Ŋ Cha Sabu Sɔvɛɔ o Bɔŋaŋnda Naŋ Bii le Kɔlaŋ o Wali Pollo Niŋndo o Peelɔŋndo

1. Le sabu yɛɛ bɔŋaŋnda naŋ bii tuupa mi kuɛ o wali pollo niŋndo la cho yɛ?

¹ Boondii pilɛ, mi Chiisu bii bɔŋaŋndo a buɛiyaa nduaa ŋwaŋ 70 tuupa ma kua yooŋgu kɛndɔɔ dimioo. (Luku 10:1-11) Mbo dɛɛniaa nda maa a cho wa nda kpeele le kɛ a cho nɛi chɔmaa sɔla sanaa a Masanɔ nɔ wallo wo, Chɛhowa. Mbo yɔŋgu nda vɛlɛ silala bɛɛndiaa nda le yooŋgu kɛndɔɔ dimioo nyɛkɛndɛiyo. Nduyɛ, mbo piɔu nda a ŋiɔɔŋ ŋiɔɔŋ tuupa ma kua. Le sabu pilɛ koŋ kpe naŋ bii hau bɔŋaŋndo ni tuupa miŋ kuɛ yooŋgu kɛndɔɔ dimioo—le naa dɛɛniaa, bɛɛndiaa, vɛlɛ a naa kɔɔnaa nyɛkɛndɛi.

2. Le vɛɛ kpɛ bɔŋaŋ naŋ bii le kɔlaŋ o wali pollo niŋndo nɔ yɛ mbo viou?

² O waalioo niŋ, bɔŋaŋ naŋ bii le kɔlaŋ o wali pollo niŋndo cho le chemchemndaŋ 10 tei 15. O teleŋndo hoo bɛŋgu nda piɔu waŋnda ni, ma chɔm tanda naŋ nɔ le kɔlaŋndo, vɛlɛ ma kinda a piɛileŋ. Kɛ siŋgaŋndo yɔŋnuŋ mɛɛ bɔŋaŋndo hoo nɔ mbo biinuŋ niŋ yɛ. Kanduŋ a Nyaakuɛiyo, bɔŋaŋ naŋ bii le kɔlaŋ o wali pollo niŋndo nɔ mbo wa niŋ le chemchemndaŋ ma ŋuɛɛnu ɔɔ ma ŋɔmmɛu. Kɛ o wa bɛɛ lende, te kunda cheleŋ nɔ le hunɔɔ bɔŋaŋndo biyɔɔ o toŋgo pilɔɔ niŋ pɛ, mɛɛ teleŋndo le bɔŋaŋ naŋ bii le kɔlaŋ o wali pollo niŋndo nɔ mbo wa o biŋgii naa kanifuule, nya chii niŋ bɔŋaŋ nyaa tueiyɔɔ yeela. Teleŋndo chuaa chobe le bɔŋaŋndo hoo biyɔɔ mala wanaa dimiaa yooŋgu kɛndiaa ma tosa teleŋndo tau o wali pollo niŋ. Le handɔɔ lechoo, te wanaa cho o kɔɔfaleŋ niŋnda ɔɔ wanaa dimiaa yooŋgu kɛndiaa kandu niŋ pɛ suɛi o waŋnda lo tuupa ma hiŋ o bɔŋaŋ naŋ bii le kɔlaŋ o wali pollo niŋndo, mɛɛ teleŋ pɔmbɔ koni nda cho tosa ni ma hiou vɛlɛ lachi a suɛi o waŋnda lo.

