Poonyiaa Cho o Chiɛiyo

Mɛɛ teleŋ tiŋ hiou, mi Bɛlsiaasa simnuŋ masaa le Babilɔŋ. Ichɔl pilɛ, mbo veelu laŋgbaa nduaa kalla o lɛŋnde leŋ niŋ 1,000 le nyɛdiaa dioo. Mbo dimul buɛiyaa nduaa le ma hiŋ a taalala ŋkooliila Nɛbukanɛɛsa ndoo chua o chiɛi Chɛhowa wo niŋ ndaŋ. Mi Bɛlsiaasa nda mialaa nduaa wa muɛiyaŋ kolɔɔ o taalalaŋ ndaŋ niŋ, nduyɛ ma wa mɛlɛkaa ndaa saŋgalaa. O lepilɛ niŋ kpe, ma cha mi ba wana pɔnɔɔ fula, mbo kandu diomnda kɔndɔfiltaŋ poonyiaa kpeŋgei pilɛi o chiɛi nda wa nyɛdiaa dioo wo niŋ.

Mi siooŋnde bii Bɛlsiaasa. Mbo veelu wanaa nduaa maŋgalaa, mbo chuel nda buŋgɛi aa: ‘Wana o wana tɛɛsiaa nyɛ diomndaŋ ndaŋ la sim ndo pɛ, I cho wana koŋ siiŋguu wana kpaaya yaa ndɔɔ o masale nileŋ niŋ Babilɔŋ. Ma kindiŋ, kɛ wana o wana tiuba mbo tɛɛsiaa nyɛ diomndaŋ ndaŋ la sim ndo le. Mi kala ndɔ luɛi, mbo dimul ndu aa: ‘Po pum cho diola ndɔlaŋ aa Daaniɛɛ. Ndu ndoo tɛɛsial Nɛbukanɛɛsa sɔɔŋ ni. O nɔla mbo tɛɛsial num nyɛ diomndaŋ ndaŋ le sim ndo.’

Mɛɛ Daaniɛɛ hiŋ naa Bɛlsiaasa chua, mbo dimul ndu aa: ‘Te a veelu diomndaŋ ndaŋ pɛ nduyɛ ma tɛɛsial la nyɛ la sim ndo, I wou num yɔɔwa ŋkooliiyo o labolo, nduyɛ I siiŋguu num wana kpaaya yaa ndɔɔ o masale nileŋ niŋ Babilɔŋ. Mi Daaniɛɛ dimi aa: ‘I yeema num nyɛ o nyɛ o ba le. Kɛ I cho num tɛɛsial nyɛ diomndaŋ ndaŋ la sim ndo. Nɛbukanɛɛsa finya num, yoŋgaa pila ndoo nɔ ni. Nduyɛ mi Chɛhowa tosa mbo tusiŋ. Numpila sina nyɛ o nyɛ yɔŋnuŋ a ndu. Kɛ, ma kɛɛ le Chɛhowa bɛɛleŋ kioo ma wa muɛiyaŋ kolɔɔ o taalala ŋkooliila nda soli o chiɛi ndɔɔ niŋndaŋ niŋ. Lelaŋ, Mɛlɛka poonyiaa diomndaŋ ndaŋ ni aa: Mɛnɛ, Mɛnɛ, Tikɛl, a Paasiŋ. Nyɛ diomndaŋ ndaŋ la sim ndo cho ni maa, Midiaŋnda a Paasiaŋnda cho hunɔɔ Babilɔŋ delɔɔ choo, nduyɛ fɛɛŋ bɛɛ a cho lɛ wa masa le.’

Waŋnda ndaa yiyaŋ ko maa wana o wana nɔla Babilɔŋ yomɔɔ a sɔŋgɔɔ le. Kanifuule chioo hoo wa o kpakioo niŋ, vɛlɛ a pee bɛndoo ndu o balaa. Kɛ ichɔl koŋ kpeekpei Midiaŋnda a Paasiaŋnda huŋ del Babilɔŋ choo ni. Mi Masa Paasiaŋnda diolaŋ aa Sailɔɔ muli mɛŋndaŋ hɔlla naa cheleŋ, le halikpeŋ mi puaa nduaa chɔuwa kuɛ o diola kpaki chioo. Mɛɛ nda fuuluu o kpakioo, diolaŋ la wa la kumbiaa. Mi puaa chɔuwa luɛi, ma kɔ del chioo choo. Ma dii masaa, okoŋ mi Sailɔɔ simnuŋ masaa le Babilɔŋ.

O wɔsioo o pilɛ bɛŋgu, mi Sailɔɔ dimul waŋnda aa: ‘Chɛhowa dimul la le mi miŋgi chiɛi ndɔɔ taŋgul Chulusalɛm. Wanaa nduaa kinɛi, wana o wana yeema pɛ le kɔlaŋ malaa, o tiuba mbo kuɛ.’ Mɛɛ nda tɛɛmbuu Chulusalɛm, wɔsilaŋ 70 hiouwɔɔ okoŋ kɔɔli, mi Chuuwaa bɔɔbɔɔ miiŋgu Chulusalɛm a mɛɛ Chɛhowa ndoo dimi yɛ. Kooliiyoŋ ni, taalala nda toosiaa a kaniŋ humboŋ ndaŋ ni, a nyɛm cheleŋ Nɛbukanɛɛsa ndoo chua o chiɛi Mɛlɛkaa niŋ ndoŋ, mi Sailɔɔ miŋgi muŋ kpou. Baa a che pa mɛɛ Chɛhowa soliŋ Sailɔɔ kpeku le wanaa nduaa malaa yɛ?