A cho Pa Bɛɛndiaŋndo le Loonuŋyaa?

Naisaŋ 13 wɔsi 33 Boondii Chiisu ve, mi Chiisu sina maa nyumamaŋ koni ndoo nɔ ni le waa a buɛiyaa nduaa laalaŋnda latulu mbo sɔla piɔmndo. Le hei, mi Chiisu yeema le Bɔŋaŋ Loonaŋndo a Hiouwɔɔ Choo mɛɛlaa biyɔɔ a buɛiyaa nduaa latulu. Mɛɛ nda chii nyɛdiaa koŋ dio, mbo tosa nyɛdiaa cheleŋ le mi buɛiyaa nduaa wa loonɔŋndo a ndu. Baabuiyo veelu ndu aa Nyɛdiaa Ichɔl Salamanɔɔ. Nduyɛ ndaa nɔ fɛŋ ma bɛɛndiaŋ nyɛkɛndɛi le bɔŋaŋ sɔvɛ waa naa. Le hei, mbo yɔŋ Pitɛ nda Chɔŋ le ma kɔ bɛɛndiaa pɔɔ fondaa le bɔŋaŋndo hoo biyɔɔ. (Luku 22:7-13) Chɔŋ niŋ a teleŋ koŋ, wɔsi o wɔsi, Kilisiɔŋaa yeema le Loonɔŋndo a piɔm Chiisoo okɔɔ wa bɛɛndiaŋ fɛŋ nyɛkɛndɛi le bɔŋaŋ sɔvɛɔ hoo. (Luku 22:19) Sɔɔŋ sɔvɛ kuɛɛ naŋ nɔ yɛ miŋ tosa le bɛɛndiaŋndo le Loonuŋya cho hunɔɔ a Nyaakuɛiyo 3 wo?

Kɛɛsiaala Bɛnduaa kundaa nɔ ma Tosalaŋ:

Bɛnduaa tosa kɛɛsiaalaŋ le bɔŋaŋndo hoo biyɔɔ o Toŋgo leMasa Seiyaa Chɛhowaa niŋ ɔɔ o fondaŋ kɛndɛ cheleŋ. Naa chalaa nɔ ma wa tau o fondaŋ bɔŋaŋndo cho biinɔŋndo nduyɛ o nɔ mbo biinuŋ o manyum niŋ te. Fondaa hoo nɔ vɛlɛ mbo nɔ naa hueiyii fɛfɛi nɔ mi wa luɛiyɔɔ wa. Nduyɛ a keleŋa kɛɛsiaa tosa le fondaŋ bɔŋaŋndo nɔ le biinɔŋndo wo dindioo nyɛkɛndɛi.
A hɛli wana chaa suɛi yɔŋgoo nyɛkɛndɛiyo, wana cho bɔŋaŋndo kumbi wo, a puaapillia piɛi niŋ o beediiyo choo a muɛiyaŋ ndo.
Te kundalaŋ la tiɔɔŋ la cho bɔŋaŋ loonuŋyaa biyɔɔ o toŋgo pilɔɔ niŋ ni, mɛɛ kɛɛsiaa tosaŋ le teleŋ kunda kɛ kɛ nɔ mbo kandu wo a teleŋ nda nɔ ma chiiyo. Wanaa chiiya nɔ ma sina naa nda nɔ ma fula wa vɛlɛ, mi wanaa nɔ le kandɔɔ wa bɛɛ sina naa nda nɔ ma luɛiya. Wanaa nɔ nyɛm nyaanaŋndoŋ nda nɔ ma sina naa nda nɔ ma kɛsi muŋ nda.
A hɛli puaapiliaa wa niŋ waŋnda naachalaa kioo wa a puaapiliaa wa niŋ waŋnda beediiyo a muɛiyaŋ kioo wa. La chɔm nda nyɛ nda nɔ ma tosa wo nyɛkɛndɛi.
A tosa kɛɛsiaa le beediiyo a muɛima kpeekpeima yeemaŋ ndaŋ, peletiilaŋ (sɛtilaŋ), taalala mamuɛilaŋ, tibii kɛndɔɔ, a kola tibiiyo.

Kɛɛsiaala Wanaa Dimiaa Yooŋgu Kɛndiaa nɔ ma Tosalaŋ:

A kɛɛisaa le ma yɔŋuŋ tau o wali pollo niŋ a boondii naŋ cho wa waŋnda veeloo le Loonuŋyaa wo
Poonyiaa diola wanaa ŋ veelu niŋ le Loonuŋyaa wa o yauwo choo. Nda cho ni, wanaa ŋ cho Baabuiyo pɛɛkoo wa, wanayaŋ numndoŋ, chaaŋaa numaa sukuuwa, chaaŋaa numaa walla, a wanaa cheleŋaa ŋ sina wa.
Kindiŋ ma nua bolii Baabui hɛliŋ le nuaa a teleŋ Loonuŋyaa wo nduyɛ ma yiyaŋ yiŋgoloŋ o ndi choo.
Huŋ o bɛɛndiaŋ le wanaa naŋ veelu le Loonuŋyaa wa demullo.