3. Le wanaa dimiaa yooŋgu kɛndiaa malaa tau, vɛɛ bɔŋaŋnda naŋ bii le kɔlaŋ o wali pollo niŋndo la nɔ yɛ mi la kɔɔnaŋ?

³ Kɛɛsiaa nɔ mbo tosaŋ nyɛkɛndɛi le bɔŋaŋnda naŋ bii le kɔlaŋ o wali pollo niŋndo le wanaa dimiaa yooŋgu kɛndiaa malaa. O kundala bɔɔbɔɔ niŋ, o wa tɔnɔɔ le mi kundala dimiaa yooŋgu kɛndɛla cho o kundaa niŋndaŋ la bɔɔŋiaŋ o fondaŋ nda yɛ yɛlaŋ le kɔlaŋ o wali pollo niŋ. Hei wa tɛtɛlɛ le mi wanaa dimiaa yooŋgu kɛndiaa kuɛ o fondaŋ naŋ bii bɔŋaŋndo tuupa miŋ kuɛ o wali pollo niŋndo vɛlɛ a tanda naŋ nɔ le kɔlaŋndo. O ve i kala le wanaa dimiaa yooŋgu kɛndiaa piɔuwo le. Nduyɛ, o wa vɛlɛ tɛtɛlɛ le wanaa cho chilaŋ le kundala yɛ yɛla cho le yooŋgu kɛndɔɔ dimioo o kundaa niŋndaŋ le ma sina wanaa cho o kunda ndaa niŋnda nyɛkɛndɛi. Bɛnduaa kundaa tofa mɛɛ o bɛnda le wanaa dimiaa yooŋgu kɛndiaa yɛ ma tosa kɛɛsiaa bɛnda wo. Tuupa mi la kinda bɔŋaŋndo a piɛileŋ, wana o wana nɔ mbo sina tanda nya cho kɔlaŋndo nduyɛ a wana o nɔ mbo kuɛ wo.

4. Bɔŋaŋnda naŋ bii o lɔɔ tɛɛŋndaŋ, le yɛɛ la hiu bɔŋaŋnda naŋ bii le kɔlaŋ o wali pollo niŋndo sɔvɛyɛi le?

⁴ Bɔŋaŋnda Naŋ Bii o lɔɔ Tɛɛŋndaŋ la Hiu Bɔŋaŋnda Naŋ Bii le Kɔlaŋ o Wali Pollo Niŋndo Sɔvɛyɛi Le. Le tɔnɔ wanaa cho kɔlaŋ o wali pollo niŋnda kinɛi bɔŋaŋnda biinuŋ le kɔlaŋ o wali pollo niŋndo la cho ni. O cho kundaa kpou le huŋ o bɔŋaŋndaŋ ndaŋ te. Kɛ koŋ chɔm naa maa bɔŋaŋnda naŋ bii o lɔɔ tɛɛŋndaŋ la cho nyɛ sɔvɛ mbo hiau bɔŋaŋnda naŋ bii le kɔlaŋ o wali pollo niŋndo le. Bɔŋaŋnda naalaŋ kpou vɛlɛ a bɔŋaŋnda naŋ bii le kɔlaŋ o wali pollo niŋndo, ke sɔvɛ fula Chɛhowa o ba wo la cho ni. La mala naa le acheleŋnda kpeeŋiaa miŋ chɔm nda kaalaa vɛlɛ a walta kɛndɛlaŋ tosaa. (Hibu. 10:24, 25) Lelaŋ, wana cho bɔŋaŋ naŋ bii le kɔlaŋ o wali pollo niŋndo tosaa wo nɔ fɛŋ mbo bɛɛndiaŋ nyɛkɛndɛi le mi bɔŋaŋndo chuu Chɛhowa saŋgalaa nduyɛ mi wanaa hiŋ o bɔŋaŋndo wa bɛɛ sɔla tɔnɔɔ. Te o bɛnda pɛ, wanaa dimiaa yooŋgu kɛndiaa yeema kɔlaŋ o wali pollo niŋnda kindiŋ ma kuɛ o bɔŋaŋndo hoo.

5. (a) Kɛɛsiaa yɛɛ wana cho wali pollo chilaŋ o kundaa niŋndo nɔ yɛ mbo tosa le bɔŋaŋnda naŋ bii le kɔlaŋ o wali pollo niŋndo? (b) Vɛɛ ndepilɛnɔɔ nɔ yɛ mbo tosa bɔŋaŋ naŋ bii le kɔlaŋ o wali pollo niŋndo?

