du yu bɛst fɔ ɛp ɔda pipul dɛn. We yu de tink bɔt ɔda pipul dɛn ɛn tray fɔ ɛp dɛn, dat go mek yu nɔ pe atɛnshɔn tumɔs pan yu yon prɔblɛm dɛn. Wan Afrikan parebul tɔk se ol pipul dɛn tan lɛk laybri we gɛt bɔku buk dɛn we de tich impɔtant tin dɛn. Bɔt if pipul dɛn nɔ rid di buk dɛn, dɛn nɔ go lan frɔm dɛn. Semweso, yɔŋ pipul dɛn nɔ go ebul lan frɔm yu if yu nɔ tɔk to dɛn ɛn tɛl dɛn sɔm pan di tin dɛn we yu no. Yu kin aks dɛn kwɛstyɔn ɛn lisin to dɛn. Tɛl dɛn wetin mek i fayn fɔ fala Jiova in lɔ dɛn ɔltɛm ɛn aw dat go mek dɛn gladi. Wan dawt nɔ de se yu go gladi we yu ɛnkɔrej ɛn ɛp di yɔŋ wan dɛn.—Sam 71:18.

12. Akɔdin to Ayzaya 46:4, wetin Jiova dɔn prɔmis fɔ du fɔ di wan dɛn we dɔn ol? (Luk bak di pikchɔ.)

¹² Pre to Jiova fɔ mek i gi yu trɛnk. Pan ɔl we sɔntɛnde yu go taya ɔ yu at go pwɛl, Jiova “nɔ de ɛva taya ɔ fil wik.” (Ayz. 40:28) Aw Jiova de yuz in pawa we nɔ de dɔn? Wan we aw i de yuz am na fɔ gi trɛnk to in fetful savant dɛn we dɔn ol. (Ayz. 40:29-31) Infakt, i dɔn prɔmis se i go ɛp dɛn. (Rid Ayzaya 46:4.) Ɛn Jiova na pɔsin we kin du wetin i prɔmis ɔltɛm. (Jɔs. 23:14; Ayz. 55:10, 11) We yu pre to Jiova, i go gi yu di ɛp we yu nid. Ɛn we yu no se i rili lɛk yu, dat go mek yu gladi.

13. Akɔdin to 2 Kɔrintians 4:16-18, wetin wi fɔ mɛmba? (Luk bak di pikchɔ dɛn.)

¹³ Mɛmba se tɛm go kam we yu go yɔŋ bak ɛn gɛt wɛlbɔdi. We wi mɛmba se di prɔblɛm we de mɔna wi go jɔs de fɔ shɔt tɛm, dat go mek i izi mɔ fɔ lɛ wi bia am. Ɛn di Baybul prɔmis wi se tumara bambay pipul dɛn nɔ go ol ɛn sik igen. (Job 33:25; Ayz. 33:24) So yu go gladi bikɔs yu no se tumara bambay yu go gɛt wɛlbɔdi, yu go strɔng, ɛn yu go fayn pas aw yu bin de. (Rid 2 Kɔrintians 4:16-18.) Bɔt wetin ɔda pipul dɛn go du fɔ ɛp?

AW ƆDA PIPUL DƐN GO ƐP?

14. Wetin mek i impɔtant fɔ go fɛn di ol wan dɛn ɛn kɔl dɛn?

¹⁴ Go de go fɛn brɔda ɛn sista dɛn we dɔn ol ɛn kɔl dɛn. (Ibru. 13:16) Ol pipul dɛn kin fil lɛk se na dɛn wangren de. Wan brɔda we nem Kamil we nɔ ebul kɔmɔt nain os tɔk se: “A kin de na os ol de. So mi at kin rili pwɛl. Sɔntɛnde a kin fil lɛk ol layɔn we dɛn lɔk na kej. Ɛn dat kin mek a wɔri ɛn vɛks.” We wi de go fɛn ol wan dɛn, wi de ɛp dɛn fɔ no se dɛn impɔtant to wi ɛn wi lɛk dɛn. I go bi se tɛm bin de we wi bin want fɔ go fɛn wan ol brɔda ɔ sista ɔ fɔ kɔl am, bɔt wi nɔ bin ebul fɔ du dat. Wi ɔl bizi. So wetin go ɛp wi fɔ “mek shɔ ɔf di tin dɛn we rili impɔtant,” lɛk fɔ go fɛn di ol wan dɛn? (Fil. 1:10) Yu kin sɛt rimaynda na yu fon we go mɛmba yu fɔ kɔl ɔ sɛn mɛsej to di ol wan dɛn na yu kɔngrigeshɔn. Yu kin pik patikyula de bak we yu go want fɔ go fɛn dɛn so dat yu nɔ go fɔgɛt.

