Mi Chiisu Tosa Kaamaalaŋ Tau

Le yooŋgu kɛndɔɔ dimioo a Masale Mɛlɛkaleŋ okɔɔ Chiisu hiŋ o chieeŋndo choo ni. Le chɔmndo nyɛ Chiisu tosa niŋ te o huŋ simnuŋ pɛ Masa wo, mi Chɛhowa ke ndu nyina diandaa le kaamaalaŋ tosaa. Mi Chiisu ndoo siŋgi naa kɛ kɛ. Ba o ba Chiisu ndoo kuɛ pɛ, mi wanaa wa a naalaŋ nda ndaa hiŋ naa ndu chua le malaa, nduyɛ mi ndoo siŋgi nda. Wanaa sumɛiya wa chɔɔ, wanaa ndaa tuii le wa a wa tueiyɔɔ, wanaa bɛvɛiya wa kɔlaŋ, nduyɛ mi ndoo tou nyinaa wɔɔŋnda waŋnda kɔɔli. Doma ndɔɔ bɛɛ ndaa pilaŋ pɛ, ndaa seŋgu. Ba o ba Chiisu ndoo kuɛ pɛ, mi waŋnda ndaa tol ndu kɔɔli. A yɔŋ bɛɛ mi Chiisu ndoo nuuviaa teleŋndo le pɛŋgioo, ndoo tuu wanaa ndaa huŋ naa ndu chua a teleŋ koŋ nda le.

Teleŋ pilɛ, mi waŋnda huŋ a po bɛvɛi pilɛ o chiɛi Chiisu wa o yiya wo. Kɛ waŋnda wa a piaa cha chiɛiniŋ, nduyɛ ndaa tiuba ma luɛi naa Chiisu wa wa le. Le hei, ma buli yindɔ chiɛiyo, ma tusi poo naa Chiisu wa wa. Okoŋ, mi Chiisu dimul poo aa: ‘Chɔŋ ma kuɛ.’ Mɛɛ poo hoo chɛŋ, mi kɔndɔfillo bii waŋnda kpou.

A teleŋ cheleŋ, mi Chiisu kua o sɔndɔkɔlɔ pilɛ, mbo komal puaa tɔ a naa ŋlɛlɔɔ lekɔɔ. A wa isisi o nɛiyo daŋgala. A wa dimioo choo choo aa: ‘Chiisu, mala naa fɔ!’ Nduyɛ o teleŋ koŋ niŋ, ndaa chɛl wana nɔ naa ŋlɛlɔɔ wo mbo sɔɔŋguu wana ikɛi le. Mi Chiisu dimul puaa haa le ma kuɛ o chiɛi Mɛlɛkaa. Kanifuule, Sawa Chɛhowaa ndoo dimi maa te waŋndo seŋgu a naa ŋlɛlɔɔ pɛ, o nɔ mbo kuɛ o chiɛi Mɛlɛkaa. Mɛɛ nda wa kɔlaŋ, ma siaŋgu. Mɛɛ wana pilɛ o puaa haa tɛɛŋ sina maa o seŋgu, mbo miiŋgu pila naa Chiisu chua, mbo saŋgala Mɛlɛka. O puaa kaŋ tɛɛŋ, ndupilɛ kinɛi mel Chiisu balikaa ni.

Chua pilɛ wa a naa le wɔsilaŋ 12, nduyɛ yeemɛi wa ndu tau le mbo seŋgu. Mbo huŋ Chiisu amakɔɔ sɔɔsɔɔ faŋgaa tɛɛŋ, okoŋ mbo pilaŋ bɔɔle doma ndɔɔ. O lepilɛ niŋ kpe, mi chuaa hoo siaŋgu. Mɛɛ keŋ yɔŋnuŋ, mi Chiisu nyuna aa: ‘Nɛɛnɛ pilaŋ yɛ doma nuu.’ Mi siooŋnde bii chuaa hoo. Mbo huŋ Chiisu lachi, mbo dimul ndu tonyaa. Mi Chiisu dɛɛniaa ndu kɔllo, okoŋ mbo dimul ndu aa: ‘Chua nuu, kɔ wa kɛndɛ.’

Mi wana bɛndu pilɛ diolaŋ aa Chaaliɔɔ nyɔɔlu Chiisu aa: ‘Huŋ o ya lo bɛɛ! Kanifuule, chua ni pɔmbɔɔ cho a naa tau.’ Kɛ tuupa mi Chiisu fuuluu o chiɛi Chaaliɔɔ wo, mi chuaambɔɔ wu. Mɛɛ Chiisu fuuluu, mbo komal wanaa bɔɔbɔɔ wa chaŋndo a yuŋgoo hoo latulu. Mi Chiisu dimul nda aa: ‘La chaŋ te. O luaŋ koni o cho ni.’ Okoŋ mbo saa chuaambɔɔ baa, mbo dimi aa: “Chuaambɔɔ, chɔŋ!” O lepilɛ niŋ kpe, mbo chaŋ mbo chal. Mi Chiisu dimul wanaa velu ndu wa maa a ke ndu nyɛdiaa mbo de. Yiyaŋndɔ mɛɛ kpɛ wanaa velu ndu wa a wa a kɔl kɛndɛ yɛ!