A ‘Kaala pa Chaaŋ Num Wanachioo mɛɛ Ŋ Kaala Numpila Yɛ’?

1, 2. Vɛɛ Baabuiyo chɔm yɛ maa kaalaa cho nyɛ sɔvɛ?

KAALAA cho suiliŋ tɔɔma bɛndu Chɛhowaa ni. (1 Chɔŋ 4:​16) Nyɛ tase peŋ o toosiaa wo wa Chiisu ni, o wa a ndu latulu o choo choo niŋ le wɔsila bɔɔbɔɔ wo. Nduyɛ mbo pɛɛku mɛɛ Mɛlɛka chɔm kaalaa yɛ. (Kolo. 1:​15) O yoomu ndɔɔ niŋ kpou, nduyɛ a teleŋ o wa o lɛŋndeŋ choo wo, mi Chiisu chɔm maa o nɔ sinapɛŋgu walaŋndo maa Mɛlɛka kaalaa Chɛhowa cho ni. Nduyɛ mbo tual tamasi koŋ kɔɔli le kaalaa chɔmndo. Lelaŋ, ŋ nɔla miŋ nɔ tiindaŋndo maa Chɛhowa nda Chiisu cho kaalaa soliŋ kpeku lefafɛɛŋ o masale ndaleŋ bɛŋgu.

² Mɛɛ nda nyuna Chiisu le Sawa hiou sawalaŋ kpou wo, mbo dimi aa, “‘Kaala Masanɔɔ o cho Mɛlɛka ŋ piɛiyo wo nyɛ kɛndɛ kɛndɛi. Kaala ndu a kɔl numndo kpou, nduyɛ, ma wa yiyaŋndo a ndu okɔɔ teleŋ o teleŋ fee.’ Sawa tasoo o hiou laŋ kpede wo ndu cho koŋ ni. Sawa diiŋ ndɔɔ cho machuaa mɛɛ o tasoo o cho yɛ. Ndu cho ni maa la kaala [chaaŋ nya wanachioo, NW] mɛɛ nya kaala nya pila yɛ.”—Maa. 22:​37-39.

3. Nɛɛ cho yɛ “chaaŋ naa wanachioo”?

³ Kɛsiŋ o kɔl maa mi Chiisu kɛsi kaalaa le chaaŋ naa wanachioo nyɛ diiŋ ndɔɔ o faŋaŋndɔ ko bɛɛ o kaala naŋ nɔ le Chɛhowa wo kɔɔli. Hei chɔm mɛɛ o cho nyɛ sɔvɛ le kaalaa chɔmndo o chaŋyaŋ naŋ niŋ kpou yɛ. Kɛ nɛɛ cho yɛ “chaaŋ naa wanachioo”? Te ŋ nɔ pɛ lanɔɔ ɔɔ pɔnɔɔ, chaŋyɛi nɛi kpɛɛluŋnde cho wana naŋ cho o nɔɔ niŋndo ni. Chaŋyaŋ naŋ kpɛɛluŋndoŋ cho vɛlɛ Kilisiɔŋnda o kundaa niŋ ni. Nda cho yɛ wanaa naŋ piɛi Mɛlɛka tonyaa latulu wa ni. Wanaa cheleŋnda cho a naŋ komal o wali pollo niŋnda ni. Vɛɛ wanaa cho Chɛhowa piɛiyo wa chɔm yɛ kaalaa le chaaŋ nda wanachioo, nduyɛ ma tol pɛɛkula Po ndɔɔ kɔɔli?