⁵ Wana cho nɔ le bɔŋaŋndo tosaa wo nɔ mbo bɛɛndiaŋ. Le mi waŋndo wa o bɛɛndiaŋ le suɛi nduɛi yɔŋgoo nyɛkɛndɛi o bɔŋaŋndo, o nɔ mbo keleŋa suɛi nduɛi sɔla. Lende koni naŋ nɔ ni miŋ tosa le bɔŋaŋnda naŋ bii le kɔlaŋ o wali pollo niŋndo. Te kundala yɛ yɛlaŋ o kundaa niŋ la chuuŋgiaŋ pɛ o fondaŋ ndaa le bɔŋaŋ naŋ bii le kɔlaŋ o wali pollo niŋndo, wanaa cho kundala laŋ chilaŋnda ɔɔ wanaa ndaa malaa nɔ ni ma tosa bɔŋaŋndo. Kɛ te o yɔŋ pɛ aa kundaa kpou chuuŋgiaŋ naapilɛ ni le kɔlaŋ o wali pollo niŋ, wana cho wali pollo chilaŋ o kundaa niŋndo hɛli waŋndo mbo tosa bɔŋaŋndo. Mi wanaa cho wali pollo chilaŋ o kundalaŋ niŋnda apum tosa kɛɛsiaa wali pollo ma ke wanaa cho bɔŋaŋndo hoo tosaa wa. Okoŋ, ma handu vɛlɛ kɛɛsiaa pilɛ koŋ kpe o pɛŋgɛi naŋ tofa yooŋgulaŋnde. Wana cho wali pollo chilaŋ o kundaa niŋndo nɔ mbo tosa kɛɛsiaa kɛndɔɔ te o wa pɛ waŋndo suei yulɔɔ le bɔŋaŋndo hoo tosaa. O kɛsiŋ o kɔl maa wanaa o cho hɛli le bɔŋaŋndaŋ ndaŋ tosaa wa nɔ ma tosa mi la yeela, ma chaa pɛɛkoo, nduyɛ ma sina mɛɛ nda kɔɔna waŋnda yɛ. Te bɛndu kundaa, buɛi malalaŋndo ɔɔ puaapilɛnɔ suiliŋndo ve le bɔŋaŋndo hoo tosaa a palɛi pum te, mɛɛ wana cho wali pollo chilaŋ o kundaa niŋndo dimul ndepilɛnɔ suiliŋndo le bɔŋaŋndo hoo tosaa.—Tofa buŋgɛi hei, “Te Ndepilɛnɔɔ Nɔ le Bɔŋaŋndo Hoo Tosaa Ni.”

6. Lɛ yɛɛ o bɛnda yɛ mi wana cho wa bɔŋaŋ naŋ bii le kɔlaŋ o wali pollo niŋndo tosaa wo nɔ yɛ fɛŋ mbo bɛɛndiaŋ nyɛkɛndɛi?

⁶ Te o yɔŋ pɛ miŋ sɔla suɛi le yɔŋgoo o Sukuu Manda iMɛlɛkayaa ɔɔ o Bɔŋaŋ Wali Pollo niŋ, miŋ chua teleŋ naa le ndi toosiaa nyɛkɛndɛi. Ŋ sɔla suɛi miŋ lo chumndo tei mɛɛ miŋ wa kɔlaŋ o bɔŋaŋndo malaŋ naŋ yiyaŋ le nyɛ naŋ cho la kɔ dimi wo le. Te ŋ sɔla pɛ dikeŋnaŋndo le bɔŋaŋ naŋ bii le kɔlaŋ o wali pollo niŋndo tosaa, ŋ nɔ miŋ chua ndu mɛɛ naŋ chua bɔŋaŋnda tɔlaŋ yɛ. Mɛɛ teleŋndo cho niŋ wa o biŋgi le bɔŋaŋ naŋ bii le kɔlaŋ o wali pollo niŋndo yɛ, o bɛnda miŋ bɛɛndiaŋ nyɛkɛndɛi le mi bɔŋaŋndo yeela nduyɛ miŋ chii ndu a teleŋndo. Bɛɛndiaŋndo nyɛkɛndɛi cho vɛlɛ ni, ŋ nɔ miŋ keleŋa sina tanda naŋ cho kɔlaŋndo.

