SUƐI LEBOLLE O KƆƆ | YOOMOO O PIƆMNDO KƆƆLI—O CHO PA?

Yɛɛ Yɔŋnuŋ yɛ Naa te Ŋ Vi Pɛ?

Kaasoŋnda a chuaambuaa cho isisi o kɔfu wana vilɛiyo ikɛi o fondaŋ nda kumbi waŋ vilɛiya wo

“Mi yiyaŋ maa te waŋndo vi pɛ, fondaŋndaŋ layaa o kua ni. O choo choo niŋ, o yiŋndeŋ niŋ, ɔɔ fonda waŋvilɛiya sɔla kɔɔsɔɔ le helɔɔ choo choo wo. Yaa sina kpeekpei fonda waŋvilɛiya sɔla hoo kɔɔsɔɔ le helɔɔ choo choo wo le. I chi fonda koŋ o Baabuiyo niŋ te. Waŋnda ko dimi a fonda koŋ okɔɔ ni.”—Lioonɛɛ.

“Mi sɔla pɛɛkoo maa waŋchieeya kpou cho lakɔ o choo choo niŋ te a vi pɛ, kɛ I laalaŋ te. Mi yiyaŋ maa piɔmndo cho mɛɛlula nyɛ o nyɛ ni, maa chila cho le waŋvilɛiya le.”—Fanaŋndo.

Kaamaa bii num niŋ pa a nyunalaŋ ndaŋ okɔɔ, ‘Yɛɛ kpeekpei yɔŋnuŋ yɛ naa te ŋ vi pɛ? Baa wanaa naŋ kaala ma wu wa cho pa o nyɛpalaa niŋ? Ŋ cho lɛ nda pa chɔ? Vɛɛ naŋ laalaŋ yɛ a hei?’ A yandii, nuawɔ nyɛ kpeekpei Baabuiyo pɛɛku a hei okɔɔ wo. I tasei, ŋ yaasiaŋndɔ nyɛ Baabuiyo dimi a piɔmndo okɔɔ wo. Nduyɛ, ŋ cho vɛlɛ isɔɔ a tiindaŋ Baabuiyo ke naa wo.

Yɛɛ yɔŋnuŋ yɛ a waŋvilɛiya?

MULI BAABUIYO: “Wanaa cho yoomu wa sina maa, mɛɛ mɛɛ nda viou yoomu a nɔ le piɔmndo sɔlaa. Kɛ wanaa vi niŋ nda, nda nɔ yiyaŋ koŋ te. Nda nda sɔla lɛ nyɛ o nyɛ kɛndɛ o chieeŋndo hoo choo le. Wana o wana puɛɛnuŋ niŋ a nda okɔɔ. Kpeku o kpeku ŋ nɔ pɛ le tosaa o chieeŋndo hoo choo, tosa ndu a kpaaya numndo kpou, fondole [“o sɛiyo niŋ,” NW] naa ŋ nɔ le kɔlaŋ nda, kpeku soliaa cho loŋ te, yiyaŋndo a nyɛ o nyɛ okɔɔ o cho loŋ te, sinaa a nyɛ o nyɛ okɔɔ o cho loŋ te, nduyɛ kɔl kalu waa nuaa o cho loŋ te.”a—Ikilisiaatii 9:5, 10.

O Sɛiyo niŋ waŋnda kua ni te a vi pɛ. Ndu sim ni maa a nɔ lɛ yiyaŋ o yiyaŋ te, ɔɔ a nɔla lɛ nyɛ o nyɛ tosa le. Vɛɛ Choobu ndoo tiindaŋ o Mɛlɛka niŋndo che yɛ Sɛiyo? O paaleŋ lepilɛ niŋ kpe, mi nyɛm Choobu ndoo nɔ woŋ sɔla tambei, nduyɛ mi chuauwaa nduaa wu. Okoŋ kɔɔli, mi pauve tiu ndu lekɔɔ chɔŋ a bolleŋ mbo tual a peloŋ di. Mbo piɛi o Mɛlɛka lo aa, “Oo Mɛlɛka, o bɛnda bɔɔ ma kɔ vioŋ ya o Sɛiyo niŋ [“hɛl niŋ,” Katolik Douay Version] mi wa loŋ.” (Choobu 14:13, NW; 1:13-19; 2:7) Ŋ che maa Choobu ndoo chue Sɛiyo maa fondaŋ leyiŋndo le, naa o saŋga niŋ tau wa le. Kɛ, mbo yiyaŋ maa fondaŋ o fula niŋ o saŋgaa niŋndo o cho ni.

Nɛi cheleŋ cho vɛlɛ le pɛɛkoo a nyɛ yɔŋnuŋ waŋvilɛiya wo. Ŋ nɔla miŋ pɛɛku o Baabuiyo niŋ a waŋnda a ŋɔmaa, a ndaa sɔla fulasɛiniŋndo wa. Tofa kɔfoo “Fulasɛiniŋnda Ŋɔmaa Baabuiyo Soo a Laŋ Okɔɔ Laŋ.”