KAALAA CHƆMNDO LE WANA NAŊ CHO O NƆƆ NIŊNDO

4. Le yɛɛ batiuwaa sɔlaŋ yɛ o nɔɔ niŋ a haki wanachioo nɔ wo kpou?

⁴ Chɛhowa kɛsi nɔ tasoo ni. Mɛɛ o toosiaa Adama nda Ifi mbo mɔɔsa nda diompilɛ. Sabu ndɔɔ wa ni le ma wa a kɔlkɛndɛ o nɔ ndaa niŋ, nduyɛ ma pei chieeŋndo a chuauwaa ndaa. (Chɛ. 1:​27, 28) Kɛ nilakalulaŋ le kpuluŋgumayɛi Chɛhowɛi tɛɛmbuu nɔ tasoo ni, nduyɛ mi hei luei waŋchieeya kpou o hakioo niŋ a piɔmndo. (Luomaŋ. 5:​12) Kɛ a koŋ kpou, Baabuiyo dimul naa mɛɛ naŋ looku miŋ sɔla batiuwaa o nɔɔ niŋ yɛ. O nɔ sila sɔviɔɔ a nɔɔ okɔɔ kanifuule, Diom Chɛhowaa o cho ni, Wana kila nɔɔ wo.—Nuawɔ Timoti Diiŋ Ndɔɔ 3:​16, 17.

5. Vɛɛ kaalaa cho yɛ nyɛ sɔvɛ o nɔɔ niŋ?

⁵ Diom Mɛlɛkaa chɔm maa kaala yiŋgoloŋndo yeemaŋ le mi waŋchieeya tuei chaŋyaŋ ndaŋ yeela. Hei cho tonya o nɔɔ niŋ. Mi Pɔɔl dimi o diomnda o poonyiaa o kundaa lo laŋ aa, “Kaalaa biunuŋ nduyɛ o nɔ kɛndɛi. O paŋala le, o nɔ yoŋga le, o heeluŋ te, o nɔ daŋga le. O nɔ manda wɔɔŋ te, o cho le dɛnɛ ndɔ kɛndɔɔ koni le o landuŋ kɔl te. O tuulu kɔl chɔ chɔ le, nduyɛ o manda suɛi nɛiyaŋ o kɔl te. O niŋ kɔl le mɛɛ waŋndo benduŋ yɛ le, kɛ mbo naŋ kɔl te waŋndo tosa suɛi sakpuei pɛ. O biunuŋ sɔɔŋ kpou, o laalaŋ sɔɔŋ kpou, o tiindaŋ sɔɔŋ kpou, nduyɛ o biunuŋ isɔɔ o isɔɔ. Kaalaa cho nyɛ mɛɛlu le.” (1 Kɔliŋ. 13:​4-8, NW) Yiyaŋndo o diomnda Baabuiyo dimilaŋ ndaŋ choo, a dɔuwɔɔ laŋ o wali niŋ nɔla mbo ke num nyaaloo kɛsɛ o nɔ numndo niŋ.

6, 7. (a) Yɛɛ Baabuiyo dimi yɛ a chilaŋ chuaa okɔɔ? (b) Vɛɛ pɔnɔ Kilisiɔŋnɔɔ nɔ yɛ mbo bii laandɔ?

⁶ Kaalaa cho bɔɔ nyɛ sɔvɛ le mɛɛ Mɛlɛka kɛɛsiaa maa nyɛ o nyɛ nɔ mbo nɔ bolleŋ yɛ. Mi Pɔɔl dimi aa, “O koŋ kɔɔli, I hɛnaŋ nya mi la sina pɛŋgu maa Kiliti ndu cho wana pɔnɔɔ bolleŋ ni. Nduyɛ, wana lanɔɔ ndu ndu wana cho ndu bolleŋ ndo cho pɔnɔ ndɔ ni. nduyɛ, Kiliti wana cho ndu bolleŋ ndo cho Mɛlɛka ni.” (1 Kɔliŋ. 11:​3) Kɛ ŋ nɔ miŋ kindila wanaa cho naa o ba bɛŋgu wa kpɔtɔtɔ le. Le tamaseliiyo, Chɛhowa cho kpaaya ndɔɔ chɔmndo Kiliti choo a kaalaa, kɛ o cho a ikaaye le. Nduyɛ nyɔɔ cho Chiisu hɛnaŋndo a hei. O hini kɔl le mɛɛ Chɛhowa cho chilaŋ chuaa a kaalaa yɛ. Lelaŋ o dimi ni aa, “I kaala Finya nuu.” (Chɔŋ 14:​31) Chiisu ve hei dimi le, te ndoo yɔŋ pɛ aa Chɛhowa cho kpaaya ndɔɔ soliŋndo kpeku o nɛi wɔɔŋndo choo le Po ndɔ o kaala wo kindilaa.

