We Una De Ol

1, 2. (a) Wetin-ɛn-wetin kin chenj as pipul dɛn de ol? (b) Di tɛm we dɛn bin de rayt di Baybul, aw di wan dɛn we bin de du wetin Gɔd want bin ɛnjɔy dɛn ol ej?

BƆKU tin dɛn kin chenj we wi de ol. Wi kin wik, ɛn wi nɔ kin gɛt bɛtɛ trɛnk. We wi luk wisɛf na glas, i kin sho se wi dɔn gɛt layn layn dɛn na wi fes ɛn smɔl smɔl wi de gɛt wet ia, wi nɔ kin ivin gɛt bɛtɛ ia na wi ed. Wi nɔ kin mɛmba sɔntin dɛn. Nid go de fɔ gɛt nyu padi dɛn we di pikin dɛn mared, ɛn we dɛn bɔn dɛn yon pikin dɛn. Sɔm dɛn we dɔn lɛf fɔ wok kin gɛt fɔ stat fɔ liv difrɛn we.

² Fɔ tru, i nɔ kin izi we yu de ol. (Ɛkliziastis 12:​1-8) Stil i go fayn fɔ tink bɔt Gɔd in savant dɛn we bin de di tɛm we dɛn bin de rayt di Baybul. Pan ɔl we dɛn bin ɛnd ɔp fɔ day, dɛn bin gɛt sɛns ɛn bin de ɔndastand, dat bin mek dɛn ɛnjɔy gud gud wan we dɛn dɔn ol. (Jɛnɛsis 25:​8; 35:​29; Job 12:​12; 42:​17) Wetin bin ɛp dɛn fɔ mek dɛn gɛt gladi at we dɛn de ol? Na we dɛn bin de fala di advays dɛn we de insay di Baybul we wisɛf de rid naw.—Sam 119:​105; Sɛkɛn Lɛta To Timoti 3:​16, 17.

3. Us advays Pɔl bin gi fɔ di wan dɛn we dɔn ol?

³ We di apɔsul Pɔl bin rayt lɛta to Taytɔs, i bin gi fayn advays to di wan dɛn we bin dɔn de ol. I bin rayt se: “Tɛl di bigman dɛn se dɛn fɔ soba, dɛn fɔ gɛt sɛns, ɛn dɛn fɔ de kɔntrol dɛnsɛf; dɛn fɔ ol Gɔd traŋa wan, dɛn fɔ lɛk fɔ du gud ɛn dɛn fɔ ebul bia wɛn dɛn de sɔfa. Semweso, tɛl di big uman dɛn se dɛn fɔ de du lɛkɛ aw dɛn uman we de waka wit Gɔd fɔ du. Dɛn nɔ fɔ tɔk bad bɔt pipul, dɛn nɔ fɔ drink sote dɛn nɔ ebul lɛf wayn igen. Dɛn fɔ de lan pipul dɛn tin we gud fɔ dɛn.” (Taytɔs 2:​2, 3) We yu fala dɛn advays dɛn ya, i go ɛp yu fɔ bia wit prɔblɛm dɛn we yu de ol.

AJƆST WE YU PIKIN DƐN GO DE FƆ DƐNSƐF

4, 5. Aw bɔku mama ɛn papa dɛn kin fil we dɛn pikin dɛn kin go de fɔ dɛnsɛf? Aw sɔm pan dɛn dɔn ajɔst we dɛn tin dɛn ya apin?

⁴ We yu de chenj di we aw yu de liv, dat min se yu gɛt fɔ ajɔst. Na tru se we yu pikin dɛn go de fɔ dɛnsɛf ɛn we dɛn mared yu gɛt fɔ ajɔst di we aw yu de liv! Fɔ bɔku mama ɛn papa dɛn, dis na di fɔs tin we kin mɛmba dɛn se dɛn dɔn bigin ol. Pan ɔl we mama ɛn papa dɛn kin gladi we dɛn pikin dɔn big, sɔntɛnde, dɛn kin wɔri if dɛn bin rili tren dɛn pikin dɛn fɔ ebul fɔ liv fɔ dɛnsɛf. Ɛn sɔntɛnde, dɛn kin fil am we dɛn pikin dɛn nɔ de wit dɛn na os.

