NYUNALA WANAA NUA O YAULA NAALAŊ NIŊNDA

Nɛɛ cho yɛ Kɔɔki o lɛŋnde Mekɔɔkileŋ niŋ o yau Isikiɛɛ wo soo a ndu okɔɔ wo?

Le wɔsila bɔɔbɔɔ niŋ, yaula naalaŋ la tɛɛsiaa niŋ maa, teleŋ nda soli Setana Nyina Wɔɔŋndo o choo choo niŋndo nda ke ndu diolaŋ ni aa Kɔɔki fula o lɛŋnde Mekɔɔkileŋ niŋndo. Le sabu yɛɛ i wa yɛ lende? Yau Sɔɔŋ Chɔɔmaŋndoŋ dimi maa, Setana Nyina Wɔɔŋndo cho sim lachinɔɔ ni le wanaa Mɛlɛkaa chieeŋndo balɔɔ silɔ chiŋalaŋndo a sɔŋgaa. (Chɔɔmɔŋndo 12:1-17) Le Sabu koŋ ndaa dimi ni maa Setana nɔ vɛlɛ diolaŋ ni aa Kɔɔki.

Kɛ, mi tɛɛsiaa koŋ huŋ a nyunala sɔvɛlaŋ lapum. Le yɛɛ? Tofawɔ hei. Mɛɛ Baabuiyo soo a teleŋ nda tiu Kɔɔki ba wo, mi Chɛhowa dimi aa, “I cho tosa mi youwa, a visiaa yoŋduaa de visiŋ numndoŋ.” (Isi. 39:4, NW) Mi Chɛhowa hiau lachi a dimioo aa, “Te teleŋ koŋ o fuuluu pɛ, I cho Kɔɔki ke naa nda cho ndu chɔ wa o Isɔluɛi niŋ. . . . loŋ nda cho Kɔɔki chɔ a faŋga bɛndu cho ndu kɔɔli wo kpou ni.” (Isi. 39:11, NW) Kɛ vɛɛ “youwa, a visiaa yonduaa” looku yɛ wana nda toosiaa o inyinaya wo dio? Vɛɛ nda looku yɛ ma ke Setana “naa nda cho ndu chɔ wa” o lɛŋndeŋ choo? Baabuiyo dimi kpendekele maa a cho Setana wou o sooŋ nɔ la mɛɛlu le wo niŋ le wɔsioŋ 1,000, o cho pɛŋ chɔ sɔla le.—Chɔɔmɔŋndo 20:1, 2.

A dimul naa maa o wɔsila 1,000 laŋ mɛɛlulaŋ, a cho Setana soli o sooŋ nɔ koŋ la mɛɛlu le wo niŋ. Nduyɛ te a soli ndu pɛ, “o balu o lɛŋnde niŋ kpou o chieeŋndo choo o hui waŋnda. A veelu lɛŋnde hei aa Kɔɔki a Mekɔɔki. O koŋ ndu Setana cho waŋnda chuuŋgiaa naapilɛ le chɔuwo.” (Chɔɔmɔŋndo 20:8) Kɛ te Setana cho Kɔɔki ni, vɛɛ o looku yɛ vɛlɛ mbo hui Kɔɔki? Lelaŋ, o yau Ɛsikiɛɛ wo niŋ a Sɔɔŋ Chɔɔmaŋndoŋ, o cho Setana le cho “Kɔɔki” le.

Kɛ nɛɛ cho yɛ niŋ Kɔɔki fula o lɛŋnde Mekɔɔkileŋ niŋndo? Le nyuna koŋ mulioo, mɛɛ miŋ yaasiaa Baabuiyo le sinaa wana chiŋalaŋ wanaa Mɛlɛkaa a sɔŋgɔɔ wo. O cho ko a chiŋalaŋ Kɔɔki o Mekɔɔki niŋ chiŋalaŋ wanaa Mɛlɛkaa a sɔŋgɔɔ wo le Baabuiyo soo le, kɛ a chiŋalaŋ “masaa baluaŋndo” a “masaa o chieeŋndo niŋnda” bɛɛ chilaŋ nda a sɔŋgɔɔ wo. (Isi. 38:2, 10-13; Dan. 11:40, 44, 45, NW; Chɔɔmɔŋndo 17:14; 19:19) Baa chiŋalaŋ yɛ yɔɔ hoo sim ni? Ɛ ɛ. A chiŋalaŋ pilɔɔ kpe okɔɔ Baabuiyo cho suɛi ni, kɛ a diolaŋ yɛ yɛ. Le yɛɛ naŋ nɔ yɛ miŋ dimi lende? Kanifuule, Baabuiyo dimul naa maa kaalaŋ kpou o chieeŋndo choo cho balaŋ luei o sɔŋgɔ mɛɛlaa hoo niŋ, o cho tosa mi chɔu Amakɛdɔŋndo hiŋndo.—Chɔɔmɔŋndo 16:14, 16.

Te ŋ tuu pɛ nyɛ bolii Baabuiye hei kpou dimi a chiŋalaŋ mɛɛlaa hoo le wanaa Mɛlɛkaa wo, i cho kpendekele maa, o cho Setana le nɔ diolaŋ aa Kɔɔki fula o lɛŋnde Mekɔɔkileŋ niŋndo le. Kɛ lɛŋii chuuŋgiaŋ diompilɛ ve kpou. Baa wana sim lewundu le “masaa baluaŋndo” wo cho wa sim lachinɔɔ le chuuŋgiaŋndo hoo ni? Ŋ nɔla kpeekpei miŋ dimi maa ndu le. Kɛ hei cho i chɛlaŋ a nyɛ Chɛhowa dimi hoo a Kɔɔki wo aa, “Ma fula o lɛŋnde numndeŋ niŋ ba luaŋndo pɔ, a puaa chɔuwaa num a kpaaya sɛlɛ bɛnduaa, nda kpou cho wa o suaa choo ma huŋ chiŋalaŋ nda.”—Isi. 38:6, 15, NW.

Lende koni, mi Daaniɛɛ, wana ndoo suaa le Mɛlɛka wo, o wa a boondii Ɛsikiɛɛ ve wo suaa a masa baluaŋndo okɔɔ aa, “Yooŋgula cho fulaa ba paaleŋ le chaŋndo laŋ, a la cho fulaa ba luaŋndo laŋ, la cho tosa mbo dɔɔŋnuŋ yolɛi i kala kala mbo diu wanaa faŋga faŋga. Nduyɛ, te hei i hiou pɛ, o cho tɛndii ndɔ lemasaa simi pee mɛŋma ihɛllo tɛɛŋ a pembei Chulusalɛm i chiɛi Mɛlɛkaa cho o taŋgulaa lechoo ve. Okoŋ, o cho hunɔɔ mɛɛlu tambei sɔla nduyɛ wana o wana ve lɛ niŋ le ndu mala le.” (Dan. 11:44, 45, NW) Hei velaŋ a nyɛ Ɛsikiɛɛ bɛɛ dimi a sɔɔŋ Kɔɔki cho wa tosaa woŋ.—Isi. 38:8-12, 16, NW.

Yɛɛ cho yɛ wa fulamakɔɔlioo te sɔŋgɔ mɛɛlaa hoo yɔŋnuŋ pɛ? Daaniɛɛ dimul naa aa, “A teleŋ koŋ, Maikɛl [Chiisu Kiliti], cho la sisi [a teleŋ Amakɛdɔŋndo], nduyɛ o cho niŋ isisi maa masa bɛndoo [chɔŋ a wɔsi 1914 ve] le wanaa numnda mandaa. Nduyɛ dɛnɛpalaa wa niŋndo, kani bɛɛ mi chieeŋndo kanduŋ dɛnɛpalaa waa lende yɔŋnuŋndɔ le. Kɛ Mɛlɛka cho hunɔɔ wanaa numnda baŋa, wanaa diola ndalaŋ le cho la poonyiaa o yau ndɔɔ niŋnda.” (Dan. 12:1, NW) Nyɛ Chiisu, sim lehɔl Mɛlɛkaa cho hunɔɔ tosa wo cho vɛlɛ o tɛɛsiaa o Sɔɔŋ Chɔɔmaŋndoŋ 19:11-21.

Kɛ nɛɛnɛ cho yɛ “Kɔɔki a Mekɔɔki” o Sɔɔŋ Chɔɔmaŋndoŋ 20:8? A teleŋ tofa mɛɛlaa, o wɔsiŋ 1,000 woŋ mɛɛlulaŋ, wanaa cho Chɛhowa nila kalulaŋ tosalla cho nɔ kaa diyaa pilɔɔ kpe maa ‘Kɔɔki o Mekɔɔki’ niŋ. Ndu cho yɛ lɛŋii cho wanaa Mɛlɛkaa chiŋalaŋ a sɔŋgɔɔ a teleŋ mɛɛlula nyɛpalaa bɛndoo wo ni. Nduyɛ fulamakɔɔlioo cho wa ni, kundala tiɔɔŋndaŋ ndaŋ kpou cho tambii fafɛɛŋnde sɔla! (Chɔɔmɔŋndo 19:20, 21; 20:9) Lelaŋ, o bɛnda miŋ veelu wanaa cho nilakalulaŋ tosa o wɔsila waa pilɛ laŋ mɛɛlulaŋ nda aa, “Kɔɔki a Mekɔɔki.”

Maa wanaa nɔ yeemɛi o Diom Mɛlɛkaa pɛɛkoo niŋnda, ŋ cho lehɔl o nɛi le chɔɔ wana cho simnɔŋ “masaa baluaŋndo” wo. Wana kɛ kɛ sim bɛɛ lɛŋii cho keŋ chuuŋgiaŋ nde lachi, ŋ sina maa sɔɔŋ sala tiɔɔŋ nɔ miŋ yɔŋnuŋ. (1) Kɔɔki o Mekɔɔki niŋ, a puaa nduaa chɔuwa cho batiuwaa sɔla le, nduyɛ o cho tambei sɔla. (2) Chiisu Kiliti, Masanɔ naa, cho wanaa Mɛlɛkaa piŋi nduyɛ mbo yɛɛ nda o chieeŋ sɛnɛi kɔl nyulu siooŋii ve lɛ niŋ te wo niŋ.—Chɔɔmɔŋndo 7:14-17.