⁷ Mi che bɛɛ naa pɔnɔɔ cho laandɔ bolleŋ ni, kɛ Baabuiyo dimul ndu maa o ‘ke ndu bɛɛleŋ.’ (1 Pitɛ 3:​7) Nɛiyo opilɛ o piaanduaa ke laandaa ndaa bɛɛleŋndo cho yeemaŋ ndaŋ sinaa ni, nduyɛ ma chɛl kɛɛsiaa ndaa o sɔɔŋ ŋpum niŋ. Lelaŋ Diom Mɛlɛkaa dimi ni aa, “Nya piaanduaa yɛ, la kaala laandaa nyaa mɛɛ Kiliti kaala kunda wanaa laalaŋnda, nduyɛ mbo chɛl mbo wu le nda yɛ.” (Ɛfi. 5:​25) A tonya, mi Chiisu yɔŋgu yoomu ndɔɔ pɛŋ le buɛiyaa nduaa. Te pɔnɔɔ tol pɛ tamasi Chiisoo kɔɔli le chilaŋ chuaa a kaalaa, i wa tɛtɛlɛ le mi laanɔɔ kaala ndu, mbo ke ndu bɛɛleŋ, a ndu tuisiŋndo o ba bɛŋgu.—Nuawɔ Taitɔɔ 2:​3-5.

NƆ KAALAA LE CHAAŊAA NUMAA NYA CHO MƐLƐKA PIƐIYO WA

8. Vɛɛ wanaa cho Chɛhowa piɛiyo wa nɔ yɛ ma che chaaŋaa ndaa Kilisiɔŋnda?

⁸ Wanaa cho Chɛhowa piɛiyo, nduyɛ ma wa seileŋ timbioo a diola ndɔlaŋ, vɛlɛ a sabu ndɔɔ okɔɔ wa cho o miiliɔŋndaŋ niŋ chieeŋndo balɔɔ silɔ. Vɛɛ wana o wana cho Chɛhowa piɛiyo nɔ yɛ kuee mbo che chaaŋaa nduaa Chɛhowɛiya? Diom Mɛlɛkaa muli aa, “Ŋ tosaŋ tonyaa naa waŋnda chua, taama chaaŋaa naa wanaa laalaŋnda.” (Kalee. 6:​10; nuawɔ Luomaŋnda 12:​10.) Mi kiilanɔɔ Pitɛ poonyiaa aa, “La nɔla mi la tosa nyɛ tonya Mɛlɛkaa o dimul nya le tosaa wo, o hei niŋ, mi la dindi nya pila. Nduyɛ mi hei i tosa mi la kaala chaaŋaa nyaa wanaa laalaŋnda kpeekpei. Maa lekɛndɛi, la kaaliaŋ vellaa velle nyɛ kɛndɛ kɛndɛi a kɔlta nyalaŋ kpou.” Mi Pitɛ dimul vɛlɛ chaaŋaa nduaa laalaŋnda aa, “Kɛ nduyɛ suɛi cho suɛi lebolle kpou ve, ndi cho ni maa la kaaliaŋ vellaa velle a kɔl kpou.”—1 Pitɛ 1:​22; 4:​8.

9, 10. Le yɛɛ diompilɔɔ cho yɛ wanaa Mɛlɛkaa tɛɛŋ?

⁹ Le mɛɛ naŋ nɔ kaala kpeekpeiyo le chaaŋaa naa cho Chɛhowa piɛiyo wa yɛ, lelaŋ kɔɔna naa cho teŋgeŋ o chieeŋndo choo ni. Le handɔɔ lechoo, le mɛɛ naŋ kaala Chɛhowa nduyɛ miŋ diikuŋ sawala ndɔlaŋ yɛ, lelaŋ o cho naa tooloo a nyina ndɔ diandaa ni. Hei cho naa malaa ni miŋ wa diompilɔɔ tueiyɔɔ yeela chieeŋndo balɔɔ silɔ.—Nuawɔ 1 Chɔŋ 4:​20, 21.

