Le Yɛɛ Seiyaa Chɛhowaa Luei Laba o Chɔulaba Lemasa Niŋ Kposoŋ Te?
A yeema le nyɛ diom Mɛlɛkaa dimi wo diikɔŋndo. Le saboo hoo Seiyaa Chɛhowaa luei laba o chɔulaba lemasa niŋ kposoŋ te. Lelaŋ, ŋ luei sondo o nyɛ wanaa duau sawalaŋnda cho tosaa wo niŋ te, pɛ pɛ bɛɛ ŋ mel layau le wana o wana le, ŋ mel layau le kunda o kunda sim le lemasa le, ŋ sim le lemasa le, ŋ chɔulaba le siŋgaa nyɛ masaa waa dimi wo le, nduyɛ, ŋ chɔulaba le masaleŋ siŋga le. Le yɛɛ naŋ kɛɛ yɛ le muŋ ndoo tosaa? Baabuiyo ke naa sabulaŋ le hei.
Tamasi Chiisu wo naŋ cho tolɔɔ kɔɔli ni. Pesi bɛɛ Chiisu chɛl le waa masa chieeŋndo hoo le. (Chɔŋ 6:15) O sila buɛiyaa nduaa maa pɛ pɛ bɛɛ “a cho lɛ le chieeŋndo hoo le”, nduyɛ, mbo dimul buɛiyaa nduaa kpendekele maa a nɔ kposoŋ ma luei laba o chɔulaba lemasa chieeŋndo hoo niŋ te.—Chɔŋ 17:14, 16; 18:36; Maki 12:13-17.
Ŋ faŋaŋ Masale Mɛlɛkaleŋ kɔɔli le. A Masaleŋ ndaŋ okɔɔ Chiisu dimi ni aa, “waŋnda cho yooŋgu kɛndɔɔ hoo dimi a masale Mɛlɛkaleŋ okɔɔ ba o ba fee o chieeŋndo choo.” (Maatiu 24:14) Maa wanaa sim le Masale Mɛlɛkaleŋ nda, ŋ sɔla wallo le waŋnda dimullo a lɔɔ le cho hunɔɔ wo okɔɔ. Le hei, ba o ba naŋ wa pɛ, lɛŋnde o lɛŋnde naŋ wa pɛ, ŋ luei laba kposoŋ o chɔulaba lemasa niŋ te, o wa bɛɛ aa o lɛŋnde naŋ veluŋ ndeŋ niŋ.—Kɔliŋtiaŋ Diiŋ Ndɔɔ 5:20; Ɛfisiaŋnda 6:20.
Te o wa pɛ miŋ luei laba o chɔulaba lemasa chieeŋndo hoo niŋ te, koŋ mala naa miŋ wa fɛɛsɛŋ le suɛi a Masale Mɛlɛkaleŋ okɔɔ o wanaa cho o kundala yɛ yɛla lemasala chieeŋndo hoo niŋnda lo. Nyɛ naŋ suaa wo, a kaa naa kindiŋ o nɛi o nɛi niŋ le waŋnda chɔmndo maa Masale Mɛlɛkaleŋ kinɛi naŋ tiindaŋ nile bahawɛila waŋchieeya solioo.—Chondei 56:11.
Le kɛɛ naŋ kɛɛ balaŋ lueiyo o kundala yɛ yɛla lemasa chieeŋndo hoo niŋndo, koŋ chuu naa diompilɔɔ tɛɛŋ naa chaaŋaa naa laalaŋnda o chieeŋndo choo kpou. (Kolosiaŋnda 3:14; Pitɛ Tasoo 2:17) Wana dimi isɔɔ a tonya, kaŋii luei balaŋ o kundala yɛ yɛla cho o chɔulaba lemasa chieeŋndo hoo niŋndo hiŋ a piɔuwaŋndo ndapila tɛɛŋ.—Kɔliŋtiaŋ Tasoo 1:10.