⁵ Fɔ tru, mama ɛn papa dɛn kin kɔntinyu fɔ bisin bɔt dɛn pikin dɛn pan ɔl we dɛn nɔ de na os igen. Wan mama bin tɔk se: “Ilɛksɛf dɛn jɔs kɔl fɔ mek a no se dɛn wɛl, dat kin mek a gladi.” Wan papa bin tɔk se: “I nɔ bin izi fɔ mi we mi gyal pikin go de fɔ insɛf. Wi bin rili mis am na di famili bikɔs wi ɔl bin de du tin togɛda.” Aw dɛn mama ɛn papa dɛn ya dɔn ebul fɔ bia we dɛn pikin dɛn nɔ de na os wit dɛn igen? Dɛn dɔn ebul fɔ bia bay we dɛnsɛf de tray fɔ du ɔl wetin dɛn ebul fɔ ɛp ɔda pipul dɛn.

6. Wetin go ɛp famili dɛn fɔ gɛt tayt padi biznɛs ɛn du tin di rayt we?

⁶ We pikin dɛn mared, di tin dɛn we dɛn mama ɛn papa dɛn yus fɔ du kin chenj. Jɛnɛsis 2:​24 se: “Na fɔ dis mek man go lɛf in mama ɛn papa ɛn go de wit in wɛf, ɛn dɛn tu go bi wan.” We dɛn mɛmba di advays we di Baybul gi bɔt aw fɔ de oba di famili ɛn fɔ mek kɔntrol go de, dat go ɛp mama ɛn papa dɛn fɔ du tin di rayt we.—Fɔs Lɛta Fɔ Kɔrint 11:​3; 14:​33, 40.

7. Us fayn we wan papa bin biev we in gyal pikin dɛn bin mared?

⁷ Afta we wan man ɛn in wɛf dɛn gyal pikin dɛn bin mared ɛn go de wit dɛn man dɛn, dɛn mama ɛn papa dɛn fil se dɛn dɔn lɔs sɔntin na dɛn layf. Fɔs di papa nɔ bin lɛk di man dɛn we in gyal pikin dɛn mared to. Bɔt as i mɛmba di advays we di Baybul gi bɔt fɔ de oba famili, i bin kam fɔ no se na in gyal pikin dɛn man dɛn gɛt di wok naw fɔ de oba dɛn famili dɛn. So we in gyal pikin dɛn kin aks am fɔ advays, i kin aks dɛn wetin dɛn man dɛn tink bɔt dat, ɛn i kin mek shɔ se i sɔpɔt in gyal pikin dɛn man dɛn. Naw in gyal pikin dɛn man dɛn si am as padi ɛn dɛn kin gladi fɔ tek in advays.

8, 9. Aw sɔm mama ɛn papa dɛn dɔn tray fɔ ajɔst we dɛn pikin dɛn dɔn rich fɔ de fɔ dɛnsɛf?

⁸ Wetin go apin if pɔsin jɔs mared we nɔ de du natin we go pwɛl Gɔd in lɔ, bɔt nɔ gri fɔ du wetin in mama ɛn papa dɛn tink se na di bɛst tin fɔ du? Wan maredman ɛn in wɛf we gɛt pikin dɛn we dɔn mared bin tɔk se: “Wi kin ɛp dɛn ɔltɛm fɔ si tin di we aw Jiova de si am bɔt if wi nɔ gri wit wetin dɛn disayd fɔ du, wi kin sɔpɔt ɛn ɛnkɔrej dɛn fɔ du wetin dɛn want.”

⁹ Na sɔm say dɛn na Eshia, i nɔ kin izi fɔ sɔm mama dɛn fɔ rili biliv se dɛn bɔy pikin dɛn fɔ de fɔ dɛnsɛf. If dɛn rɛspɛkt wetin di Baybul se bɔt aw di famili fɔ de ɛn udat fɔ de oba di famili, dɛn go si se dɛn nɔ go de gɛt bɔku prɔblɛm dɛn wit dɛn bɔy pikin dɛn wɛf dɛn. Wan Kristian uman bin kam fɔ no se we in bɔy pikin dɛn mared ɛn de fɔ dɛnsɛf dat “kin mek i rili gladi.” I kin gladi we i de si in pikin dɛn de manej dɛn yon famili dɛn. Dɔn dis de mek dɛn nɔ gɛt bɛtɛ wok fɔ du ɛn nɔ de tink tumɔs as dɛn de ol.