¹⁰ Mɛɛ Pɔɔl wa yaandiaa le sabu kaalaa nɔ mbo wa Kilisiɔŋnda tɛɛŋndo, mbo poonyiaa aa, “Lelaŋ, sɔɔŋ nya nɔ mi la tosa niŋ ndoŋ muŋ cho muŋ ni, nyiɛɛye nɔɔ, a kɛndɛi, a waa wana tusiaŋ, a waa wana chaa ŋwaŋ biyɔɔ, a waa wana biuwaŋ. La biuwaŋ vellaa velle. Nduyɛ, te o wa pɛ mi chaaŋ num o tosal num isɔɔ, mɛɛ mal ndu le suɛi wɔɔŋ o tosal num keŋ nde. La nɔ mi la malnaŋ velle vellaa mɛɛ Masanɔɔ Mɛlɛka o mal nya le yɔŋnda nyala wɔɔŋndaŋ yɛ. O koŋ kɔɔli, suɛi lebolii nya nɔ mi la tosa ve cho ni, la nɔ kaalaa nya o lakɔl. Kaala kɛndɛlaŋ ndaŋ kinɛi, kaalaa ndu mɔɔsa laŋ ni mi nyɛ o nyɛ bɛnda nyɛ kɛndɛi.” (Kolo. 3:​12-14) Ŋ cho bɔɔ a kɔlkɛndɛ le mɛɛ “kaalaa mɔɔsa” naa yɛ mi che bɛɛ naa ŋ fula o kɔɔlima yɛyiaŋ niŋ ɔɔ kaayii yɛyɛi!

11. Vɛɛ kaalaa a diompilɔɔ tosa yɛ kɔɔna Chɛhowaa teŋgeŋ?

¹¹ Kaala kpeekpei chɔm ni maa buɛiyaa Chɛhowaa cho o piɛile tonyaleŋ niŋ. Lelaŋ Chiisu dimi ni aa, “Te la kaaliaŋ vellaa velle pɛ, o koŋ, wana o wana sina dɔɔ maa buɛiyaa niaa nya cho ni.” (Chɔŋ 13:​34, 35) Mi kiilanɔɔ Chɔŋ poonyiaa vɛlɛ aa, “Nyɛ tosa mi ŋ sina wanaa cho chuauwaa Mɛlɛkaa wa a wanaa cho chuauwaa Masa Nyina Wɔɔŋndo wa wo, ndu cho hoo ni. Wana o wana tosa nyɛ cho sakpo wo le, mɛɛ o cho chua Mɛlɛka le. Nduyɛ wana o wana kaala chaaŋ ndɔ wana laalaŋndo le, mɛɛ o cho chua Mɛlɛka le. Yooŋgu nya tuei chɔŋ bɛɛ a boondii nya simnuŋ wanaa laalaŋ o Chiisu niŋ nde, ndu cho hoo ni, maa ŋ nɔ le kaaliaŋndo vellaa velle.” (1 Chɔŋ 3:​10, 11) Kaala teŋgeŋ tosa mi diompilɔɔ wa Seiyaa Chɛhowaa tɛɛŋndo chɔm ni maa buɛiyaa tonya Kilitiaa nda cho ni, wanaa Mɛlɛka cho soliŋndo kpeku le wali ndɔ dimiaa yooŋgu kɛndɛ leMasaa tosaa ba o ba fee o chieeŋndo choo wo.—Maa. 24:​14.

“FAŊGA BƐNDU BƐNDOO” CHUUŊGIAA

12, 13. Yɛɛ “faŋga bɛndu bɛndoo” cho yɛ niŋ tosaa, nduyɛ yɛɛ cho yɛ suŋ yɔŋnɔŋ a wanaa cho o faŋgaa hoo niŋnda?

¹² Buɛiyaa Chɛhowaa a bɔɔbɔɔ cho o “faŋga bɛndu bɛndoo” hoo tɛɛŋ, o “fula o lelɛŋ o lelɛŋ, a lekaa o lekaa, a waŋnda suu o suu, a isɔɔ o isɔɔ maŋgalaa” niŋndo. Nduyɛ a cho ‘isisi o kpeŋgbei lemasa [Mɛlɛkaa], a saa fɔŋndɔɔ [Chiisu Kiliti] lachi.’ Nɛɛyaa nda cho yɛ? “Wanaa fula o nyɛ palaa bɛndoo niŋ nda cho haa ni. Nda tɔɔ nyɛla ndalaŋ a kooma saa fɔŋndɔɔ mi la yɔŋnuŋ la humbu fo fo ni.” Nda dɔu tiindaŋndo o sala baŋaa Chiisoo niŋ ni. Wanaa cho o “faŋga bɛndu bɛndoo” hoo tɛɛŋnda kaala Chɛhowa a Po ndɔɔ, nduyɛ ma wa Mɛlɛka “saaŋgiallo idii a ichɔl.”—Sɔɔŋ. 7:​9, 14, 15.