7. Sɔɔŋ yɛɛ wana cho bɔŋaŋ naŋ bii le kɔlaŋ o wali pollo niŋndo tosaa wo nɔ yɛ mbo yaasiaa ŋtiŋ?

⁷ Nyɛ Ŋ nɔ le Yaasiaa Wo. Tanda kɛ kɛ nɔ bahawɛila ndɔlaŋ. Le hei, buɛi cho sakpo nduyɛ mbo nɔ kɔlkaloo wo ke wɔ naa nyɛ naŋ nɔ miŋ tosa le bɔŋaŋ kɛ kɛ naŋ bii le kɔlaŋ o wali pollo niŋndo le. Kɔfoo hoo, “Teleŋ Naŋ cho Wa Bɔŋaŋ Naŋ Bii le Kɔlaŋ o Wali Pollo Niŋndo Tosaa Wo, A Yaasiaa lePum” chɔm naa sɔɔŋ naŋ nɔ le yaasiaa woŋ ŋtiŋ. O kpeekpei niŋ, bɔŋaŋndo hoo nɔ mbo biinuŋ o nɛi labali niŋ. Teleŋndaŋ lapum, a tosa tuula waŋnda bɛɛndiaa nyɛkɛndɛiyo ɔɔ a chɔm viduei cho a wali pollo okɔɔ mbo wa jw.org wo. Te wana nɔ le bɔŋaŋ naŋ bii le kɔlaŋ o wali pollo niŋndo wa pɛ bɛɛndiaŋndo le mbo kɔ tosa bɔŋaŋndo, o nɔ mbo yiyaŋ a nyɛ dɛɛniaa wanaa cho kɔlaŋ o wali pollo niŋnda vɛlɛ a mɛɛ o bɛɛndiaa nda le paale leŋ yɛ.

8. O Ndaamalaŋ choo a Kuɛɛndulaŋ, yɛɛ sɔvɛ naŋ nɔ yɛ miŋ suukaŋ choo te ŋ wa pɛ bɔŋaŋnda naŋ bii le kɔlaŋ o wali pollo niŋndo tosaa?

⁸ Le tamaseliiyo, o Ndaamalaŋ choo, Bandu Mɛŋgɛlaa a “Tiondoo!” wanaa dimiaa yooŋgu kɛndiaa bɔɔbɔɔ yɔŋgu o wali pollo niŋ ni. Wanaa bɔɔbɔɔ kua o wali pollo niŋ o Ndaamalaŋ choo wa sɔla fondaŋ le kɔlaŋ o wali pollo niŋ o lɔɔ tɛɛŋ te. Le hei, o wa ikala le ma loonuŋ nyɛ nda pɛɛku a boondii pɛɛku nda leyuŋgoo wo le ndu kɔlaŋ dimioo o wali pollo niŋ. Le sabu koŋ, o wa suɛi tɔnɔ le mi wana cho bɔŋaŋ naŋ bii le kɔlaŋ o wali pollo niŋndo tosaa wo kei sondoo o pɛllo o pilɛ choo o nyɛ ŋ nɔ le tosaa wo, o Yau Wali Naa leMasaa niŋ. A suaa vɛlɛ a sɔɔŋ cheleŋ yɔŋnɔŋ o tanda nyaa niŋndoŋ ɔɔ palɛi waŋnda biilu ve le nda Bandu Mɛŋgɛlaa a “Tiondoo!” kioo. Te koŋ te, te waŋndo bii yaula naalaŋ pɛ, chɔm mɛɛ naŋ kila ŋgemelaa le miiŋgu makɔɔ tosaa yɛ. Te wanaa hiŋ o bɔŋaŋ naŋ bii le kɔlaŋ o wali pollo niŋndo apum soliŋ niŋ pɛ kpeku a yaula naŋ cho yɔŋgoo o wali pollo niŋndo, wana cho bɔŋaŋndo tosaa wo nyuna nda ma chɔm mɛɛ nda bii niŋ ndaŋ yɔŋgoo yɛ ɔɔ sɔɔŋ yɔŋnaŋ kɛndɛŋ nda sɔla woŋ. O Kuɛɛndulaŋ choo, wana cho bɔŋaŋndo hoo tosaa wo tosa nyɛ pilɛ koŋ kpe le yuala naŋ nɔ le yɔŋgoo o paŋgei niŋnde. Ŋ ke waŋnda yuala naŋ pɛɛku waŋnda Baabuiyo laŋ lepaa o lepaa o wali pollo niŋ mɛɛ Yooŋgu Kɛndɛ Chɛŋ O Mɛlɛka Lo Wo! cho naa yɛ, Yaŋ Mɛlɛka Nilaŋ vɛlɛ a Yɛɛ Kpeekpei Baabuiyo Pɛɛku Yɛ? Lelaŋ, o bɛnda mi wana cho bɔŋaŋndo tosaa wo yaasiaa chobe mɛɛ yaulaŋ ndaŋ o pilɛ nɔ le yɔŋgɔŋndo yɛ.

