Udat Go Sev di Sivilian Dɛn? —Wetin di Baybul Se?

Wan ripɔt frɔm di United Nations se:

• Frɔm Ɔktoba 7 to Ɔktoba 23, 2023, di wɔ bitwin Gaza ɛn Izrɛl dɔn mek ova 6,400 pipul dɛn dɔn day, 15,200 pipul dɛn de we bin damej, ɛn bɔku pan dɛn na bin sivilian dɛn. Pantap dat, dis dɔn mek bɔku bɔku pipul dɛn lɛf dɛn os dɛn ɛn tɔn disples.

• Frɔm di tɛm we di wɔ bitwin Rɔshia ɛn Yukren stat te to Sɛptɛmba 24, 2023, dɛn dɔn kil 9,701 sivilian dɛn ɛn 17, 748 pipul dɛn bin damej insay Yukren.

Us op de na di Baybul fɔ di wan dɛn we dɔn sɔfa bikɔs ɔf wɔ?

Rizin fɔ Mek Wi Gɛt Op

Di Baybul bin dɔn tɔk se Gɔd gɛt fɔ mek “wɔ dɔn ɔlsay na di wɔl.” (Sams 46:9) I gɛt fɔ yuz wan gɔvmɛnt ɔ kiŋdɔm we de na ɛvin fɔ pul ɔl mɔtalman gɔvmɛnt. (Daniɛl 2:44) Gɔd in Kiŋdɔm go briŋ kolat fɔ ɔl mɔtalman.

Notis wetin Jizɔs Krays, we na di Kiŋ fɔ Gɔd in Kiŋdɔm, gɛt fɔ du:

• “I go sev pɔsin we po we de kray fɔ lɛ dɛn ɛp am, i go sev pɔsin we dɛn nɔ tek mek natin ɛn ɛnibɔdi we nɔ gɛt pɔsin fɔ ɛp am. I go sɔri fɔ di wan dɛn we dɛn nɔ tek mek natin ɛn di wan dɛn we po, ɛn i go sev po pipul dɛn layf. I go sev dɛn frɔm di wan dɛn we de sɔprɛs dɛn ɛn di wan dɛn we de mek dɛn sɔfa.”​—Sams 72:12-14.

Gɔd go yuz in kiŋdɔm fɔ pul ɔl di pwɛlat ɛn di sɔfa we pipul dɛn de sɔfa bikɔs ɔf wɔ ɛn fɛt-fɛt.

• “I go wep ɔl di kray wata na dɛn yay, ɛn day nɔ go de igen, pwɛlat ɛn pen nɔ go de igen, ɛn dɛn nɔ go kray igen bikɔs dɛn at pwɛl. Di tin dɛn we bin de apin nɔ go de igen.”​—Rɛvɛleshɔn 21:4.

I nɔ go te igen, Gɔd in kiŋdɔm gɛt fɔ chenj bɔku tin dɛn na di wɔl. Di Baybul bin dɔn tɔk se, wi gɛt fɔ si “wɔ ɛn yɛri nyuz bɔt wɔ” ɛn na dat de apin naw. (Matyu 24:6) Di wɔ ɛn ɔda tin dɛn we de apin na di wɔl de sho se wi de insay “di las dez” we mɔtalman dɛn de rul.​—2 Timoti 3:1.