15. Wetin yɔŋ pipul dɛn ɛn ol pipul dɛn go ebul du togɛda?

¹⁵ If yu na yɔŋ pɔsin, sɔntɛm yu go de tink bɔt wetin yu ɛn ol pɔsin go tɔk bɔt ɔ wetin una go du togɛda. Bɔt nɔ wɔri bɔt dat. Jɔs tray fɔ bi gud padi. (Prɔv. 17:17) Tɔk wit ol wan dɛn bifo mitin stat ɛn afta mitin. Sɔntɛm yu kin aks dɛn fɔ tɛl yu bɔt di skripchɔ we dɛn lɛk ɔ fɔ tɛl yu bɔt fɔni tin we bin apin we dɛn bin yɔŋ. Yu kin invayt dɛn bak fɔ lɛ una wach wan JW Brɔdkastin program. Yu kin du ɔda tin dɛn bak fɔ ɛp ol wan dɛn. Fɔ ɛgzampul, yu kin ɛp dɛn fɔ ɔpdet dɛn fon ɔ tablɛt ɔ fɔ dawnlod di nyu pɔblikeshɔn dɛn we wi de yuz fɔ stɔdi. Wan sista we nem Karɔl tɔk se: “Mek lɛ yu ɛn di ol wan dɛn du tin dɛn togɛda we yu kin lɛk fɔ du. Pan ɔl we a dɔn ol, a stil want fɔ ɛnjɔy layf. A lɛk fɔ go bay bay, it wit mi padi dɛn, ɛn fɔ go waka na fayn ples dɛn.” Ɛn wan sista we nem Mayra tɔk se: “Wan pan mi padi dɛn ol 90 ia. I big fɔ mi fɔ 57 ia. Bɔt bɔku tɛm a kin fɔgɛt se i big fɔ mi fa fawe bikɔs wi kin laf ɛn wach fim togɛda. Ɛn we wi gɛt prɔblɛm, wi kin advays wisɛf.”

16. Wetin mek i kin fayn fɔ go wit ol wan dɛn we dɛn de go na ɔspitul?

¹⁶ Go wit dɛn we dɛn de go na ɔspitul. Apat frɔm we yu de ɛp di wan dɛn we dɔn ol wit transpɔt biznɛs, yu kin mek shɔ se di pipul dɛn we de wok na di ɔspitul trit dɛn fayn ɛn gi dɛn di atɛnshɔn we dɛn nid. (Ayz. 1:17) Wan ɔda tin we yu kin du fɔ ɛp dɛn na fɔ rayt wetin di dɔktɔ se. Wan ol sista we nem Rut tɔk se: “Bɔku tɛm, we mi wan kin go ɔspitul, di dɔktɔ nɔ kin tek mi siriɔs. Di dɔktɔ dɛn kin tɛl mi se, ‘Yu jɔs de fil se yu sik, bɔt yu nɔ sik.’ Bɔt we pɔsin go wit mi, dɛn kin trit mi fayn. A de tɛl di brɔda ɛn sista dɛn we kin go wit mi na ɔspitul tɛnki.”

17. Us difrɛn we dɛn yu go ebul prich wit brɔda ɛn sista dɛn we dɔn ol?

¹⁷ Prich wit dɛn. Sɔm ol wan dɛn nɔ kin ebul fɔ go prich frɔm os to os. So sɔntɛm yu kin aks wan ol sista fɔ jɔyn yu fɔ du kat witnɛsin. Yu kin ivin go wit chia fɔ am fɔ mek i sidɔm nia di kat. Ɔ yu kin aks wan ol brɔda fɔ jɔyn yu fɔ du Baybul stɔdi. Sɔntɛm yu kin ivin du di stɔdi nain os. Ɛlda dɛn kin arenj fɔ gɛt mitin fɔ fil savis na wan ol brɔda ɔ sista in os, so dat i go izi fɔ mek i jɔyn di grup fɔ prich. Jiova kin rili gladi we wi de du ɔl wetin wi ebul fɔ sho ol wan dɛn se wi lɛk dɛn ɛn wi rɛspɛkt dɛn.—Prɔv. 3:27; Rom. 12:10.

18. Wetin wi go tɔk bɔt insay di nɛks atikul?

¹⁸ Dis atikul dɔn mɛmba wi se Jiova lɛk ol wan dɛn ɛn i valyu dɛn. Ɛn na da we de ɔl di brɔda ɛn sista dɛn na di kɔngrigeshɔn de fil bɔt dɛn! Ol ej nɔ izi, bɔt Jiova go ɛp yu fɔ kɔntinyu fɔ gɛt gladi-at. (Sam 37:25) Ɛn i rili fayn fɔ no se tumara bambay, yu go gladi pas aw yu bin dɔn ɛva gladi! Bɔt sɔm brɔda ɛn sista dɛn gɛt difrɛn prɔblɛm. Dɛn de kia fɔ dɛn fambul we dɔn ol, dɛn pikin, ɔ dɛn padi we sik. Aw dɛn go kɔntinyu fɔ gɛt gladi-at? Wi go ansa da kwɛstyɔn de insay di nɛks atikul.