9. Te yau naŋ cho piɔuwo chieeŋndo balɔɔ silɔ wo naŋ cho yɔŋgoo o lɔɔ mɛɛlulaŋ ni, yɛɛ naŋ nɔ yɛ miŋ suukaŋ choo?

⁹ Te yau naŋ cho piɔuwo chieeŋndo balɔɔ silɔ wo kundaa nɔ le yɔŋgoo o lɔɔ mɛɛlulaŋ ni, wana cho wa bɔŋaŋndo tosaa wo yaasiaa mɛɛ naŋ nɔ le yau koŋ yɔŋgoo ɔɔ yau pɔmbɔ cheleŋ a Bandu Mɛŋgɛlaa a “Tiondoo!” latulu yɛ. Te koŋ te, o chɔm nyɛ naŋ tosa wo te waŋndo chɔm pɛ yeemɛi. Nyɛ cheleŋ o tosa vɛlɛ wo cho ni, o nyuna le sɔɔŋ yɔŋnaŋ kɛndɛŋ tosaŋ o wali pollo niŋ teleŋ naŋ wa yauwo piɔuwo chieeŋndo balɔɔ silɔ wo.

10, 11. Le bɔŋaŋ naŋ bii le kɔlaŋ o wali pollo niŋndo tueiyɔɔ yeela, le yɛɛ o bɛnda yɛ mi wanaa dimiaa yooŋgu kɛndiaa bɛɛndiaŋ nyɛkɛndɛi?

¹⁰ Wanaa Dimiaa Yooŋgu Kɛndiaa bɛɛ nɔ ma Bɛɛndiaŋ. Wanaa dimiaa yooŋgu kɛndiaa bɛɛ tosa mi bɔŋaŋ naŋ bii le kɔlaŋ o wali pollo niŋndo yeela tau. Te ŋ keleŋa pɛ bɛɛndiaŋ le wali pollo, ŋ nɔla miŋ chɔm wanaa dimiaa yooŋgu kɛndiaa cheleŋ sɔɔŋ kɛndɛŋ naŋ pɛɛku woŋ. Ŋ tosa hei a teleŋ pɛɛku naa leyuŋgoo. Bɛɛndiaŋndo nyɛkɛndɛi le wali pollo cho vɛlɛ ni, a nɔ ma chua Bandu Mɛŋgɛlaa a “Tiondoo!” a yaula cheleŋndaŋ tuupa ma kuɛ le bɔŋaŋ naŋ bii le kɔlaŋ o wali pollo niŋndo. Te bɔŋaŋndo chuu dɔɔ pɛ, ŋ tosa lɛ tamala le kɔlaŋ o tandaa niŋ te.

¹¹ O bɛnda vɛlɛ miŋ keleŋa fuuluu o fondaŋ bɔŋaŋndo cho biinɔŋ le kɔlaŋ o wali pollo niŋndo tuupa mi teleŋndo fuuluu. