Jiova Witnɛs dɛn na “Zionists?”

Nɔ, wi nɔto “Zionist”. Jiova Witnɛs dɛn na Kristian dɛn we biliv wetin di Baybul se. We sɔm rilijɔn dɛn de tich se we di Ju pipul dɛn gɛda na Palestayn, dat gɛt sɔntin fɔ du wit wetin di Baybul bin dɔn tɔk. Jiova Witnɛs dɛn nɔ biliv dat. Dɛn nɔ biliv fɔ se di fayn tin dɛn we pɔlitiks de mek apin, na sɔntin we dɛn bin dɔn tɔk bɔt na di Baybul. Infakt, di Baybul nɔ prez ɛni mɔtalman gɔvmɛnt ɔ tɔk bɔt wan langwej we bɛtɛ pas ɔda langwej. Insay wi men magazin we na Di Wachtawa, wi rayt klia wan de se: “Natin nɔ de na di Baybul we sɔpɔt “Zionism” ɛn pɔlitiks”. Di Encyclopædia Britannica bin tɔk se “Zionism” na “Grup we sɔm Ju pipul dɛn mek ɛn di men tin we dɛn want na fɔ mek di Ju pipul dɛn rul Palestayn.”

“Zionism” gɛt sɔntin fɔ du wit rilijɔn ɛn pɔlitiks. Jiova Witnɛs dɛn nɔ de tich bɔt “Zionism” na dɛn rilijɔn, ɛn dɛn nɔ de put an pan pɔlitiks ɔ sɔpɔt “Zionism” atɔl.

Jiova Witnɛs dɛn ɔganayzeshɔn na rilijɔn pipul dɛn ɛn dɛn nɔ de put an pan pɔlitiks ɛn ivin “Zionism”. Dɛn dɔn tɔk bɔku bɔt we Jiova Witnɛs dɛn nɔ de put an pan pɔlitiks, ɛn na sɔm kɔntri dɛn, dɛn dɔn gri fɔ sɔfa bifo dɛn gri fɔ put an pan pɔlitiks. Wi rili biliv fɔ se na Gɔd in Kiŋdɔm nɔmɔ go mek pis de na di wɔl; ɛn no mɔtalman nɔ go ebul fɔ du dat.

Ilɛk usay Jiova Witnɛs dɛn de, dɛn de obe di lɔ dɛn we gɔvmɛnt mek. Dɛn nɔ de strayk pan big man dɛn na gɔvmɛnt.