UNA DU TIN WE GO MEK UNA ƐNJƆY UNA MARED-OS!

10, 11. Us advays de na di Baybul we go ɛp pipul dɛn we dɔn bigin ol nɔ fɔ de fil bad bɔt dɛnsɛf?

¹⁰ Bɔku pipul dɛn kin fil difrɛn we dɛn kin rich 45 to 64 ia. Sɔm man dɛn kin drɛs di kayn we, we go mek dɛn luk yɔŋ bak. Bɔku uman dɛn kin wɔri bɔt di tɛm we kin rich we de mek dɛn nɔ ebul fɔ bɔn igen. I sɔri fɔ no se sɔm pipul dɛn we ol 45 to 64 ia kin lɛk fɔ mek dɛn man ɔ dɛn wɛf dɛn vɛks bay we dɛn kin bigin mek lɛk se dɛn want yɔŋ bɔy ɔ yɔŋ gyal dɛn. Man dɛn we de fred Gɔd dɛn “ed fɔ stɛdi” we go mek dɛn nɔ tink bɔt rɔng tin dɛn. (Pita In Fɔs Lɛta 4:​7) Semweso, machɔ uman dɛn de kɔntinyu fɔ du ɔl wetin dɛn ebul fɔ mek dɛn mared-os go bifo, bikɔs dɛn lɛk dɛn man dɛn ɛn dɛn want fɔ du wetin Jiova want.

¹¹ Wan Kiŋ we nem Lɛmuɛl bin prez “gud wɛf” we “nɔ de taya fɔ du gud to di man ɛn nɔ de ambɔg am atɔl.” Maredman we na Kristian go gladi we in wɛf de tray fɔ bia wit tin dɛn we de mɔna am we i ol lɛk 45 to 64 ia. Di lɛk we i lɛk am go mek i “prez am.”—Prɔvabs 31:​10, 12, 28.

12. As tɛm de go aw maredman ɛn in wɛf go ebul fɔ kam nia dɛnsɛf mɔ ɛn mɔ?

¹² Di tɛm we una de mɛn di pikin, una ɔl tu go dɔn gladi fɔ pe atɛnshɔn mɔ to wetin di pikin dɛn nid. Afta dɛn dɔn de fɔ dɛnsɛf na da tɛm de unasɛf fɔ pe atɛnshɔn bak to una mared. Wan maredman bin tɔk se: “We mi gyal pikin go de fɔ insɛf, a bin bigin fɔ wach mi wɛf bak lɛk di tɛm we wi bin de wach wisɛf fɔ mared.” Wan ɔda maredman se: “Wi bisin bɔt wisɛf ɛn wi kin mɛmba wisɛf bɔt wi wɛlbɔdi wan ɛn fɔ de ɛksasayz.” Fɔ mek dɛn nɔ go fil lɛk se na dɛn nɔmɔ de, in ɛn in wɛf kin de du gud to pipul dɛn na di kɔngrigeshɔn. Na tru se we wi sho se wi bisin bɔt ɔda pipul dɛn we kin gɛt bɔku blɛsin dɛn. Apat frɔm dat, i de mek Jiova gladi.—Lɛta Fɔ Filipay 2:​4; Di Ibru Pipul Dɛn 13:​2, 16.

13. We una nɔ ayd ɛnitin pan unasɛf ɛn we una de tɔk tru to unasɛf, aw dat kin ɛp maredman ɛn in wɛf as dɛn de ol?

¹³ Maredman ɛn mareduman nɔ fɔ alaw ɛnitin fɔ mek dɛn nɔ de tɔk. Una go de tɔk tru to unasɛf. (Prɔvabs 17:​27) Wan maredman bin tɔk se: “Wi kin ɔndastand wisɛf mɔ bay we wi de kia fɔ wisɛf ɛn tek tɛm aw wi de du tin”. In wɛf gri wit dat ɛn i tɔk se: “As wi de ol, wi kin ɛnjɔy fɔ drink ti togɛda, fɔ tɔk to wisɛf, ɛn fɔ sɔpɔt wisɛf.” We una nɔ de ayd ɛnitin pan unasɛf ɛn we una de tɔk tru to unasɛf, dat de mek una mared strɔng ɛn dat de mek Setan we de pwɛl mared, nɔ ebul fɔ pwɛl una yon.

