Tosa Boondii Loonaŋnde hei Teleŋ Nyaale
1. Ɔɔ nɛiyo o pilɛ o naŋ tosa boondii loonaŋnde hei teleŋ nyaale wo?
1 A yeema pa ma chɔɔlu nyaale numndo o Fuoo niŋ, Nyaakuɛiyo, vɛlɛ a Bukuloo? Nɛiyo o pilɛ cho ni, mɛɛ ma kindiŋ ma yɔŋguŋ tau o wali pollo niŋ. Te o bɛnda pɛ, kɔɔfale malalaŋndeŋ le mala num le hei tosaa. Vɛɛ hei chuu yɛ num nyaaloo?
2. Vɛɛ yɔŋgɔŋndo tau o wali pollo niŋ ke yɛ naa nyaaloo?
2 Chɔɔlu Nyaale Numndo. Chɛhowa toosiaa naa le miŋ wa a nyaale te ŋ wa ndu piɛiyo pɛ, nduyɛ, miŋ nɔ yeemɛi le suɛi nduɛi kɛsiŋndo lachi. (Mat. 5:3) O toosiaa naa vɛlɛ le nyaaloo sɔlaa te ŋ wa pɛ acheleŋnda kɛndɛi tosallo. (Walta Wa. 20:35) Wali pollo tiuba mbo mala naa le Mɛlɛka piɛiyo vɛlɛ a waŋnda malaa. Yiyaŋ maa te ŋ yɔŋguŋ pɛ tau o wali pollo niŋ, o chuu naa nyaaloo puɛɛ. Le handɔɔ lechoo, mɛɛ naŋ kua fau o wali pollo niŋ, lende ko naŋ sɔla kɔlkaloo le yooŋgu kɛndɔɔ dimioo ni. Te ŋ sɔla kɔlkaloo hoo pɛ, ŋ cho wa a dialuŋ fulaa le yooŋgu kɛndɔɔ dimioo siooŋii bii naa le. Ŋ nɔ nɛila yɛ yɛlaŋ le yooŋgu kɛndɔɔ dimioo vɛlɛ a pɛɛkula Baabuilaŋ kandɔɔ. Muŋ kpou tosa ni mi wali pollo yeela.
3. Le yɛɛ Fuoo a Bukuloo cho yɛ paŋguŋ kɛndɛ le kɔɔfale malalaŋndeŋ tosaa?
3 Fuoo a Nyaakuɛiyo, paŋguŋ kɛndɔŋ pila ŋ cho ni le kɔɔfale malalaŋndeŋ tosaa kanifuule te ŋ yeema pɛ, ŋ tosa havɛilaŋ (Lɛɛlɛlaŋ) 30 te koŋ te 50. Le handɔɔ lechoo, chɔŋ a Fuoo 22, o Ndaamaa choo, mbo kɔ bii a paale loonuŋyaa cho wa leŋ Bukuloo 14, o Kɔndɔmaa choo, ŋ cho wa wanaa cheleŋnda veeloo le ma hiŋ le loonuŋyaa hoo biyɔɔ. Kundalaŋ kpou la cho wa a nyaale le wallo hoo tosaa vellaa velle le ma veelu waŋnda tau o tanda ndaa niŋ o teleŋ koŋ niŋ.—Sɛf. 3:9, NW.
4. Te a yeema pɛ kɔɔfale malalaŋndeŋ tosaa, yɛɛ ŋ nɔ yɛ ma tosa?
4 Bɛɛndiaŋ suŋ Suŋ. Te o yɔŋ pɛ maa a tosa wɔ hei le, mɛɛ tofa walta ŋ nɔ le tosaa laŋ okoŋ, ma dɔɔniaa la tiŋ le ma yɔŋguŋ tau o wali pollo niŋ o wa bɛɛ le paŋgei i pilɛ ɔɔ mbo hiou lende. Dɔu ndi o lepiɛi niŋ. (Chem. 1:5) Suukaŋ a yuŋgu numndo vɛlɛ a chaaŋaa numaa laalaŋnda o kundaa niŋ a ndi okɔɔ. (Tal. 15:22, NW) Mi che bɛɛ naa a nɔ kɛndiaa sɔwɛ le, nduyɛ ma nɔ waltaŋ o ba tau, num bɛɛ tiuba ma sɔla nyaaloo tau te a tosa pɛ kɔɔfale malalaŋndeŋ.
5. Yɛɛ wa yɛ fula makɔɔlioo te ŋ yɔŋguŋ pɛ tau o wali pollo niŋ a boondii loonuŋyaa hei?
5 Chɛhowa yeema buɛiyaa nduaa ma wa a nyaale. (Chon. 32:11, NW) Te ŋ yɔŋguŋ pɛ tau o wali pollo niŋ a boondii loonuŋyaa hei, o cho ko naa suee le cho wa a nyaale le, kɛ Finya naa o choo choo niŋ bɛɛ cho wa a nyaale.—Tal. 23:24; 27:11, NW.