Bɛɛleŋ le masɛi chieeŋnde. Mi che bɛɛ naa ŋ luei laba o chɔulaba lemasa chieeŋndo hoo niŋ te, ba o ba naŋ wa pɛ, ŋ nɔ bɛɛleŋ le masɛi cho naa choo ve. Hei Baabuiyo dimul naa le tosaa ni, mbo dimi aa, “Nya kpou la nɔ mi la tosa nyɛ wanaa cho nya chilaŋ nda a dimul nya le tosaa wo.” (Luomaŋndaŋ 13:1) Ŋ bii sawaa, ŋ mal paawa lelɛŋndo, nduyɛ, ŋ kindiŋ o nɛi o nɛi niŋ le wallo tosaa diompilɛ a masaa waa le wanaa nda cho choo wa tosaa ma wa a kɛndɛ. Ŋ tuu sooŋ le lemasa o lemasa le. Nyɛ Baabuiyo dimul naa wo naŋ naŋ tosa ni. Mi Baabuiyo dimul naa aa, “La piɛi Mɛlɛka le masaa bɛnduaa a wana o wana cho nya bolleŋ,” taama taama te a wa pɛ kɛɛsiaalaŋ tosaa, la paaliaŋ niŋ piɛile naaleŋ ndaŋ.—Timoti Tasoo 2:1, 2, tɛɛsiaalaŋ.
Te o hiŋ pɛ o suɛi lemasa chieeŋndo hoo niŋ, ŋ diikuŋ vɛlɛ di wanaa cheleŋnda le ma kɛɛsiaa a ba nda. Le tamaseliiyo, ŋ tosa wooluŋ wooluŋ le paale malaa leyau tɛɛmbuu le, nduyɛ, te waŋnda wa pɛ kɔlaŋ yaulaŋ malɔɔ, ŋ luei sondo naa leniŋ te.
Baa waalioo koni naŋ kɛɛsiaa le hei tosaa ni? Sako. Wanaa Chiisu vem hɔlte ndɔ wa, a Kilisiɔŋaa wa o wɔsi kɛmɛ tasei niŋnda bɛɛ luei laba o sɔɔŋ lamasa chieeŋndo hoo niŋ kposoŋ te. Mi yau nda veelu o puuluei niŋ aa, Beyond Good Intentions ndo dimi aa, “Mi che bɛɛ naa mi Kilisiɔŋaa tasiaa laalaŋ maa a nɔ ma ke masaa waa bɛɛleŋ, kɛ a laalaŋ kposoŋ maa a nɔ ma luei balaŋ o sɔɔŋ lemasa niŋ te.” Le chɔɔloo sondoo keiyo, yau nda veelu o puului niŋ aa, On the Road to Civilization ndo bɛɛ dimi a Kilisiɔŋaa tasiaa okɔɔ maa pɛ pɛ bɛɛ “a ve o foofo lemasa le.”
Baa kɛɛ naŋ kɛɛ hoo balaŋ lueiyo o masale chieeŋndo niŋndo chɔm ni maa naŋ cho wanaa wɔɔŋnda o lɛŋndeŋ niŋ ni? Sako. Ba o ba naŋ wa pɛ, ŋ yeema miŋ wa a kɔl nyulu, nduyɛ, ŋ kaala kɔl nyuloo. Lelaŋ, masaa waa nɔ ma wo naa o nɛi o nɛi niŋ te. Nuawɔ kona “National Academy of Sciences of Ukraine” yɔŋgu o wɔsi 2001 niŋndo. Konaa hoo soo a kiɔɔ balaŋ lueiyo o masale chieeŋndo hoo niŋ, mbo dimi aa, “Hau, wanaa bɔɔ bɔɔ hɛnaŋ a simnda Seiyaa Chɛhowaa chua laŋndaŋ te; le saboo hoo masale kunda sim le Nasi wo a Kɔmunist wo, wou nda nyɛpalaa choo o sindɔɔ niŋ ni.” Kɛ, teleŋ Soviɛt wou nda nyɛpalaa choo le heiyo bɛɛ, Seiyaa Chɛhowaa “wa sawalaŋ biyɔɔ maa ŋ pilachiee. A wa baalaa tosaa a kɔl ndaa kpou o chiɔɔŋ fau fau woŋ niŋ, o tɔlɔɔla nda soliŋ kpeku le nyɔŋ toosiaa laŋ niŋ, nduyɛ, a ve wanaa wɔɔŋ kposoŋ o masale Kɔmunisiileŋ bɛŋgu le.” Hau bɛɛ, te o hiŋ pɛ o nyɛ Seiyaa Chɛhowaa laalaŋndo, a nyɛ nda cho tosaa wo choo, mi konaa hoo mɛɛlu dimi maa pɛ pɛ bɛɛ “o tuu sooŋndo le masale kɛ kɛ le.”