Yu Tink se Gɔd De Ɔlsay?
Di Baybul in ansa
Gɔd ebul fɔ si ɔltin ɛn i ebul fɔ du sɔntin ɛnisay we i want. (Prɔvabs 15:3; Ibruz 4:13) Bɔt di Baybul nɔ tich se Gɔd de ɔlsay ɛn pan ɔltin. Bifo dat, i sho se in na pɔsin ɛn i gɛt ples we i de.
Aw Gɔd tan? Gɔd na spirit. (Jɔn 4:24) Mɔtalman nɔ de si am. (Jɔn 1:18) Vishɔn dɛn bɔt Gɔd we de insay di Baybul, de sho se Gɔd gɛt wan patikyula say we i de. Dɛn vishɔn dɛn de nɔ ɛva sho se Gɔd de ɔlsay.—Ayzaya 6:1, 2; Rɛvɛleshɔn 4:2, 3, 8.
Usay Gɔd de? Di Baybul se Gɔd de na “ɛvin.” (Fɔs Kiŋ 8:30) Dis min se Gɔd nɔ de na di wɔl bɔt i de na ɛvin. Di Baybul tɔk bɔt wan tɛm we di enjɛl dɛn bin “go sho dɛnsɛf [tinap]” bifo Jiova,a we sho se Gɔd gɛt patikyula say we i de.—Job 1:6.
If Gɔd nɔ de ɔlsay, i go rili bisin bɔt mi?
Yɛs. Gɔd rili bisin bɔt pipul dɛn wan bay wan. Pan ɔl we Gɔd de na ɛvin, i de notis di wan dɛn we de na di wɔl we rili want fɔ mek i gladi, ɛn i de sɔpɔt dɛn. (Fɔs Kiŋ 8:39; Sɛkɛn Kronikul 16:9) Lɛ wi tɔk bɔt aw Jiova dɔn sho se i bisin bɔt di wan dɛn we de wɔship am wit ɔl dɛn at:
We yu de pre: Jiova de yɛri we yu pre to am.—2 Kronikuls 18:31, NWT.
We yu at pwɛl: “PAPA GƆD [“Jiova,” NWT] de nia ɔl udat fil se i dɔn dɔn fɔ am ɛn de ɛp udat fil se bɛtɛ nɔ de fɔ am igen.”—Sam 34:18.
We yu nid pɔsin fɔ dayrɛkt yu: Jiova go yuz in Wɔd, di Baybul fɔ “tich yu ɛn tɛl yu wetin fɔ du.”—Sam 32:8.
Lay lay tin dɛn we pipul dɛn biliv
Lay: Gɔd de pan ɔl di tin dɛn we i mek.
Tru: Gɔd nɔ de na di wɔl ɔ na di skay. (Fɔs Kiŋ 8:27) Na tru se di sta dɛn ɛn ɔl ɔda tin dɛn we Gɔd mek “de sho . . . in glori.” (Sam 19:1) So Gɔd nɔ de insay di tin dɛn we i mek jɔs lɛk aw atist nɔ kin de insay tin dɛn we i drɔ. Bɔt stil, di drɔin de tɛl wi sɔntin bɔt di atist we drɔ am. Semweso, di tin dɛn we de na di wɔl de tɛl wi bɔt di Wan we mek dɛn in “kwaliti dɛn” lɛk in pawa, sɛns, ɛn lɔv.—Romans 1:20.
Lay: Fɔ mek Gɔd go no ɔltin ɛn bi pɔsin we pawaful, i fɔ de ɔlsay.
Tru: Gɔd in oli spirit, na di pawa we Gɔd de yuz fɔ du sɔntin. Gɔd de yuz in oli spirit fɔ no ɛn du ɛnitin, ɛnisay, ɛnitɛm, ilɛk i nɔ de de.—Sam 139:7, NWT.
Lay: Sam 139:8 tich se Gɔd de ɔlsay bay we i se: “If a go ɔp na ɛvin, yu de de; if ivin a day, dɔn dɛn bɛr mi, yu go de de.”
Tru: Dis skripchɔ nɔ de tɔk bɔt di say we Gɔd de, bɔt i de tich se no say nɔ de we wi go de we Gɔd nɔ go ebul fɔ ɛp wi.
a Di Baybul sho se Jiova na Gɔd in nem.