A Fɔ Stɔp fɔ Drayv?

Fɔ se dis de apin to yu? If na so i bi, wetin go ɛp yu fɔ no if yu fɔ kɔntinyu fɔ drayv?

Na sɔm kɔntri dɛn, if pɔsin dɔn ol ɛn in laysin dɔn ɛkspaya, bifo i go tek nyu wan, i go nid fɔ go si dɔktɔ fɔs fɔ no if i go ebul fɔ kɔntinyu fɔ drayv. Kristian dɛn we de na dɛn kɔntri dɛn de kin obe di lɔ dɛn na di kɔntri. (Rom. 13:1) Bɔt ilɛk usay yu de, tin dɛn de we yu go chɛk fɔ no if yu go ebul fɔ kɔntinyu fɔ drayv sef wan.

CHƐK DI WE AW YU DE DRAYV

Di National Institute on Aging (NIA) na Amɛrika dɛn wɛbsayt gɛt kwɛstyɔn dɛn lɛk di wan dɛn we de dɔŋ, we ol pɔsin kin aks insɛf. Di kwɛstyɔn dɛn na:

• I kin at fɔ mek a si rod sayn dɛn ɔ fɔ si na nɛt?

• I nɔ izi fɔ mek a tɔn mi ed fɔ wach mi mirɔ dɛn ɛn di say dɛn we a nɔ ebul si na di mirɔ?

• I nɔ izi fɔ mek a du tin kwik wan, lɛk fɔ pul mi fut na di aksiliretɔ ɛn mas di brek?

• A kin drayv slo tumɔs ɛn ambɔg ɔda drayva dɛn?

• A dɔn mis fɔ gɛt aksidɛnt dɛn dis biɛn tɛm, ɔ mi motoka krach krach ɔ gɛt dɛnt dɛn bikɔs a kin bang tin dɛn?

• Polis dɔn stɔp mi bikɔs ɔf di we aw a de drayv?

• A dɔn ɛva slip we a de drayv?

• A de tek ɛni mɛrɛsin we go afɛkt di we aw a de drayv?

• Mi fambul ɔ padi dɛn dɔn tɛl mi se dɛn de wɔri bɔt di we aw a de drayv?

If yu ansa na yɛs to wan ɔ tu pan dɛn kwɛstyɔn dɛn ya, sɔntɛm i go fayn fɔ lɛ yu mek sɔm ajɔstmɛnt dɛn. Fɔ ɛgzampul, sɔntɛm yu go disayd nɔ fɔ drayv ɔltɛm, mɔ na nɛt. Go de chɛk yusɛf fɔ si if yu stil de drayv fayn. Yu kin aks yu fambul ɔ padi fɔ tɛl yu wetin i tink bɔt di we aw yu de drayv. Sɔntɛm yu kin disayd fɔ go na drayvin skul fɔ lan aw fɔ drayv sef wan. Bɔt if yu ansa to bɔku pan di kwɛstyɔn dɛn we de ɔp na yɛs, sɔntɛm i go fayn fɔ mek yu stɔp fɔ drayv.a

ALAW BAYBUL PRINSIPUL DƐN FƆ GAYD YU

Sɔntɛm wi nɔ go notis se wi nɔ de drayv fayn igen. Ɛn wi nɔ kin gladi we wi de tink se wi fɔ stɔp fɔ drayv. So us Baybul prinsipul dɛn go ɛp yu fɔ tink di rayt we ɛn du di rayt tin? Lɛ wi tɔk bɔt tu pan dɛn.

Kɔntinyu fɔ bi pɔsin we ɔmbul. (Prɔv. 11:2) As wi de ol, wi nɔ kin si fayn ɛn yɛri fa igen, dɔn wi nɔ kin gɛt bɛtɛ trɛnk, ɛn i nɔ kin izi fɔ muv wi bɔdi. Fɔ ɛgzampul, bɔku pipul dɛn kin lɛf fɔ ple sɔm gem dɛn we dɛn de ol bikɔs dɛn no se i go izi fɔ mek dɛn damej dɛnsɛf. Wi kin du da sem tin de we i kam to drayvin. Tɛm kin kam we pɔsin we ɔmbul kin disayd se i go stɔp fɔ drayv bikɔs i no se i nɔ sef igen fɔ mek i drayv. (Prɔv. 22:3) Ɛn pɔsin we ɔmbul go rɛdi fɔ lisin we ɔda pipul dɛn de tɛl am se dɛn de wɔri bɔt di we aw i de drayv.—Luk bak 2 Samiɛl 21:​15-17.

Nɔ gɛt blɔd na yu ed. (Dyu. 22:8) If pɔsin nɔ drayv sef wan, i go damej ɔ kil pipul dɛn. Pɔsin we de kɔntinyu fɔ drayv pan ɔl we i nɔ de drayv fayn igen, de put in layf ɛn ɔda pipul dɛn layf pan denja. Ɛn if i gɛt aksidɛnt ɛn kil pɔsin, i go gɛt blɔd nain ed.

Nɔ tink se ɔda pipul dɛn nɔ go rɛspɛkt yu igen if yu disayd fɔ stɔp fɔ drayv. Jiova lɛk yu bikɔs ɔf di fayn kwaliti dɛn we yu gɛt, ɛn i gladi bikɔs yu ɔmbul, yu no se nɔto ɔltin yu ebul fɔ du, ɛn yu bisin bɔt ɔda pipul dɛn. I dɔn prɔmis se i go ɛp yu ɛn kɔrej yu. (Ayz. 46:4) I nɔ go ɛva lɛf yu. Pre to Jiova fɔ mek i ɛp yu fɔ du tin wit sɛns ɛn fɔ fala di advays dɛn we de na di Baybul we yu de disayd if yu fɔ stɔp fɔ drayv.