¹³ Mɛlɛka cho suŋ chieeŋ dɛnɛ wɔɔŋndo hoo tɛɛmbuu a teleŋ “nyɛ palaa” bɛndoo. (Maa. 24:​21; nuawɔ Chɛluimaya 25:​32, 33.) Le mɛɛ Chɛhowa kaala buɛiyaa nduaa yɛ, o cho nda kiindiaa a teleŋ koŋ mbo yɛɛ nda o chieeŋ sɛnɛiyo niŋ. Mɛlɛka “cho nda mamɛmɛ o mamɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa.” Wɔsilaŋ le 2,000 la hiou niŋ ni chɔŋ a teleŋ suɛi hei dimiŋndo. A nɔ pa yeemɛi le waa o Kpele Hɛnɛkiɔɔ niŋ te “nyɛ o nyɛ paandu chuu faŋaŋ” pɛ?—Sɔɔŋ. 21:​4.

14. Vɛɛ kpɛ faŋga bɛndu bɛndoo kui yɛ niŋ?

¹⁴ Mɛɛ palɛi mɛɛlɛi kanduŋ a wɔsi 1914 ve, waalaŋ nyɛɛmbɔ koni buɛiyaa Chɛhowaa wa o chieeŋndo choo ni. Kilisiɔŋaa pɔyaŋaa kunda pɔmbɔ lo o lɛŋndeŋ choo wa nɔ kaalaa le chaaŋ nda wanachioo. Nduyɛ nyina Mɛlɛkaa cho nda malaa le biuwɔŋndo wali dimiaa yooŋgu kɛndɛ leMasaa tosaa. Fulamakɔɔlioo cho ni, hau, faŋga bɛndu bɛndu nɔ tiindaŋndo le waa o lɛŋndeŋ choo wo cho chuuŋgiaŋndo naapilɛ. Hau, ŋ cho niŋ le 8,000,000 o kundalaŋ niŋ hiouwɔɔ 115,400 chieeŋndo balɔɔ silɔ. Nduyɛ ŋ cho hiouwɔɔ lachi a kuiyo. Le tamaseliiyo, Chɛhowɛiyaa sɛnɛiya hiouwɔɔ 275,500 yiŋ o wɔsi 2014 ve niŋ ni. Koŋ cho ni maa waŋnda le 5,300 yiŋ o lɔɔ bɛŋgu ni.

15. Tɛɛsiaa wɔ mɛɛ kpɛ wali dimiaa yooŋgu kɛndɔɔ tosaŋ niŋ yɛ.

¹⁵ Mɛɛ wali pollo cho tosaŋndo yɛ cho bɔɔ suɛi kaamaa bɛndu. Yaula naala Baabuilaŋ la cho niŋ toosiaŋndo o sɔɔŋ maŋgalaŋ niŋ hiouwɔɔ 700. Yau Bandu Mɛŋgɛlaa hiou piɔunɔŋ o chieeŋndo choo. Nduyɛ a toosiaa ndu ipaŋgu o ipaŋgu le 52,000,000 a nyɛ lechoo, o sɔɔŋ maŋgalaŋ 247 niŋ. Yɛɛ Kpeekpei Baabuiyo Pɛɛku Yɛ? cho yau naŋ soliŋ kpeku le waŋnda Baabuiyo pɛɛkoo wo ni. Yauwo hoo toosiaŋ niŋ le 200,000,000, o sɔɔŋ maŋgalaŋ 250 niŋ.

