• Sam 63:diomnda taselaŋ-11
    Baabuiyo-Hivioo le Chieeŋ Sɛnɛiyo

    • Chondii Deeve soli, teleŋ o wa o pollo niŋ Chuda wo.+

      63 Oo Mɛlɛka, num cho Mɛlɛka nuu ni. Le teleŋ o teleŋ I cho num nuuviaa.+

      Yeemɛi cho ya bɔɔ le num.+

      Dialloŋ vi ya pɛ, kanifuule yeemɛi numnde cho ya bɔɔ.

      I cho o lɛŋnde vesɛileŋ niŋ, naa mɛŋma cho le wa.+

       2 Lelaŋ, mi tofa naa ŋ cho o fondaŋ num diandaa wa,

      Mi cha kpaaya numndo a tɔɔmayɛi numnde.+

       3 I cho num saŋgala a chɔchɔŋ nuŋ,+

      Kanifuule kaala lo lechoo numndo bɛnda mbo hiau yoomoo.+

       4 Lelaŋ, I cho num saŋgala haaa a yoomu nuu mɛɛlulaŋ.

      I cho balaŋ heelu mi piɛi o diola numndaŋ niŋ.

       5 I hini bɔɔ kɔl a sɔɔŋ kɛndɛŋ ŋ tosal la woŋ.

      Lelaŋ, I cho num chondoŋ solul, mi saŋgala num a kɔl kɛndɛ.+

       6 Te I wa pɛ ihini o kpele nuu choo, mi loonuŋ a num.

      Ichɔl pii pii I lɔl yiyaŋndo a num okɔɔ.+

       7 I cho chonduŋ kɔl kɛndɔŋ soli o wundule kumbaŋnda numndaŋ bɛŋgu,+

      Kanifuule num cho wana ni malaa ni.+

       8 I cho num holnɔŋ fɛlɛkpɛkpɛ,

      Kanifuule a saa ya a ba num kɛndɔɔ kpiŋ.+

       9 Kɛ wanaa cho ya nuuviaa le ya diyɔɔ wa,

      A cho tolɔɔ o lɛŋndeŋ bɛŋgu di.

      10 A cho nda malɔɔ kpaaya muɛi faŋnde o ba,

      Ma simnuŋ nyɛdiaa le tuŋaa yonduaa.

      11 Masaa cho wa a kɔl kɛndɛ le sɔɔŋ Mɛlɛka cho ndu tosallo woŋ.

      Wana o wana mɛnaŋ pɛ o ndu niŋ, o cho bɛɛleŋ sɔla.

      Kanifuule, o cho sondola wanaa dimi choolaŋ nda kiindiaa.