MULILAŊ LE NYUNALA BAABUIYO
Yɛɛ cho yɛ Paale Kɔɔsɔleŋ?
Le yɛɛ paale kɔɔsɔleŋ le cho yɛ paale nyaale?
O teleŋ Baabuiyo niŋ sindɛ, mi Mɛlɛka ndoo soliŋ wanaa kialaa ŋyamaa le wanaa nduaa solioo o kafalaŋ bɛŋgu. (Wanaa Kialaa Ŋyamaa 2:18) Baabuiyo tɛɛsiaa maa Paale Kɔɔsɔleŋ le cho wa paale nyaale o chilaŋ niŋ. Chɛhowa, Wana Kialaa Ŋyamaa le chieeŋndo kpou, cho hunɔɔ waŋchieeya soli o kafalaŋ bɛŋgu.—Nuawɔ Chondei 96:12, 13; Aisaya 26:9, NW.
Mɛlɛka yulu Chiisu iso le mbo kilul wanaa cho yoomu wa a wanaa vi niŋnda yamɛi. (Walta Wanaa Chiisuaa 10:42; 17:31) Wanaa bɔɔbɔɔ vi a sina Mɛlɛka kposoŋ te. O Paale Kɔɔsɔleŋ choo, Chiisu cho miŋgi wanaa kaŋ yoomu pila, halikpeŋ ma sina Mɛlɛka tonyaa nduyɛ ma kaala ndu.—Nuawɔ Walta Wanaa Chiisuaa 24:15.
Le yɛɛ Paale Kɔɔsɔleŋ le cho yɛ chua wɔsilaŋ waa pilɛ?
Waŋvilɛiya cho miiŋgu yoomu o wɔsila waa pilɛ laŋ bɛŋgu. (Sɔɔŋ Chɔɔmaŋndoŋ 20:4, 12) A nɔ ma sɔla teleŋndo le ma pɛɛku a nɛila Mɛlɛkalaŋ okɔɔ nduyɛ ma diikuŋ ndu. Kɔɔsɔɔ hoo cho yɔŋnɔŋ mɛɛ wanaa bɔɔbɔɔ yiyaŋ yɛ le. Kɛ Baabuiyo ndu chɔm maa te waŋnda fula pɛ o sɛiyo niŋ, o nyɛ nda cho wa tosaa wo choo nda cho nda kɔɔsa ni.—Nuawɔ Luomaŋnda 6:7.
Baabuiyo tɛɛsiaa vɛlɛ paale kɔɔsɔle cho waŋnda woolu leŋ, tuupa mi wɔsila waa pilɛ laŋ la fuuluu. A veelu vɛlɛ paale leŋ aa mɛɛlulaŋ, a mɛɛ i tɛɛsiaŋ o buŋgaŋ tasoŋ o yauwo hoo niŋ yɛ. O paale leŋ choo, Mɛlɛka cho faŋa wanaa dɛnɛ wɔɔŋaa kɛɛ ndu piɛiyo wa kpou. (Pitɛ Diiŋ Ndɔɔ 3:7) Lelaŋ, ŋ nɔ miŋ wa yekeŋ le chɔmndo maa ŋ kaala Mɛkɛka.—Nuawɔ Pitɛ Diiŋ Ndɔɔ 3:9, 13.