Masale Cho Wa le Fɛɛŋ a Fɛɛŋ Ndeŋ

Ichɔl pilɛ, mi Masaa Nɛbukanɛɛsa sɔl lɔma kɔndɔfiltaŋ. Mi siooŋnde bii ndu, nduyɛ o nɔla lɛ luaŋ ichɔl koŋ te. Okoŋ, mbo veelu wanaa nduaa maŋgalaa, mbo dimul nda aa: ‘La tɛɛsiaa la lɔma ya sɔl maŋ ndaŋ.’ Ma dimul ndu aa: ‘Masanɔɔ, chɔm naa lɔma ŋ sɔl laŋ.’ Mbo dimul nda aa: ‘Ɛ ɛ. La chɔm ya lɔma ya sɔl laŋ. Te o cho koŋ te, I cho nya diu diu.’ Ma dimul ndu vɛlɛ aa: ‘Num chɔm naa lɔma ŋ sɔl laŋ, okoŋ miŋ tɛɛsial num maŋ.’ Mbo dimul nda aa: ‘Nya kpou la cho kindiŋndo le ya huiyo. La chɔm ya lɔma ya sɔl laŋ.’ Ma dimul masaa aa: ‘Wana o wana cho o lɛŋndeŋ choo mbo tosa keŋ te. Wana nɔla nyɛ ŋ dimul naa hoo le tosaa wo tosa le.’

Mi Nɛbukanɛɛsa tuulu kɔl tau. Nduyɛ mbo dimi maa a diu diu wanaa taasiaa kpou o lɛŋndeŋ niŋ. O hei niŋ, Daaniɛɛ, Siɛduaa, Misiaki a Abɛniko bɛɛ ndaa nɔ le nda diyɔɔ. Mi Daaniɛɛ dimul masaa maa o ke ndu teleŋ pɔmbɔ. Okoŋ, mi Daaniɛɛ a chaaŋaa nduaa piɛi o Chɛhowa lo le mbo mala nda. Yɛɛ Chɛhowa ndoo tosa yɛ?

Mi Chɛhowa chɔm Daaniɛɛ lɔma sɔlaama Nɛbukanɛɛsa waŋ o yilaŋnde niŋ, nduyɛ mbo tɛɛsial ndu nyɛ ma sim ndo. Diimandɔɔ, mi Daaniɛɛ kua o buɛi masanɔɔ lo, mbo dimul ndu aa: ‘Diu wanaa taasiaa o kɛ kɛ le. I nɔla mi tɛɛsiaa lɔma o sɔl laŋ.’ Mi buɛiyo hoo kua a Daaniɛɛ naa masaa chua. Mi Daaniɛɛ dimul masaa aa: ‘Mɛlɛka chii num chɔm nyɛ cho yɔŋnɔŋ o chilaŋ niŋndo. Lɔma ŋ sɔl laŋ ma cho maŋ ni: Ma cha piɔm bɛndu bɛndoo isisi, nduyɛ bolle piɔm koŋ, a kooliiye nda toosiaa ndu ni. Piɔm koŋ takpa ndɔɔ, a kanii humbuei nda toosiaa ndu ni. Dembe ndɔɔ ni, lɔlula ndɔlaŋ ni, a kapaa nda toosiaa laŋ ni. Peluŋ ndɔŋ, a chiliŋnde nda toosiaa muŋ ni. Bɛŋgula ndɔlaŋ yɛ, chiliŋnde a puuloo nda muuliaŋ ni le laŋ toosiaa. Okoŋ mi pouwo fula o pembei choo, mbo huŋ lɔɔ piɔmndo hoo peloŋ. Mi piɔmndo hoo pesi pesi, mbo simnuŋ chundoo, okoŋ mbo kuaŋnuŋ o hueiye niŋ. Mi pou koŋ o simnuŋ pembii bɛndu bɛnduei, mi i tiu o lɛŋndeŋ choo.’

Okoŋ, mi Daaniɛɛ dimul masaa aa: ‘Lɔma ŋ sɔl laŋ, tɛɛsiaa ndɔɔ cho hoo ni: Masale numndeŋ le sim le bolle nda toosiaa a kooliiye ve. Takpa cho a kanii humbueiyo sim le masale cho num hunɔɔ kɔɔli leŋ. Kapaa sim le masale cheleŋ, nduyɛ le cho nɔ kpaayaa lɛŋndeŋ choo kpou. Masale cheleŋ o leŋ kɔɔli le cho nɔ kpaayaa maa chiliŋnde. O mɛɛlulaŋ kpɔŋ, masale cheleŋ le cho wa, kɛ mi le piɔunuŋ tɛɛŋ. Kpeŋgei i pilɛ cho wa i kala maa ichiliŋ, nduyɛ mi kpeŋgei i pilɛ i wa maa puulu. Pou ŋ che koŋ mbo simnuŋ pembei yo cho Masale Mɛlɛkaleŋ ni. Masale leŋ le cho hunɔɔ masɛi hei kpou tɛɛmbuu, okoŋ mi le lo le fɛɛŋ a fɛɛŋ.’

Mi Nɛbukanɛɛsa baŋ wulaŋ Daaniɛɛ lachi, mbo tundu hɔlla lɛŋ. Mbo dimi aa: ‘Mɛlɛka numndo chɔm num lɔma sɔlaŋ maŋ ni. Mɛlɛka o mɛlɛka cho maa ndu le.’ Nɛbukanɛɛsa dii lɛ Daaniɛɛ le, kɛ mbo kɛsi ndu wanaa kɔl kaluaa kpou bolleŋ, nduyɛ mbo siiŋguu ndu masaa o Babilɔŋ niŋ. Ma cha pa mɛɛ Chɛhowa ndoo muli piɛile Daaniɛɛ leŋ yɛ?