UNA ƐNJƆY UNA GRANPIKIN DƐN!

14. Wetin Timoti in grani bin du we sho se i bin tren am fɔ bi gud Kristian?

¹⁴ Granpikin dɛn kin mek di wan dɛn we dɔn ol, “gladi.” (Prɔvabs 17:​6) Fɔ spɛn tɛm wit granpikin dɛn kin rili fayn, i kin mek pɔsin fil yɔŋ ɛn i kin fil gud. Di Baybul tɔk fayn tin bɔt wan grani we nem Lɔys ɛn in gyal pikin we nem Yunis, we bin ɛp fɔ tich Timoti we na bin granpikin. Timoti bin gro ɔp ɛn kam fɔ no se in mama ɛn in grani bin valyu di tru tin dɛn we de na di Baybul.—Sɛkɛn Lɛta To Timoti 1:​5; 3:​14, 15.

15. Aw grani ɛn granpa dɛn go ɛp dɛn granpikin dɛn? Bɔt wetin dɛn nɔ fɔ du?

¹⁵ Dis na spɛshal eria we grani ɛn granpa dɛn kin ɛp. Grani ɛn granpa dɛn una bin dɔn tich una pikin dɛn bɔt di tin we Jiova bin dɔn se i go du fɔ mɔtalman. Naw una kin ebul fɔ du di sem tin fɔ una granpikin dɛn! Bɔku pikin dɛn kin gladi we dɛn grani ɛn granpa dɛn kin tɛl dɛn bɔt stori dɛn we de na di Baybul. Bɔt una nɔ fɔ du di wok we na di papa dɛn fɔ du dat na fɔ tich pikin dɛn bɔt di Baybul. (Ditarɔnɔmi 6:​7) Bifo dat, na ɛp una de dɛn. We una de pre una fɔ pre lɛk wan pan di man dɛn we bin rayt di Sam buk. I bin pre se: “PAPA GƆD, duya, lɛkɛ aw a dɔn ol so ɛn mi ia ɔl dɔn wet nɔ ib mi oba, de wit mi lɛ a tɛl di nɛks jɛnareshɔn bɔt ɔl di wɔndaful tin we yu dɔn du ɛn tɔk bɔt aw yu gret to jɛnareshɔn we nɔ bɔn yet.”—Sam 71:​18; 78:​5, 6.

16. Aw grani ɛn granpa dɛn go mek prɔblɛm nɔ de na di famili?

¹⁶ I sɔri fɔ no se sɔm grani ɛn granpa dɛn kin pwɛl dɛn granpikin dɛn ɛn dat kin kam wit prɔblɛm bitwin dɛn ɛn dɛn yon pikin dɛn we dɔn big. Bɔt we yu sho se yu rili bisin bɔt yu granpikin dɛn dat kin mek am izi fɔ mek yu granpikin dɛn tɔk to yu bɔt tin dɛn we dɛn nɔ kin want fɔ tɛl dɛn mama ɛn papa dɛn. Sɔntɛnde, di pikin dɛn kin op se dɛn grani ɔ dɛn granpa dɛn go sɔpɔt dɛn pan sɔntin we dɛn mama ɛn papa dɛn nɔ gri wit. Wetin fɔ du? Sho se yu gɛt sɛns ɛn ɛnkɔrej yu granpikin dɛn fɔ de tɛl dɛn mama ɛn papa dɛn tin dɛn we de apin to dɛn. Yu kin ɛksplen to dɛn se na dat de mek Jiova gladi. (Lɛta Fɔ Ɛfisɔs 6:​1-3) If nid de, yu kin ivin mek we fɔ di pikin dɛn bay we yu tɔk to dɛn mama ɛn papa dɛn bɔt di tin dɛn we de apin to dɛn. Tɛl yu granpikin dɛn di tru bɔt ɔl di tin dɛn we yu bin dɔn lan. We yu tɛl dɛn di tru ɛn nɔ ayd ɛnitin pan dɛn, dat go bɛnifit dɛn.

