Chiisu Dindi Chiɛi Mɛlɛkaa

Naapum a Nyaakuɛiyo wɔsi 30 boondii Chiisu ve, mi Chiisu kua Chulusalɛm. Nduyɛ mi wanaa bɔɔbɔɔ kua Chulusalɛm le Bɔŋaŋ Hiouwɔɔ Choo Wo biyɔɔ. O bɔŋaŋndo hoo choo, mi waŋnda ndaa soli visiaa salalaŋ o chiɛi Mɛlɛkaa niŋ. Waŋnda apum, mi ndaa hiŋ a visiaa ndaa o ba. Kɛ apum yɛ, Chulusalɛm ndaa piandu nda ni.

Mɛɛ Chiisu luɛi o chiɛi Mɛlɛkaa niŋ, mbo cha waŋnda chɔluaa pisioo leniŋ. Waŋnda haa wa kanioŋ sɔlaa tau le ndapila o chiɛi waŋnda ndaa piɛi Chɛhowa wo niŋ! Yɛɛ Chiisu ndoo tosa yɛ? Mbo lɔfa yooleŋ, mbo tuau saa a nauwaa wa o chiɛi Mɛlɛkaa niŋnda. Mbo nyiinduu tibiila wanaa wa kanioŋ siŋgaa wa, nduyɛ mbo sɛŋi kaniŋ ndaŋ lɛŋ. Mi Chiisu dimul wanaa wa kaŋgbuaa pisioo wa aa: “La faŋa nyaa haa nanuŋ! La pɛŋgi chiɛi Finya nuu siiŋguuwo fondaŋ leyulaa!”

Mɛɛ wanaa wa o chiɛi Mɛlɛkaa niŋnda che nyɛ Chiisu tosa wo, mi kɔndɔfillo bii nda. Mi buɛiyaa nduaa loonuŋ nyɛ Diom Mɛlɛkaa dimi a Mɛsayanɔɔ okɔɔ wo aa: ‘I cho nɔ sɛmbɔɔ le chiɛi Chɛhowa wo.’

Okoŋ kɔɔli, a wɔsi 33 boondii Chiisu ve, mi Chiisu kua vɛlɛ o chiɛi Mɛlɛkaa mbo kɔ dindi ndu. Chiisu ndoo chɛl wana o wana mbo kɛɛ bɛɛleŋ chɔmndo le chiɛi Finya ndɔ wo le.