Koloniko Diiŋ Ndɔɔ

12 Dimioo nuaa mi masale Luihobowam ndeŋ le sim yi+ nduyɛ mbo sɔla kpaayaa, mbo mal Sawala Chɛhowa laŋ,+ okoŋ mi Isɔluɛiyaa tuaa kpou tual ndu kɔɔli. 2 O wɔsi ŋuɛɛnu ndɔ Masaa Luihobowam wa o masaleŋ choo wo, mi Sisiaki+ masaa le Ichipi huŋ chiŋalaŋ Chulusalɛm a sɔŋgɔɔ, le mɛɛ nda kɛɛ Chɛhowa lo lechoo wo chɔmndo yɛ. 3 Ndoo nɔ nyɛm nyaanaŋ suaa naŋndoŋ 1,200, wanaa nyaanuŋ suaa wa 60,000, a puaa chɔuwa a hɔbɛi, a o fula Ichipi, Liibiaa, Sɔkiam, a Itoopiaa+ wa. 4 Mbo biu biu chiooŋ nɔ kpakila kala kalalaŋ o Chuda niŋndoŋ, nduyɛ o mɛɛlulaŋ kpɔŋ mbo fuuluu Chulusalɛm.

5 Mi Siɛmaya,+ wana suaa le Mɛlɛka wo kua naa Luihobowam a waŋ banaa o Chuda niŋ chua. A wa a chuuŋgiaŋ Chulusalɛm le mɛɛ nda wa a siooŋnde le Sisiaki yɛ. Mbo dimul nda aa: “Nyɛ Chɛhowa dimi wo cho hoo ni, ‘Le mɛɛ nya mal la yɛ, ya bɛɛ I mal nya+ Sisiaki o ba.’” 6 Le hei, mi waŋ banaa a masaa o Isɔluɛi niŋ tusiŋ+ ma dimi aa: “Chɛhowa cho sakpo.” 7 Mɛɛ Chɛhowa che maa a tusiŋ, mi Chɛhowa dimul Siɛmaya aa: “Waŋnda haa tusiŋ. Lelaŋ, I cho lɛ nda tɛɛmbuu le.+ Nduyɛ o teleŋ biŋgi bɛŋgu, I cho nda piŋi. I cho lɛ Sisiaki soliŋ kpeku mi tusi Chulusalɛm kɔl ni tuuwo choo le. 8 Kɛ a cho simnɔŋ buɛiyaa nduaa, le ma sina maa o cho fisa ma wa ya o ba bɛŋgu, mbo hiau waa masaa o lɛŋii cheleŋnde niŋ o ba bɛŋgu.”

9 Okoŋ, mi Sisiaki masaa le Ichipi huŋ del Chulusalɛm choo. Mbo chua nyɛm baa kalaŋ o chiɛi Chɛhowa wo niŋ,+ a muŋ o chiɛi lemasaa niŋ. Mbo chua nyɛ o nyɛ fee, kɔ bii a boola chɔula ŋkoolii Sɔlɔmɔŋ toosiaa laŋ.+ 10 Mi Luihobowam toosiaa boola chɔula cheleŋ a chiliŋii siaŋɛi.* Okoŋ mbo chua laŋ, mbo ke waŋ banaa wanaa ndaa manda dioo le luɛiyɔɔ o chiɛi lemasaa wa. 11 Teleŋ o teleŋ masaa ndoo wa pɛ kɔlaŋ o chiɛi Chɛhowa wo, mi puaa ndaa manda diolaŋ nda chua boola chɔula laŋ ma kuɛ nda ndaa. Okoŋ kɔɔli, ma miŋgi laŋ pila o fondaŋ la wa wo. 12 Le mɛɛ masaa tusiŋ yɛ, mi tumbe Chɛhowa dɔɔnuŋ a ndu wo pɔlul.+ Le hei, o tɛɛmbuu lɛ nda kpata kpata le.+ O faŋaŋ okoŋ kɔɔli, nyɛm kɛndɛŋ cheleŋ wa wɔ o Chuda niŋ.+

13 Mi Masaa Luihobowam chɔɔlu kpaayaa sɔla o Chulusalɛm niŋ, nduyɛ mbo hiau lachi a waa o masaleŋ choo. Luihobowam wa wɔsilaŋ 41 mbo simnuŋ masaa, nduyɛ mbo chii wɔsilaŋ 17 o masaleŋ choo Chulusalɛm, chiee Chɛhowa hɛli o kaalaŋ Isɔluɛi tɛɛŋ kpou le mi diola ndɔlaŋ la wa loŋ ndo. Masaa Luihobowam kala ndɔ ndoo nɔ diolaŋ ni aa Naama, Amɔnaitiinɔɔ.+ 14 Kɛ mbo tosa nyɛ bɛnda le wo kanifuule o kɛɛsiaŋ o kɔl le Chɛhowa nuuviaa le.+

15 Sɔɔŋ cho a Luihobowam okɔɔ woŋ, chɔŋ o kandɔŋndo haaa o mɛɛlulaŋ, ŋ cho ŋ poonyiaa o yau Siɛmaya+ wana suaa le Mɛlɛka wo poonyiaa wo niŋ, miŋ wa vɛlɛ ŋ poonyiaa kpɛ kpɛ o lepula o yilaŋuŋ Idɔɔ+ wana suaa le Mɛlɛka wo poonyiaa woŋ niŋ. Nduyɛ le teleŋ o teleŋ, chɔuwo wa Luihobowam nda Chɛlobowam tɛɛŋ.+ 16 Okoŋ kɔɔli, mi Luihobowam wu,* ma kumbu ndu o Chiee Deeve Wo.+ Nduyɛ, mi Abaicha po ndɔ+ miiŋgu o masaleŋ choo o foofo ndɔɔ.