AJƆST AS YU DE OL

17. Aw Kristian dɛn we dɔn ol go mekɔp dɛn maynd fɔ falamakata wan pan di man dɛn we rayt di Sam buk?

¹⁷ As yu de ol, yu go kam fɔ no se yu nɔ go ebul fɔ du ɔl di tin dɛn we yu dɔn yus fɔ du ɔ ɔl di tin dɛn we yu want fɔ du. Wetin go mek pɔsin rili gri se i dɔn bigin fɔ ol? Na yu maynd yu go de tink se na 30 ia yu ol, bɔt we luk yusɛf na glas yu go kam fɔ no se di we aw yu de tink i difrɛn frɔm udat yu bi. Nɔ fil bad. Wan pan di man dɛn we rayt di Sam buk bin beg Jiova se: “Nɔ ib mi oba bikɔs a dɔn ol; nɔ fɔsek mi bikɔs a nɔ gɛt bɛtɛ trɛnk naw. . . . A nɔ go ɛva giv ɔp; a go de prez yu mɔ ɛn mɔ.” Mekɔp yu maynd fɔ falamakata wan pan di man dɛn we rayt di Sam buk.—Sam 71:​9, 14.

18. Aw machɔ Kristian dɛn go yuz dɛn tɛm fayn we dɛn lɛf fɔ wok?

¹⁸ Bɔku pipul dɛn kin dɔn rɛdi bifo tɛm fɔ du mɔ fɔ sav Jiova afta dɛn kin dɔn lɛf fɔ wok. Wan papa we dɔn lɛf fɔ wok bin tɔk se: “A plan bifo tɛm wetin a go du we mi gyal pikin dɔn skul. A mekɔp mi maynd fɔ yuz ɔl mi tɛm fɔ du di prichin wok, ɛn sɛl mi biznɛs so dat a go ebul fɔ sav Jiova mɔ. A pre to Jiova fɔ mek i sho mi wetin fɔ du.” If yu dɔn de rich ej fɔ mek yu lɛf fɔ wok yu go gɛt kɔrej frɔm wetin Jiova bin tɔk we i se: “Te we una dɔn ol so, na Mi na Im, ɛn te una pul wet ia, a go bɔn una.”—Ayzaya 46:​4.

19. Us advays di Baybul gi to di wan dɛn we de ol?

¹⁹ I nɔ kin izi fɔ ajɔst we yu dɔn lɛf fɔ wok. Di apɔsul Pɔl bin advays ol pa dɛn fɔ “soba.” Dis min se dɛn fɔ tek tɛm pan ɔl wetin dɛn de du, ɛn nɔ fala aw ɔda pipul dɛn de tink fɔ tek layf izi. We pɔsin dɔn lɛf fɔ wok, nid de fɔ mek i tren insɛf mɔ ɛn gɛt sɔntin we i de du ɔltɛm. Kip yusɛf bizi. Di Baybul se: “Una fɔ de du Gɔd in wok ɔltɛm, una no se ɛnitin we una de du fɔ Gɔd nɔ go go fɔ natin.” (Fɔs Lɛta Fɔ Kɔrint 15:​58) Du ɔl wetin yu ebul du fɔ de ɛp ɔda pipul dɛn. (Sɛkɛn Lɛta Fɔ Kɔrint 6:​13) Bɔku Kristian dɛn dɔn du dis bay we dɛn de prich di gud nyus wit zil bɔt dɛn de du am di we, we dɛn ebul. As dɛn de ol, “dɛn fɔ ol Gɔd traŋa wan, dɛn fɔ lɛk fɔ du gud ɛn dɛn fɔ ebul bia wɛn dɛn de sɔfa.”—Taytɔs 2:​2.

WETIN YU GO DU WE YU MAN Ɔ YU WƐF DAY?

20, 21. (a) Wetin kin mek wande wande man ɛn in wɛf pat? (b) Aw Ana in fayn ɛgzampul go ɛp pɔsin we in man ɔ in wɛf dɔn day?

