Yu Tink se I Impɔtant fɔ De na Wan Ɔganayz Rilijɔn?
Di Baybul in ansa
Yɛs, bikɔs Gɔd want pipul dɛn fɔ gɛda fɔ wɔship am. Di Baybul se: “Lɛ wi de tink bɔt wi kɔmpin dɛn so dat wi go ɛp dɛn fɔ sho lɔv ɛn du fayn tin dɛn, ɛn mek wi nɔ lɛf fɔ de mit togɛda.”—Ibruz 10:24, 25.
Jizɔs bin mek wi no se in disaypul dɛn go de na wan ɔganayz grup bay we i bin tɛl dɛn se: “If una lɛk una kɔmpin dɛn, ɔlman go no se una na mi disaypul dɛn.” (Jɔn 13:35) Wan men we aw Jizɔs in disaypul dɛn de sho dis lɔv na bay we dɛn de mit wit dɛn kɔmpin Kristian dɛn. Dɛn go ɔganayz dɛn insay difrɛn kɔngrigeshɔn usay dɛn go de mit fast fast fɔ wɔship Gɔd. (1 Kɔrintians 16:19) Ɛn dis dɔn mek dɛn gɛt brɔda dɛn we de difrɛn say dɛn na di wɔl.—1 Pita 2:17.
I nɔ jɔs du fɔ de na wan rilijɔn
Pan ɔl we di Baybul se pipul dɛn fɔ gɛda fɔ wɔship Gɔd, i nɔ tich se pɔsin go ebul fɔ mek Gɔd gladi bay we i jɔs bi mɛmba na wan rilijɔn. Fɔ mek Gɔd gladi fɔ pɔsin, in rilijɔn fɔ afɛkt wetin i de du ɛvride. Fɔ ɛgzampul, di Baybul se: “Di kayn wɔship we klin ɛn we nɔ dɔti na wi Gɔd ɛn Papa in yay na in dis: Fɔ kia fɔ pikin dɛn we de sɔfa we dɛn mama ɛn papa dɔn day ɛn uman dɛn we de sɔfa we dɛn man dɛn dɔn day, ɛn nɔ gɛt wan sten na di wɔl.”—Jems 1:27.