Wanaa Mɛlɛkaa Fula O Chɛleŋ Niŋ Babilɔŋ

NDOO wa niŋ suɛi wɔsila tiɔɔŋ, chɔŋ a boondii Miidiaŋnda a Paatiaŋnda bii Babilɔŋnde. Kɛ tofawɔ nyɛ cho yɔŋnɔŋndo wo! A mal Isɔluɛitiiya ma wa kɔndaŋ. Vɛɛ nda looku yɛ nda malɔɔ? Nduyɛ, o nɛɛnɛ mallɛ nda?

Sailɔɔ mal nda ni, masa Paatiaŋnda. Tuupa mi Sailɔɔ vialuŋ, mi Jɛhowa dimul wana suaa le ndu wo Aisaiya le mbo poonyiaa a Sailɔɔ okɔɔ aa: ‘A cho ya tosal nyɛ ya yeema wo. Diolaŋ le luɛiyɔɔ Babilɔŋ lacho wa la kumbiaa wakpa le num, le mɛɛ ŋ looku niŋ ma bii chioo yɛ.’ Nduyɛ, Sailɔɔ kɛsɛ kɛsɛ ndoo simlachi ni le Babilɔŋ biyɔɔ. Mi Miidiaŋnda a Paatiaŋnda huŋ a nyumndaŋ ma keeku o diola Babiloniaŋnda mɛi la kumbiaa laŋ ma kɔ bii chioo.

Mi Aisaiya dimi vɛlɛ maa Sailɔɔ nɔ mbo dimul waŋnda le ma miŋgi maaŋ Jɛhowaa Chulusalɛm taŋgul. Baa Sailɔɔ ndoo tosa pa suɛi poonyiaŋ hei a ndu okɔɔ ve? Mbo tosa lende kpeekpei. Nyɛ o dimul Isɔluɛitiiya wo cho hoo ni: ‘Lakɔ Chulusalɛm niko, mila kɔ taŋgul maaŋ Jɛhowa Mɛlɛka nyaa.’ Le sabu koŋ ŋ cha naa Isɔluɛitiiya miiŋgoo Chulusalɛm ni.

Kɛ o cho Isɔluɛitiiya kpou le nɔla miiŋgoo Chulusalɛm te, kanifuule, apum wa a yuwɛi, apum wa a naalaŋ. Nduyɛ, bandei pila tiŋndo ndoo bandu ni. Ndoo wa bɛɛ le kɔla paŋguŋ hiɔɔlu. Kɛ sabula cheleŋ la wa o laŋ kɔɔli la tosa atiŋ kue loo. Kɛ a kue kaŋ tiaa, mi Sailɔɔ dimul nda aa: ‘La chuŋgiaa kaniŋ humboŋ a kooliiyoŋ, mi la ke wanaa cho kɔlaŋ maaŋndo a Chulusalɛm taŋgullo wa.’

Le hei, ma ke Isɔluɛitiiyaa bɔɔ bɔɔ wa miiŋgoo Chulusalɛmnda nyɔŋ tau. Okoŋ kɔɔli, mi Sailɔɔ ke vɛlɛ nda hɛŋgɛilaŋ a taalala masaa Nɛbukanɛɛsa chua teleŋ koŋ o maaŋ Jɛhowaa niŋ Chulusalɛmndo le ma miiŋgu a laŋ. Mi wanaa wa haa kɔlaŋnda sɔla nyɔŋ tau le kɔlaŋ a muŋ.

Mɛɛ mi Isɔluɛitiiya fuuluu a teleŋndo kinɛi, mi che bɛɛ mbo chua nda paŋgoŋ ŋhiɔɔlu a nyɛ lechoo le fuuloo. A boondii wɔsila 70 laŋ chuwɔɔ kinɛi nda fuuluu ni. Nduyɛ chɔŋ a boondii Chulusalɛm sɔla tambeiye, chioo wanuŋ fondo fuu. Isɔluɛitiiya miiŋgu niko o lɛŋnde nda leŋ niŋ, kɛ o ve nda choo kpɛdɛ le. Mi simulta bɔɔ bɔɔ komal nda a mɛɛ naŋ cho hunɔɔ pɛɛku yɛ.