Lanɔɔ Lɔtu Nuaŋnuŋ Kɔɔli

LƆTU a yungu ndɔɔ kpou wa latulu a Ebilaham o lɛŋnde Kenaŋndeŋ niŋ. Paale pilɛ mi Ebilaham dimul Lɔtu aa: ‘Lɛŋndeŋ ndeŋ le cho le bɔɔ le chɔluaa naa haa le. Lelaŋ yandii, ŋ piɔuwaŋ tɛɛŋ. Te num kuɛ o baa hoo choo ni, ya I kuɛ o baa pilɔɔ choo.’

Mi Lɔtu chua hɔlla mbo mɛɛndaŋ lɛŋndeŋ. O lɛŋnde leŋ niŋ, mbo cha fondaŋ kɛndɛ bɛndoo pila. Mɛŋndaŋ ma wa loŋ vɛlɛa bil kiyɛiyo o hɔbɛi le chɔluaa nduaa. Tanda Chɔɔdaŋndo wa yɛ fondaŋ koŋ ni. Okoŋ mi Lɔtu kuandu yungu ndɔɔ a chɔluaa nduaa kpou ma kua loŋ. Mi Sodɔm simnuŋ niko chiee ndaa.

Kɛ wanaa wa Sodɔmnda dɛnɛ wɔɔŋndo pila ndaa nɔ ni. Mi hei tɛɛmbuu Lɔtu kɔllo tau, kanifuule wana kɛndɔɔ ndu wa ni. Mi Mɛlɛka bɛɛ tambu kɔl tau. O mɛɛlulaŋ kpɔŋ, mi Mɛlɛka viam maalikɛiya nda ŋiɔɔŋ le Lɔtu dimullo maa, o cho hunɔɔ Sodɔm a Ŋgomola tɛɛmbuu le dɛnɛ nda wɔɔŋndo.

Mi maalikɛiya dimul Lɔtu aa: ‘Chua laanum a chuaa numaa ŋiɔɔŋnda mila faŋaŋ naŋ. Keleŋa chɔ chɔ!’ Kɛ mi Lɔtu a yungu ndɔɔ saaŋ tamalaa tosaa le faŋaŋndo. Le hei mi maalikɛiya saaliaa nda balaŋ kpau kpau ma faŋa nda chiee loŋ. Okoŋ kɔɔli mi maalikɛinɔɔ opilɛ dimul nda aa: ‘La nyaanuŋ le yoomula nyalaŋ! La kɔ kɛ. La nuaŋnuŋ kɔɔli le pa. La kɔ o pemboŋ kɛ, yɔŋi nya sɔla piɔmndo.’

Mi Lɔtu a chuaa nduaa laanduaa diikuŋ nduyɛ ma faŋaŋ Sodɔm a kiltaŋ. Nyɛɛmbɔ bɛɛ a sim ma pɛŋgi le, nduyɛ pesiŋ bɛɛ a nueŋnuŋ kɔɔli le. Kɛ lanɔɔ Lɔtu ndu diikuŋ kposoŋ te. Mɛɛ nda kuɛ tiŋ landaŋ a Sodɔm, mbo sim mbo nuaŋnuŋ kɔɔli. Okoŋ mi lanɔɔ Lɔtu simnuŋ suŋgbule ihɛlteŋ. A cho pa ndu chɔɔ o fotueiyo niŋ?

Ŋ pɛɛku tamasi kɛndɔɔ o hei niŋ. Hei cho naa chɔmndo maa, Mɛlɛka kiindiaa wanaa diikuŋ ndu wa. Kɛ wanaa diikuŋ ndu lia, mi yoomula ndalaŋ la hɛluŋnda.