A Tiindaŋ Mɛlɛka Le Malaa

WANAA miiŋgu Chulusalɛmnda ndaa wa fau fau le 50,000. Kɛ mɛɛ nda fuuluu, Chulusalɛm waŋnuŋndɔ o tambɛi. Wana o wana ve pɛŋ loŋ te. Isɔluɛitiiya nɔ vɛlɛ ma miŋgi nyɛ o nyɛ taŋgul pila.

Mɛɛ Isɔluɛitiiya fuuluu, bandu luamaa salaa fɛŋ nda taŋgul. Yɛɛ cho yɛ bandu luamaa salaa? Naa ndaa luam sindɛ visiaa ndaa dii le salaa solio o Jɛhowa lo wa bandu luamaa salaa cho ni. Mɛɛ paŋgoŋ hiou ŋtiŋ, mi Isɔluɛitiiya kandu niko maaŋndo taŋgullo. Kɛ yaamɔɔwaa ndaa balu nda wa ndaa yeema mi ndaa taŋgul maaŋndo le. Le hei, ma kindiŋ le nda taŋgullo kuunaa. O mɛɛlulaŋ kpɔŋ, mi yaamɔɔwaa ndaa haa tosa mi masa sɛnɛi Paatiaŋnda kuuna Isɔluɛitiiya taŋgullo. Nduyɛ Sailɔɔ ke nda dio le taŋgullo hoo wo ndoo vi niŋ.

Wɔsioŋ 17 muŋ hiou niŋ ni chɔŋ a fula ndaa o chɛleŋ niŋ Babilɔŋ. Haka nda Sɛkalaya wanaa suaa le Mɛlɛka wa nda wa ni. Okoŋ, mi Jɛhowa dimul nda le ma dimul Isɔluɛitiiya ma miiŋgu taŋgul nda kandu wo. Waŋnda haa ndaa tiindaŋ Mɛlɛka le malaa. Le saboo hoo, ma tosa nyɛ Haka nda Sɛkalaya dimul nda wo. Ma miiŋgu taŋgullo, mi che bɛɛ naa ma dou nda sawaa maa a taŋgul te.

Mi wana bɛndu Paatiaŋnda pum diolaŋ Tatinai huŋ nyuna Isɔluɛitiiya le wana ke nda dio le miŋgio maaŋndo taŋgullo wo. Okoŋ, ma mulul ndu maa teleŋ nda wa Babilɔŋndo, mi masaa Sailɔɔ dimul nda aa: ‘La kɔ Chulusalɛm mila miŋgi maaŋ Jɛhowa Mɛlɛka nyaa taŋgul.’

Mɛɛ mi Tatinai yɔŋ yauwo o masaa Daliɔɔ lo Babilɔŋ, le sinaa te Sailɔɔ vi niŋndo ke nda dio le taŋgullo ni. Hau pa mi masaa Daliɔɔ miŋgul ndu yauwo poonyial maa, lende kpeekpei Sailɔɔ ndoo dimi ni. Mbo dimi vɛlɛ o yau koŋ niŋ aa: ‘Mal Isɔluɛitiiya ma taŋgul maaŋ Mɛlɛka ndaa. Nduyɛ ma mala nda pɛŋ taŋgul kalaa.’ O paŋguŋ hiɔɔlu niŋ, mi maaŋndo chuu taŋgul. Okoŋ mi Isɔluɛitiiya naŋ kɔl tau.

O wa niŋ suɛi wɔsila 48 chɔŋ a teleŋ Isɔluɛitiiya chii maaŋndo taŋgullo. Wanaa wa Chulusalɛmnda ndaa nɔ nyɛ le. Chioo a maaŋ Mɛlɛkaa bɛɛ ndoo niŋ pɛŋ nua le. Ɛsɛla wa Babilɔŋ mbo tuɛi konaa maa maaŋ Mɛlɛkaa yeema toosiaŋndo. A sina pa nyɛ Ɛsɛla ndoo tosa wo?

Mi Ɛsɛla kua naa Atasasi cha, masaa le Paatiaa. Atasasi yɛ masa kɛndɔɔ pila o wa ni. Mbo ke Ɛsɛla nyɔŋ tau le kɔlaŋ a muŋ Chulusalɛm. Mi Ɛsɛla dimul Isɔluɛitiiyaa wa Babilɔŋnda le ma mala ndu kɔlaŋ a nyɔŋ muŋ Chulusalɛm. Wanaa ndaa chɛl le kɔlaŋnda ndaa wa le 6,000. Ma sɔla kaniŋ humboŋ a kooliiyoŋ tau le kɔlaŋ a muŋ.

Kɛ mi Ɛsɛla luɛi o buulaŋndo niŋ kanifuule wanaa wɔɔŋnda wa o nɛi. Maa wanaa wɔɔŋnda haa cho nda kei wolɔɔla ndalaŋ poondia o ba, nduyɛ ma diu nda. Le hei, mi Ɛsɛla chuuŋgiaa Isɔluɛitiiyaa nda wa kɔlaŋnda kpou naapilɛ, a mɛɛ ŋ cho naa chɔɔ o fotueiyo niŋ yɛ. Okoŋ ma piɛi o Jɛhowalo le mbo mala nda ma fuuluu o kɛndiaa niŋ.

Nduyɛ lekɛndɛi mi Jɛhowa kiindiaa nda. Mɛɛ paŋgoŋ hiou ŋhiɔɔlu, ma fuuluu Chulusalɛm o kɛndiaa niŋ. Hei cho naa chɔmndo maa Jɛhowa kiindiaa wanaa duau tiiŋndaŋndo o ndu niŋ le malaa wa.