Le yɛɛ Mɛlɛka chɛllɛ mi wanaa nɔ kpaaya lemasaa wa wa wanaa nɔ kpaaya le wa saaŋgiaa?

Bundɔŋ Baabuiyoŋ ŋpɔm soo a mɛɛ wanaa ndaa nɔ kpaaya lemasaa wa wa wanaa nɔ kpaaya le wa saaŋgiaa yɛ.a Miŋ yiyaŋ a bundɛi Nabɔti ve okɔɔ. O wɔsiŋ waapilɔŋ niŋ tuupa mi Chiisu vialuŋ, mi Ehabi, masaa le lɛŋnde Isɔluɛileŋ chɛl Chɛsibɛɛ laandɔ le mbo dii Nabɔti a puaa nduaa le halikpeŋ mbo puu kpele ndɔɔ. (Masaa Bɛnduaa Tasiaa 21:​1-16; Masaa Bɛnduaa Diiŋ Nduaa 9:​29) Le yɛɛ Mɛlɛka chɛllɛ Ehabi le kpaaya ndɔ lemasaa soliŋndo kpeku o nɛi wɔɔŋndo choo?

Ŋ muliŋndɔ hɔlla o sabu sɔviɔɔ opilɛ choo. Mɛlɛka dimi lachoowa le. (Taitɔɔ 1:​2) Vɛɛ hei chiɛiliaŋ yɛ a kaa dɛnɛ wɔɔŋ waŋnda cho hau chɔmndo le acheleŋnda saaŋgiaa wo? O kandɔŋndo pɔ, mi Mɛlɛka sila waŋchieeya maa te a tosal ndu pɛ nilakalulaŋ, a cho piɔmndo sɔla. Nduyɛ a tonya, chɔŋ a teleŋ nilakalulaŋ la tosaŋ o kpeeloo Idɛŋ niŋndo, waŋchieeya cho hau piɔmndo sɔlaa. Piɔm tase yɔŋnuŋ pɛŋndo chɔm mɛɛ wanachioo kandu chaaŋndɔ saaŋgiaa yɛ. Ndu wa yɛ teleŋ Keŋ dii pɔmbɔ ndɔ Ebɛl lo ni.—Chɛnɛsee 2:​16, 17; 4:8.

Chɔŋ a teleŋ koŋ o bundɛi wanachioo niŋ, mi Diom Mɛlɛkaa saa sɔɔŋ bolleŋ naapilɛ. Mbo dimi aa, “Waŋnda pum a nɔ kpaayalaŋ, mi waŋnda a wa nda saaŋgaa o ba bɛŋgu.” (Ikilisiaatii 8:​9) Baa diomndaŋ ndaŋ la cho pa tonya? Mi Chɛhowa sila wanaa nduaa Isɔluɛi maa masaa ndaa cho nda saŋgaa tuisi choo, ma wa chaŋndo kpeleŋ naa Mɛlɛka cha. (Saamiɛɛ Tasoo 8:​11-18) Nduyɛ mi Masa taasioo Sɔlɔmɔŋ bɛɛ heelu waŋnda pawaa (muloo) choo tau. (Masaa Tasiaa 11:​43; 12:​3, 4) Ehabi wa masa dɛnɛ wɔɔŋndo opilɛ, o bɛpɛla waŋnda tau wo. Yiyaŋndɔ a hei okɔɔ. Te Mɛlɛka ndoo kuuna pɛ masaa waa waŋnda bɛpɛlaa, baa sɔɔŋ o dimi woŋ ve simnɔŋ nyɛ lachoo le?

Loonuŋ vɛlɛ maa, Setana dimi maa o cho a kɔl te waŋnda cho Mɛlɛka piɛiyo le. (Choobu 1:​9, 10; 2:​4) Te Mɛlɛka ndoo kuuna pɛ saŋga o saŋga buɛiyaa nduaa kpou choo, baa Setana ve naa kɔɔsaa sɔla le? Nduyɛ te ndoo yɔŋ pɛ mi Mɛlɛka kuuna saŋga o saŋga le wana o wana, baa o ve vɛlɛ simnɔŋ wana lachoo bɛndu le? Te keŋ ndii yɔŋnuŋ pɛ, waŋchieeya wa dimi maa a tiuba ma waŋnuŋ a banda mi Mɛlɛka ve bɛɛ nda choo masa le. Kɛ Diom Mɛlɛkaa ndu dimi maa, wanachioo tiuba mbo chɔm ndupilaŋ nɛiyo le. (Chɛluimaya 10:​23) Ŋ yeema mi Masale Mɛlɛkaleŋ le hiŋ. O leŋ bɛŋgu kinɛi kafalaŋ la cho chuwɔɔ ni.

Baa koŋ sim ni maa Mɛlɛka cho nyɛ o nyɛ tosa a saŋga waŋchieeya cho wo le? Sako bɛɛ. Nuawɔ sɔɔŋ sala tiɔɔŋ o tosa woŋ. I tasei, o tul wanaa saaŋgiaa acheleŋnda wa leyɛ. Le tamaseliiyo, Diom ndɔɔ dimi maa mbo tul leyɛ dɛnɛ wɔɔŋ Chɛsibɛɛ ndoo tosal Nabɔti wo. Mi Baabuiyo hiau lachi a dimioo maa masa kpaaya cho o viaŋnaŋndo cho sɔɔŋ dɛnɛ wɔɔŋndoŋ kpou baa amakɔɔ ni. (Chɔŋ 14:​30; Kɔliŋtiaŋ Diiŋ Ndɔɔ 11:​14) Kɛ Baabuiyo chɔɔmuu ndu. Ndu cho yɛ Setana Nyina wɔɔŋndo ni. Mɛlɛka chɔɔmuu wana dɛnɛ wɔɔŋ cho waŋchieeya saaŋgiaa wo. Hei mala naa le miŋ kpeeŋaŋ dɛnɛ wɔɔŋndo. Mɛlɛka cho chilaŋ naalaŋ mandaa.

O diiŋndɔɔ, Mɛlɛka ke naa tiindaŋ kpeekpeiyo maa o cho saŋgaa faŋa. Mɛɛ o chɔɔmuu, mbo kɔɔsa, nduyɛ mbo tuisi Ehabi nda Chɛsibɛɛ kpundɔɔ choo yɛ, ke naa tiindaŋndo maa o cho vɛlɛ wanaa cho dɛnɛ wɔɔŋndo tosaa wa kpou kpundɔɔ tuisi choo. (Sam 52:​1-5) Mɛlɛka ke naa vɛlɛ tiindaŋ kpeekpeiyo maa, o cho dɛnɛ wɔɔŋndo faŋa le wanaa kaala ndu wa kpou.b Nduyɛ o mɛɛlulaŋ kpɔŋ, teleŋndo cho fuuluu mi Nabɔti nda puaa nduaa huŋ wa achal o Kpele Hɛnɛkiɔɔ niŋ o chieeŋndo choo lefafɛɛŋ, naa kafala ve lɛ niŋ te wa.​—Sam 37:34.