Masaleŋ Maa Yɔm Bɛndu Bɛndoo

Ichɔl pilɛ, mi Nɛbukanɛɛsa sɔl luaŋ, nduyɛ mi siooŋnde bii ndu tau. Mbo veelu wanaa nduaa taasiaa le ma tɛɛsial ndu nyɛ ma sim ndo. Kɛ, wana o wana tiuba mbo tɛɛsial ndu maŋ te. O mɛɛlulaŋ kpɔŋ, mbo dimul Daaniɛɛ a maŋ okɔɔ.

Mi Nɛbukanɛɛsa dimul Daaniɛɛ aa: ‘I wa I hini, mi sɔl luaŋ, mi cha yɔmndo. Mi yɔmndo hoo lo bandei haaa mbo fuuluu o hala di. Wanaa lo ba o ba fee o chieeŋndo choo ma che ndu. Yɔmndo hoo wa o puiyaa yukɔŋ, nduyɛ ndoo kom tau. Visiaa wa pɛŋgioo o wunduma nduaŋ bɛŋgu, nduyɛ youwa wa waaŋnde taŋgullo o lɛuwuŋ ndɔŋ. Okoŋ, mi maalikɛinɔ Mɛlɛkaa fula choo choo mbo deŋi aa: “La kioŋ yɔmndo hoo, mi la kili kili lɛuwuŋ ndɔŋ. La mal chiyii nduɛi a puunduŋ ndɔŋ ŋ luɛiyaa lɛŋ, kɛ mi la yii ndi a chiliŋnde vɛlɛ a chiliŋii siaŋɛi. Kɔl iwana chieeyaa fula chiiye hei niŋ, mi kɔl ivisiyaa miiŋgu ndi niŋ. La mal ndi lende haaa mi teleŋndaŋ la ŋɔmmɛu hiou ndi choo, le halikpeŋ mi wanaa cho o lɛŋndeŋ choo wa sina maa Mɛlɛka cho Masaa le masale waŋnda chieeya ni. Wana o wana o yeema pɛ, ndu o ke masaleŋ ni.”’

Mi Chɛhowa chɔm Daaniɛɛ nyɛ luaŋ maŋ ma sim ndo. Mɛɛ Daaniɛɛ bii maŋ bila, mi siooŋnde bii ndu tau. Mbo dimi aa: ‘Fallo Masaa, yaa yiyaŋ ko maa a yaamɔɔwaa numnda okɔɔ luaŋ maŋ ma sim ni. Kɛ, a numpila okɔɔ kpeekpei ma cho ni. Yɔm bɛndu nda keŋ koŋ ndo sim le num. Masaleŋ le cho num hunɔɔ hiɔluŋ, ma de billo mɛɛ visiaa yonduaa dia ndu yɛ. Kɛ le mɛɛ maalikɛinɔ Mɛlɛkaa dimi maa a mal chiyii yɔm koŋ a puunduŋ ndɔŋ yɛ, a cho vɛlɛ hunɔɔ simnɔŋ masa.’

Wɔsioo o pilɛ okoŋ kɔɔli, Nɛbukanɛɛsa wa balɔɔ o chiɛi ndɔ lemasaa choo amaluaŋ, mbo wa Babilɔŋ mɛɛndaŋndo mi nyɔɔ hɛnaŋ ndu. Mbo dimi aa: ‘Tofawɔ chiee kɛndɛ kɛndɛ ya taŋgul lo. Nuawɔ se mɛɛ ya cho masa bɛndu yɛ!’ O lo suɛi lende, mi diomndo suaa o choo choo niŋ aa: ‘Nɛbukanɛɛsa! Masale numndeŋ le hɛluŋ num.’

O lepilɛ niŋ kpe, mi yiyaŋ iwana chieeyaa fulaŋ ndu niŋ, mbo simnuŋ maa visi yondo. Ma soli ndu o chiɛi ndɔ lemasaa niŋ, mbo kɔ wa yondoo niŋ nda visiaa. Mi yiinde bandu ndu naŋ chaa bɔɔla kowɔɔ ni. Nduyɛ yɛmbɔŋ ndɔŋ wa naŋ chaa yɛmbɔŋ youwaa biyaa ni.

Wɔsilaŋ la ŋɔmmɛu okoŋ kɔɔli, mi Nɛbukanɛɛsa miiŋgu o ndupila niŋ, okoŋ mi Chɛhowa siiŋguu ndu masaa le Babilɔŋ. Mi Nɛbukanɛɛsa dimi aa: ‘I saŋgala Chɛhowa o cho Masaa o choo choo niŋndo. I sina niŋ maa Chɛhowa cho Masaa ni. Wanaa heeluŋ nda, mbo tusi nda. Nduyɛ wana o wana o yeema pɛ, ndu o ke masaleŋ ni.’