16. Yɛɛ cho yɛ tosaa mi kumbuii kɔɔna Chɛhowaa o chieeŋndo choo wa hiouwɔɔ lachi iMɛlɛkayaa?

¹⁶ Yɛɛ tosa yɛ miŋ wa hau hiouwɔɔ lachi kaamaa bɛndoo hoo chɔɔ? Tiindaŋ naŋ dɔu o Mɛlɛka niŋndo a chɛlɔɔ naŋ chɛl Baabuiyo a kɔl naa kpou, maa Diom Chɛhowaa wo, cho hei tosaa ni. (1 Tɛsa. 2:​13) Setana, o “cho mɛlɛka le chieeŋ yɔŋ wɔɔŋndo hoo wo” tul wanaa Chɛhowaa leyɛ nduyɛ mbo wa nda simullo. Kɛ a koŋ kpou, a cho hiouwɔɔ lachi a Chɛhowa piɛiyo.—2 Kɔliŋ. 4:​4.

CHƆM ACHELEŊNDA KAALAA LE LƆƆLƆƆ

17, 18. Kaa yɛɛ buɛiyaa Mɛlɛkaa nɔ yɛ ma chɔm wanaa naŋ nɔ laalaaŋ pilɛ le wa?

¹⁷ Kaa yɛɛ buɛiyaa Chɛhowaa nɔ yɛ ma chɔm wanaa cho Mɛlɛka tonyaa piɛi le wa? O wali naa pollo niŋ, miŋ sɔla mulilaŋ yɛyɛ. Lapum la naŋ, lapum la niŋ te. Kɛ mɛɛ o mɛɛ waŋnda muli, Baabuiyo chɔm nyɛ buɛiyaa Mɛlɛkaa nɔ ma tosa wo. O dimi aa, “Nduyɛ, mɛɛ wana chɔm waŋndo suɛi mbo hini kɔl, o koŋ kɔɔli, mi yeemɛi bii ndu yɛ lende nya soo ni. Te wana o wana nyuna nya isɔɔ o isɔɔ pɛ, la sina mɛɛ nya muli ndu diom mbo wa sakpo yɛ.” (Kolo. 4:​6) Te ŋ wa pɛ wanaa nyuna naa wa tiindaŋ naa chɔmndo, ŋ nɔ miŋ “dimul nda nyɛkɛndɛi o bɛɛle kɛɛsiaa niŋ.” Kanifuule, ŋ nɔ kaalaa le chaaŋ naa wanachioo.—1 Pitɛ 3:​16.

¹⁸ Ŋ nɔ miŋ chɔm kaalaa le chaaŋ naa wanachioo o yɔŋ bɛɛ mi wana chiɛiyo kɛɛ yooŋgu naŋ cho ndu dimullo wo a kɔl tuu wo, ɔɔ mbo pɛɛsa naa. Ŋ nɔ miŋ tol tamasi Chiisoo hoo kɔɔli. “Mi waŋnda yiou Kiliti, kɛ, o miŋgi le. Ma tusi ndu nyɛ palaa choo, kɛ ndu kɔŋgɔlaŋ bɛɛ nda le nda nyɛ palaa tusi choo le. Kɛ mbo duau tiindaŋ ndɔɔ o Mɛlɛka niŋ o cho yamanɔ sakpoo wo.” (1 Pitɛ 2:​23) O yɔŋ bɛɛ miŋ wa a chaaŋaa naa laalaŋnda ɔɔ wanaa cheleŋnda, ŋ nɔ miŋ tuisiŋ le silaa hoo biyɔɔ, “A yɔŋ bɛɛ mi waŋnda tosal nya dɛnɛ wɔɔŋndo, la miŋgul nda a i wɔɔŋ te. Kɛlɛŋgaa, a yɔŋ bɛɛ mi waŋnda yei nya, la yei nda sɔŋgɔ koŋ te. Yɔŋi nya miŋgul nda a o wɔɔŋ yɛ, la dɔu nda sala.”—1 Pitɛ 3:​8, 9.

