Chiisu Dimi Yooŋgu Kɛndɔɔ a Masale Mɛlɛkaleŋ Okɔɔ

Mɛɛ Chiisu yiŋ, nyɔɔ viu bɛɛ le mbo kandu waŋnda yooŋgu kɛndɔɔ dimullo aa: “Masale Mɛlɛkaleŋ le cho niŋ kpɛɛluŋ.” Mi buɛiyaa nduaa tual ndu kɔɔli mɛɛ o wa balɔɔ o tanda Kalili wo niŋ a Chudiaa. Mɛɛ Chiisu miiŋgu o ndu lo chiee Naasaluɛi, mbo kua o chiɛi Chuuwa piɛi Mɛlɛka wo niŋ. Mbo kɔ kumbi yau simbulaa Aisaya poonyiaa wo, mbo wa diomndaŋ veeloo leniŋ choo choo kpeleŋ aa: ‘Chɛhowa ke ya nyina diandaa le halikpeŋ mi dimul waŋnda yooŋgu kɛndɔɔ.’ Yɛɛ Chiisu ndoo yiyaŋ yɛ? Nyɛ Chiisu ndoo yiyaŋndo wa ni maa, mi che bɛɛ waŋnda ndaa yeema ma che ndu kaamaalaŋ tosaa, kɛ sabu kpeekpei o sɔla nyina diandaa wo wa le yooŋgu kɛndɔɔ dimioo ni. Okoŋ, mbo dimul wanaa wa ndu nilaŋ yaŋɔɔ wa aa: ‘Nyɛ Yau Mɛlɛkaa dimi hoo wo peeluŋ hau.’

Okoŋ kɔɔli, mi Chiisu kua o Pioo Kalili, mbo komal puaa a hiɔɔlu loŋ. Nduyɛ, wanaa yɔɔyaa puaa haa wa ni. Mbo dimul nda aa: “La tol la kɔɔli. I cho nya siiŋguu wanaa yɔɔyaa ŋwaŋnda chiee.” Puaa haa ndaa nɔ diolaŋ ni aa Pitɛ, Andulu, Chemisi, a Chɔŋ. O lepilɛ niŋ kpe, ma mal wali yɔɔyaa, ma tual Chiisu kɔɔli. Okoŋ, ma simnuŋ buɛiyaa nduaa. Ma balu ba o ba fee o tanda Kalili wo niŋ yooŋgu kɛndɔɔ dimioo a Masale Chɛhowa leŋ okɔɔ. Ma dimi yooŋgu kɛndɔɔ o chiɛila Chuuwa ndaa piɛi Mɛlɛkalaŋ niŋ, o lɔɔlaŋ niŋ, a o nɛila bɛndulaŋ. Ba o ba ndaa kuɛ pɛ, mi faŋga bɛndoo ndoo tol nda kɔɔli. Mi tɔɔ Chiisu wo tiu ba o ba fee, nduyɛ mi tɔɔ koŋ fuuluu o lɛŋnde Siiliaa leŋ niŋ di.

Okoŋ kɔɔli, mi Chiisu ke buɛiyaa nduaa apum kpaayaa le waŋnda siŋgioo, vɛlɛ a le nyinaa wɔɔŋnda touwɔɔ waŋnda kɔɔli. Mi buɛiyaa nduaa apum kua a ndu latulu o chiooŋ vɛlɛ a o sɔndɔkɔltaŋ yooŋgu kɛndɔɔ dimioo. Mi waŋ laanduaa laalaŋnda apum mɛɛ Meele Madaliŋ, Chohana, Susana, a acheleŋnda cho nuaa yɛ, mala Chiisu nda buɛiyaa nduaa.

Mɛɛ Chiisu chii buɛiyaa nduaa pɛɛku, mbo viam nda yooŋgu kɛndɔɔ dimioo. Mɛɛ nda wa balɔɔ o tanda Kalili wo niŋ, mi wanaa bɔɔbɔɔ simnuŋ buɛiya, nduyɛ ma sɔla yiŋɔɔ. Wanaa bɔɔbɔɔ ndaa yeema ma simnuŋ buɛiyaa Chiisu wa. Le hei, mi Chiisu tuu nda a chiɛi vesa le kouwɔɔ ve. Mbo dimi aa: ‘La piɛi Chɛhowa le mbo yɔŋgu waŋ walla le chiɛi nduɛi kouwɔɔ.’ Okoŋ kɔɔli, mbo hɛli buɛiya 70, mbo viam nda a ŋiɔɔŋ ŋiɔɔŋ o tanda Chudiaa wo niŋ kpou le yooŋgu kɛndɔɔ dimioo. Ma pɛɛku waŋnda suu o suu a Masale Mɛlɛkaleŋ okɔɔ. Mɛɛ buɛiyaa Chiisu vem nda miiŋgu naa ndu chua, a wa a kɔl kɛndɛ le ndu chɔmndo nyɛ ndoo yɔŋnuŋ nda wo. Setana ndoo tiuba mbo tosa nyɛ o nyɛ le nda kuunaa yooŋgu kɛndɔɔ dimioo le.

Mi Chiisu tosa a sabu le mi buɛiyaa nduaa koma hiou lachi a wali sɔviɔɔ hoo tosaa, te o miiŋguŋ pɛ choo choo. Mbo dimul nda aa: ‘La dimi yooŋgu kɛndɔɔ hoo ba o ba fee o chieeŋndo choo. La pɛɛku waŋnda Diom Mɛlɛkaa, nduyɛ mi la yiŋ nda.’