Chiɛiyo le Chɛhowa

Mɛɛ Sɔlɔmɔŋ simnuŋ masaa le Isɔluɛi, Mi Chɛhowa nyuna ndu aa: ‘Yɛɛnɛ ŋ yeema yɛ mi ke num?’ Mi Sɔlɔmɔŋ muli aa: ‘I cho wɔ o bɔɔ le. nduyɛ I sina nyɛ ya cho tosaa wo le. Yandii, ke ya taasioo le mi bii wanaa num nda nyɛkɛndɛi.’ Mi Chɛhowa dimul ndu aa: ‘Le mɛɛ ŋ nyuna ya le taasioo yɛ, I cho tosa ma nɔ taasioo mbo hiou wana o wana o chieeŋndo choo. I cho vɛlɛ tosa ma simnuŋ wana sulaa bɛndu. Nduyɛ te a tuei ya diom pɛ, a cho viouwɔɔ yoomu o chieeŋndo choo.’

Mi Sɔlɔmɔŋ kandu chiɛi Mɛlɛkaa taŋgullo. Mbo soliŋ kooliŋ kɛndɛ kɛndɔŋ kpeku, kaniŋ humboŋ, yɔmnde, a poutaŋ. Puaa a waŋ laanduaa chaa wallo nyɛkɛndɛ kɛndɛi ya o waalaŋ niŋ tosa wallo o chiɛiyo hoo ni. A tosa wɔsilaŋ la ŋɔmmɛu ma chii chiɛiyo hoo taŋgul. Okoŋ, ma yeema le ndu malɔɔ Chɛhowa o ba. Ndoo nɔ bandu luamaa lasalaa, nduyɛ a salalaŋ lechoo. Mi Sɔlɔmɔŋ baŋ wulaŋ bandu koŋ lachi, mbo wa piɛileŋ aa: ‘Oo Chɛhowa, chiɛiyo hoo cho o bɔɔ le num te. Nduyɛ, o cho o sɔvɛ num o hɔl te. Kɛ yandii, yaŋ nilaŋ nduyɛ ma chɛl piɛile naaleŋ.’ Vɛɛ Chɛhowa ndoo yiyaŋ yɛ a chiɛi Sɔlɔmɔŋ taŋgullo, vɛlɛ a piɛile o piɛi o ndu lo leŋ? Dimioo nuaa Sɔlɔmɔŋ chii piɛileŋ, mi yiŋndeŋ le fula choo choo mi le huŋ lom salala wa o bandu luamaa lasalaa choo laŋ kpou. Mi hei chɔm kɛsɛ maa Chɛhowa hini kɔl a chiɛi Sɔlɔmɔŋ taŋgullo. Mɛɛ Isɔluɛiya che hei, ma duaunuŋ nyaale.

Mi Masaa Sɔlɔmɔŋ fula tɔɔ o Isɔluɛi niŋ kpou le taasi ndɔɔ, vɛlɛ a o fondaŋnda leviltaŋ o lɛŋndeŋ choo. Mi waŋnda ndaa hiŋ naa Sɔlɔmɔŋ chua, le mbo mala nda a bahawɛila ndalaŋ. Mi masa laandoo fula Siɛba, mbo huŋ nyuuniaa Sɔlɔmɔŋ nyunala kala kalalaŋ. Mɛɛ Sɔlɔmɔŋ muli nyunala ndɔlaŋ, mbo dimi aa: ‘Yaa laalaŋ nyɛ waŋnda dimul la a num okɔɔ wo le. Kɛ I che niŋ kɛsɛ maa a nɔ taasioo mbo hiau nyɛ nda dimul la a num okɔɔ wo. Chɛhowa Mɛlɛka numndo dɔu num sala.’ Yoomoo wa o kɛndɛ le waŋnda Isɔluɛi, nduyɛ a wa a kɔl kɛndɛ. Kɛ sɔɔŋ muŋ nɔ le siŋgaŋndo.