19. Sila yɛɛ Chiisu yɔŋgu yɛ a wanaa simul naa wa okɔɔ?

¹⁹ Te wanaa Chɛhowaa wa pɛ kaa tuisiaŋndo chɔmndo, mɛɛ a cho sawa sɔvɛ Chiisu yɔŋgu wo diikɔŋndo. O Pɛɛku Chiisu wa o Pembei choo wo, mbo dimi aa, “La tuei ma dimul naa Chuuwa finyaa naa mamaa aa, ‘La kaala wanaa kaala nya wa, kɛ, mi la tul wanaa tul nya leyɛ wa leyɛ.’ Kɛ, ya ya, I cho nya dimullo maa la kaala wanaa tul nya leyɛ wa. Nduyɛ, mi la piɛi Mɛlɛka le mbo dɔu wanaa tusi nya nyɛ palaa choo wa sala. La tosa hei le mi la nɔ kaa maa chuauwaa Mɛlɛka, ndu yɔŋnuŋ maa finya nya cho o fondaŋ ndɔɔ wo ni. Kani fondole, Mɛlɛka ndu ndu, o wa wana kɛndɛ, o wa wana wɔɔŋ, nda fau yɔŋgoo nda paaleŋ. Nduyɛ, wanaa tosa tonyaa wa ni, a wanaa tosa dɛnɛ wɔɔŋndo wa, mbo yɔŋgu piɔɔ le nda kpou.” (Maa. 5:​43-45) A tonya, maa buɛiyaa Mɛlɛkaa, ŋ nɔ kuee miŋ ‘kaala wanaa tul naa leyɛ wa,’ mɛɛ o mɛɛ nda tosal naa sɔɔŋ.

20. Le yɛɛ kaalaa le Mɛlɛka a chaaŋ naa wanachioo cho yɛ wa o piaa cha o chieeŋ sɛnɛiyo niŋ? (Tofa fotueiyo o peele naŋ kandu leŋ choo.)

²⁰ Nyɛ o nyɛ wanaa Chɛhowaa tosa o yoomoo niŋ, a nɔ kuee ma chɔm maa a kaala Chɛhowa a chaaŋ nda wanachioo o kaa ndaa niŋ, a sɔɔŋ nda tosa woŋ. Le tamaseliiyo, o yɔŋ bɛɛ mi waŋnda apum chɛl yooŋgu kɛndɛ leMasa naŋ dimul nda wo le, ŋ nɔ miŋ chɔm nda kaalaa te a wa pɛ o bahawɛiyo niŋ. Mi kiilanɔɔ Pɔɔl poonyiaa aa, “La chɛl mi kuee nyɛ sɔlaa wana o wana wa nya choo le. Kuee nya nɔ mi la wa bɛŋgu wo suee cho kaaliaŋndo vellaa velle ni. Kani fondole, wana o wana kaala chaaŋ ndɔ wana chioo, mɛɛ o tosa nyɛ sawala Mɛlɛka ke Muuse laŋ la dimi wo. Kani fondole, sawalaŋ la dimi aa, “Wana suunda a lanɔ pila kɛlɛŋgaa pɔnɔ pila le, dii wana le, yɔŋ levii le, luɛi lehɔl o nyɛ pila le.” Sawalaŋ ndaŋ a la pilɛ laŋ fau bolle ndɔleŋ le cho sawa dimi aa, “Kaala chaaŋ num wana chioo mɛɛ ŋ kaala num pila yɛ” wo ni. Kani fondole, wana o wana te a kaala chaaŋ num wana chioo pɛ, a tosal wana koŋ dɛnɛ wɔɔŋ te. Te waŋndo kaala chaaŋ ndɔ wana chioo pɛ, mɛɛ wana koŋ o chii nyɛ sawala Mɛlɛkalaŋ la dimi wo chua kpou.” (Luomaŋ. 13:​8-10) Naa Seiyaa Chɛhowaa chɔm kaala kpeekpeiyo o chieeŋ kɛɛ diompilɛ, niilu latanda, dɛnɛ wɔɔŋ cho hoo Setana o ba bɛŋgu wo. (1 Chɔŋ 5:​19) A tonya, te Setana a nyinaa nduaa wɔɔŋnda, vɛlɛ a waŋchieeya nila kaluaa sɔla tambei pɛ, nyɛ o nyɛ cho wa tosaŋndo o chieeŋndo choo a kaalaa. Nuawɔ se sala bɛndu le mi wanaa cho wa o chieeŋndo choo wa kaala Mɛlɛka a chaaŋ nda wanachioo!