²⁰ I sɔri fɔ no, bɔt na tru se insay dis wɔl we wi de day kin mek wande wande maredman ɛn in wɛf pat. Pɔsin we na Kristian we in man ɔ in wɛf dɔn day no se di wan dɛn we dɛn lɛk de slip, ɛn dɛn biliv se dɛn go si dɛn bak. (Jɔn 11:​11, 25) Bɔt stil dɛn kin fil am. Wetin di wan we in man ɔ in wɛf dɔn day go du?a

²¹ We yu tink bɔt sɔm pipul dɛn we bin de di tɛm we dɛn bin de rayt di Baybul, dat go ɛp yu. Ana in man day sɛvin ia afta dɛn mared, ɛn i bin ol 84 ia di tɛm we di Baybul tɔk bɔt am. Wi shɔ se i bin fil am we in man day. Wetin i bin du? I bin de sav Jiova Gɔd na di tɛmpul de ɛn nɛt. (Lyuk 2:​36-38) Di we aw i bin de pre ɛn sav Jiova bin tan lɛk mɛrɛsin we bin ɛp am di tɛm we in man day.

22. Aw sɔm pipul dɛn we dɛn man dɛn ɔ wɛf dɛn dɔn day bin ebul fɔ bia?

²² Wan uman we ol 72 ia, we in man dɔn day fɔ tɛn ia naw bin tɔk se: “Di tin we de mɔna mi pas ɔl na we a nɔ gɛt patna fɔ tɔk to. Mi man na bin pɔsin we de rili lisin we pɔsin de tɔk. Wi kin tɔk bɔt di kɔngrigeshɔn ɛn bɔt wi prichin wok.” Wan ɔda uman we in man dɔn day tɔk se: “Pan ɔl we tɛm kin mek pɔsin bigin fil bɛtɛ, a dɔn kam fɔ no se na wetin pɔsin du wit in tɛm na in go ɛp am fɔ mek i fil bɛtɛ. Yu gɛt mɔ chans fɔ ɛp ɔda pipul dɛn.” Wan man we ol 67 ia we in wɛf dɔn day bin gri wit dat ɛn i bin tɔk se: “Di bɛst we fɔ ebul bia we yu pɔsin day na we yusɛf tray fɔ kɔrej ɔda pipul dɛn.”

GƆD VALYU OL PIPUL DƐN

23, 24. Us fayn tin di Baybul tɔk we go ɛp ol pipul dɛn, mɔ di wan dɛn we dɛn man ɔ wɛf dɛn dɔn day?

²³ Pan ɔl we day kin mek maredman ɛn in wɛf pat, Jiova fetful ɔltɛm. Kiŋ Devid bin siŋ se: “Na wan tin nɔmɔ mi at de pan, ɛn nain a de beg PAPA GƆD fɔ; dat na sote a day, mek a go de wok nain os, so dat a go ɛnjɔy in gudnɛs ɛn a go du wetin i want.”—Sam 27:​4.

²⁴ Di apɔsul Pɔl bin advays se: “Yu fɔ rɛspɛkt dɛn mared uman we dɛn man dɔn day, we nɔ gɛt nɔbɔdi fɔ ɛp dɛn.” (Fɔs Lɛta To Timoti 5:​3) Di advays we de afta dis sho se if uman dɛn de we dɛn man dɔn day bɔt we nɔ gɛt no fambul fɔ ɛp dɛn, di kɔngrigeshɔn kin ɛp dɛn. Bɔt we dɛn yuz di wɔd “rɛspɛkt” dat min se una fɔ valyu dɛn. Di wan dɛn we dɛn man ɔ wɛf dɔn day kin gɛt kɔrej we dɛn no se Jiova valyu dɛn ɛn i go ɛp dɛn fɔ bia!—Jems 1:​27.

25. Us chans ol pipul dɛn stil gɛt?

²⁵ Gɔd in Wɔd tɔk se: “Dɛn de kɔle mɔ pan olpa fɔ in wet ia.” I tɔk bak se: “Wet ia de sho ol ej ɛn ɛkspiriɛns” mɔ we pɔsin “waka tret na PAPA GƆD in yay.” (Prɔvabs 16:​31; 20:​29) Kɔntinyu fɔ put Jiova fɔs na yu layf ilɛk yu mared ɔ yu nɔ mared igen. Gɔd go blɛs yu naw ɛn yu gɛt di chans fɔ gɛt layf na di wɔl we pipul dɛn nɔ go ol igen.—Sam 37:​3-5; Ayzaya 65:​20.