SUƐI LEBOLLE O KƆƆ | MASALE MƐLƐKALEŊ YƐƐ LE SIM YƐ LE NUM?

Masale Mɛlɛkaleŋ Yɛɛ Le Sim yɛ Le Num?

Ŋ che kpendekele o buŋgaŋ naŋ laŋga yaasiaa woŋ niŋ maa Masale Mɛlɛkaleŋ le cho nyɛ sɔvɛ le Seiyaa Chɛhowaa. Kɛlɛŋgaa num bɛɛ nɔ yeemɛi le mi Masale Mɛlɛkaleŋ le chuu num tɔnɔlaŋ ndaŋ o chilaŋ niŋ. Kɛ a koŋ kpou, mi kaamaa bii num dɔɔ te mɛila kɛndɛlaŋ ndaŋ la cho pɛ tonya.

A nɔ ma wa yekeŋ tuupa ma laalaŋ nyɛ o nyɛ fee ŋ tuɛi. (Talelaŋ 14:15, NW) O nɛilaŋ lapum niŋ, wa numndo yekeŋ cho ko mɛɛ waŋnda Bɛluiya wa sindɛ yɛ.a Mɛɛ nda dimul nda yooŋgu kɛndɔɔ a Masale Mɛlɛkaleŋ okɔɔ o tase ndɔɔ, mi Bɛluiyaŋnda chɛl nyɛ nda tueiyo, o cho le mɛɛ nda yeema le mbo wa tonya yɛ le. Kɛ, a wa yaasiaa lepaa o lepaa o Baabuiyo niŋ “le sinaa te nyɛ Pɔɔl dimi wo cho tonya.” (Walta Wanaa Chiisuaa 17:11) O dimi niŋ, mi Bɛluiyaŋnda tuu yooŋgu kɛndɛ nda tueiyo a nyɛ Baabuiyo dimi wo. Mɛɛ nyɔɔ viou kpɛɛ, ma laalaŋ maa o Diom Mɛlɛkaa niŋ kɛsɛ yooŋgu kɛndɛ koŋ fula ni.

Seiyaa Chɛhowaa cho num dɛɛniaa le ma tosa nyɛ pilɛ koŋ kpe. Ŋ pɛɛku num Baabui ŋ yɔŋgu nyɛ le wo. Ŋ yeema num ma tuu nyɛ Seiyaa Chɛhowaa laalaŋ a Masale Mɛlɛkaleŋ okɔɔ wo, a nyɛ Baabuiyo pɛɛku wo.

Le chɔɔloo pɛɛkoo a Masale Mɛlɛkaleŋ okɔɔ, Baabuiyo nɔla mbo mala num le ma saaluŋ mulilaŋ le nyunala sɔvɛlaŋ lapum o yoomoo niŋ.

Kuɛɛ naŋ chɛŋ yɛ?
Yɛɛ cho yɛ sabu yoomoo?
Le yɛɛ Mɛlɛka chɛllɛ nyɛpalaa?
Yɛɛ yɔŋnuŋ yɛ naa te ŋ vi pɛ?
Baa chieeŋndo sɔla niŋ pa tambei?
Vɛɛ yuŋgoo looku yɛ nyaaloo sɔla?

Nyɛ hiou kpou wo cho ni, Baabuiyo pɛɛkoo cho num mala “ma sɔɔŋguu Mɛlɛka ikɛi” kpɛɛluŋ. (Chemisi 4:8) Nduyɛ, mɛɛ ŋ sɔɔŋguu Mɛlɛka ikɛi fau, lende koni ŋ cho chɔɔlu sina mɛɛ Masale Mɛlɛkaleŋ le cho nyɛ sɔvɛ le num yɛ ni. O cho ko le suŋ suŋ te, kɛ lefafɛɛŋ. Mi Chiisu dimul Finya ndɔ o piɛileŋ niŋ aa, “Hoo cho yoomu fafɛɛŋndo ni, waŋndo sinaa maa num pilɛ kpe cho Mɛlɛka tonyaa ni, nduyɛ mbo sina vɛlɛ Chiisu Kiliti wana ŋ vem ndo.”—Chɔŋ 17:3, NW.

Seiyaa Chɛhowaa soliŋ yauwo hoo kpeku le Baabuiyo pɛɛkoo a num.

Te a yeema pɛɛku Baabuiyo pɛ, nyuna Chɛhowɛinɔ kɛ kɛ, ɔɔ kɔ o tɛɛŋgii nɛi www.pr418.com/kiz. (Kɔ o NYUNA LE PƐƐKU BAABUIYO ma poonyiaa nyɛm yeemaŋ o peele ŋ cho chɔ leŋ choo)

a O Masidooniaa paandoo niŋ chiee bɛndoo Bɛluiya wa ni.

Le Sabu o Kaala Masale Mɛlɛkaleŋndo

O viuwɔ bɛɛ le, ma nyuna chuaambɔ wɔsiŋ 10 pum o sukuu diolaŋ Folaka le mbo poonyiaa a suɛi lebolle hei okɔɔ, “Nyɛ Ya Kaala Tau o Chieeŋndo Choo Wo.” Mi Folaka poonyiaa le sabu o hɛnaŋ waŋnda dimullo a Masale Mɛlɛkaleŋ okɔɔ wo.

Mi Folaka tɛɛsiaa aa, “Masale Mɛlɛkaleŋ, Masaleŋ kpeekpei le cho ni. Kɛ wana chi leŋ te, wana wounuŋ bɛɛ hɔlta mapuululaŋ!”

Mbo hiau lachi a poonyiaa a bahawɛilaŋ lapum la Masaleŋ ndeŋ le cho hunɔɔ faŋa laŋ. Mbo dimi aa, “Kɔllo tambu ya bɔɔ te I che pɛ wanaa nɔ la chiɛi le wa luaŋ o bilioo choo,” nduyɛ a “chuaambuaa yiaŋ ma cho diyɔɔ chieeŋndo balɔɔ silɔ wa.” Mbo dimi vɛlɛ aa, “Kɛ I cho vɛlɛ a kɔl kɛndɛ te I nua pɛ nyɛ dimiŋ o Aisaya 65:21 (NW) niŋndo.” Mi bolle Baabuileŋ ndeŋ le hiau lachi a dimioo a wanaa cho wa o Masale Mɛlɛkaleŋ bɛŋgu wa okɔɔ aa, “A taŋgul niŋ chiɛila ndalaŋ mi ndapila waŋnuŋ leniŋ. A tual niŋ kpelela ndalaŋ ma de laŋ tɔnɔ.”

Mi Folaka dimi vɛlɛ maa o cho chumndo le lɔɔ Mɛlɛka soliŋ niŋ Masale ndɔleŋ kpeku le naalaŋ kpou faŋaa wo. O poonyiaa o wa wo niŋ, mbo soliŋ Sɔɔŋ Chɔɔmaŋndoŋ 21:4 kpeku. Loŋ o dimi ni aa, “O cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa va.” Mbo miŋgi sondo o nyɛ o dimi wo choo maa, suɛi a Chɛhowa, vɛlɛ a Masale ndɔleŋ okɔɔ cho nyɛ o kaala tau o chieeŋndo choo wo ni. Ŋ che niko kpendekele maa, Masale Mɛlɛkaleŋ le cho nyɛ sɔvɛ bɛndu chuaambɔ pɔmbɔɔ hoo o kɔl!