Wanaa ndaa sɔla haa fulasɛiniŋndo wa, opilɛ bɛɛ dimi naa maa o wa o choo choo niŋ, ɔɔ o nyɛpalaa niŋ te. Te wanaa sɔla haa fulasɛiniŋndo wa ndaa wa pɛ o fondaŋ waa naa teleŋ nda sɔla piɔmndo wo, baa a ve waŋnda dimul a hei okɔɔ le? Baa hei ve wa o Baabuiyo niŋ le mi waŋnda kpou che le? Kɛ pesiŋ bɛɛ, hei cho ipoonyiaa o Baabuiyo niŋ te. Wanaa ŋɔmaa wa haa nɔ nyɛ o nyɛ le dimi a hei okɔɔ le. Le yɛɛ? Kanifuule, ndaa sina lɛ nyɛ o nyɛ le. O cho ko mɛɛ waŋndo o wa naa o luaŋ fikpi yɛ. Nduyɛ lepum, mi Baabuiyo soliŋ luaŋ kpeku le suɛi a piɔmndo okɔɔ. Le tamaseliiyo, wanaa ndaa nɔ tiindaŋndo o Mɛlɛka niŋnda Deeve nda Stiiviŋ wa ni, nduyɛ ma “lɔl mɛɛ nda vi.”—Walta Wanaa Chiisuaa 13:36, NW; 7:60.

Tiindaŋ yɛɛ cho yɛ niŋ le waŋvilɛiya? A nɔla pa ma tendu o luaŋ maŋ?

a O New World Translation of the Holy Scriptures (Les Saintes Écritures. Traduction du monde nouveau) niŋ, diom maHibuluiyo le “Sɛiyo” cho ni, “Shiol,” nduyɛ “o maKilikiiyo cho “Hedis” ni. Baabuilaŋ lapum soliŋ diomndo “hɛl” kpeku. Kɛ yiyaŋndo maa waŋvilɛiya cho nyɛpalaa sɔla o yiŋndeŋ niŋ cho o Baabuiyo niŋ te.

FULASƐINIŊNDA ŊƆMAA BAABUIYO SOO A LAŊ OKƆƆ LAŊb

Poombɔ chua vii pɔnɔɔ wo Mi Ilaacha miŋgi poombɔ chua vii pɔnɔɔ wo yoomu o Saluɛfati niŋ, Isɔluɛi ba luaŋndo.—Masaa Bɛnduaa Tasiaa 17:17-24.

Poombɔ Shunamaitiinɔɔ Mi wana ndoo suaa le Mɛlɛka wo Ilaasia, o miiŋgu o foofo Ilaachaa wo miŋgi poombɔ waa Siunɛm chiee yoomu, okoŋ mbo kɛ ndu wanaa nduaa.—Masaa Bɛnduaa Diiŋ Nduaa 4:32-37.

Poo naa nda chɔ waŋvilɛiya wa Mɛɛ po pilɛ vi, ma chua dialuŋ ndɔŋ ma wuu muŋ chɔ chɔ o paala Ilaasia laŋ choo naa nda chɔ ndu wa. Mɛɛ po viliɛiyo hoo kɔ kunduŋ paala Ilaasia laŋ, mbo miiŋgu yoomu.—Masaa Bɛnduaa Diiŋ Nduaa 13:20, 21.

Po chua vii pɔnɔɔ o Neŋ niŋndo Mɛɛ faŋga bɛndoo wa kɔlaŋ Neŋ chiee le poo pum chɔɔ, mi Chiisu simi nda, okoŋ, mbo miŋgi ndu yoomu. Mbo chua ndu chɔ mbo yɔŋgu ndu kala ndɔ wa mɔnɛi biyɔɔ wo.—Luku 7:11-15.

Chua Chaaliɔɔ wo Chaaliɔɔ wa wana bɛndoo opilɛ le chiɛi Chuuwa ndaa piɛi Mɛlɛka wo. Mbo nyɔɔlu Chiisu le mbo siŋgi chua ndɔɔ. Mɛɛ chuaambɔɔ hoo vi dɔɔ, mi Chiisu miŋgi bɛɛ ndu yoomu.—Luku 8:41, 42, 49-56.

Lasalɔɔ, chaaŋ oo Chiisu Mɛɛ Lasalɔɔ vi mbo chua palɛi ihiɔɔlu, mi Chiisu miŋgi ndu yoomu wanaa bɔɔbɔɔ o hɔl.—Chɔŋ 11:38-44.

Dɔkaa Mi kiilanɔɔ Pitɛ miŋgi chuaa hoo yoomu. Waŋnda ndaa sina ndu bɔɔ a kɛndɛi ndoo nɔ ve.—Walta Wanaa Chiisuaa 9:36-42.

Yutikɔɔ Mɛɛ po chua piaandoo hoo fula o windɛiyo (finɛɛtiloo) mbo del mbo wu, mi kiilanɔɔ Pɔɔl miŋgi ndu yoomu pila.—Walta Wanaa Chiisuaa 20:7-12.

b Fulasɛiniŋ sɔvɛ bɛndu hiou laŋ kpou wo cho fulasɛiniŋ Chiisoo ni. O cho teŋgeŋ a fulasɛiniŋnda ŋɔmaa laŋ ndaŋ, a mɛɛ naŋ cho yaasiaa o buŋgɛi cho lachi ve niŋ yɛ.