SUƐI LEBOLLE O KƆƆ | NƐƐ YAA CHO YƐ SEIYAA CHƐHOWAA?
Wanaa suu maa vɛɛ Seiyaa Chɛhowaa cho yɛ?
Kɔɔna bɛndoo pila naŋ cho o chieeŋndo choo ni. Nduyɛ, ŋ choŋnuŋ yuŋyeŋ a kaaŋii cheleŋnde. Mi che bɛɛ naa Amɛlika fonda naa lebollo cho ni, kɛ Seiyaa Chɛhowaa a bɔɔbɔɔ cho o lɛŋii cheleŋnde niŋ. Ŋ cho le miiliɔŋndaŋ la ŋɔmaa, nduyɛ ŋ cho waŋnda Baabuiyo pɛɛkoo o lɛŋnde hiouwɔɔ 230 niŋ. Nyɛ Chiisu dimi hoo wo naŋ cho tolɔɔ kɔɔli ni, “Waŋnda cho yooŋgu kɛndɔɔ hoo dimi a Masale Mɛlɛkaleŋ o kɔɔ ba o ba fee o chieeŋndo choo, le mi waŋnda kpou a tuei.”—Maatiu 24:14.
Ba o ba naŋ wa, miŋ diikuŋ sawa cho o fondaŋ koŋ ndo, mi che bɛɛ naa ŋ choŋnuŋ yuŋyeŋ a sɔɔŋ lemasaŋ. Sabu naŋ tosa heiyo cho le diikɔŋndo nyɛ Chiisu dimul Kilisiɔŋnda wo ni, maa naŋ “soli balaŋ o sɔɔŋ chieeŋndoŋ niŋ.” Lelaŋ, ŋ luei laba o sɔɔŋ lemasaŋ chieeŋndo niŋ ɔɔ miŋ toolu chɔuwo le. (Chɔŋ 15:19; 17:16) Lelaŋ, a teleŋ chɔu chieeŋ diiŋndɔɔ, ma duau Seiyaa Chɛhowaa o chiɛila manyumndaŋ niŋ, ma tuisi nda kotaa choo, nduyɛ ma diu apum pɛɛŋ, le mɛɛ nda kɛɛ balaŋ lueiyo o chɔu koŋ niŋ yɛ. Mi wana bɛndu le kaaŋndo o Chamani niŋ poonyiaa aa, “Nda kinɛi luaaŋ takpa ni le kiɔɔ sɔɔŋ kɔl iyama ndaa kuuna o Masale Chamaŋnda bɛŋgu wo.”
“[Seiyaa Chɛhowaa] nɔ bɔɔ dialuŋ kalaŋ le kaa kɛndɔɔ chɔmndo. Ŋ nɔla miŋ soliŋ wanaa kaa kɛndɛ waa naa kpeku o foofola lemasa bɛndaŋ. Kɛ a chɛl foofola waa lende le. . . . Ma ke masaa lelɛŋnda bɛɛleŋ, kɛ a laalaŋ maa Masale Mɛlɛkaleŋ kinɛi le nɔla bahawɛila waŋchieeya kpou soli ni.”—Nova Suoboda, yau layooŋgoo o lɛŋnde “Czech Republic” leŋ niŋ
Kɛ, miŋ tosa chaŋyɛi a waŋnda. Mi Chiisu ndoo piɛi Mɛlɛka le buɛiyaa nduaa aa, “I cho num piɛi le ma faŋa nda o chieeŋndo choo le.” (Chɔŋ 17:15) Lelaŋ, ma che naa lepum wallo tosaa, piindoo, a kɔlaŋ o sukuu o fondaŋnda naŋ cho laŋ.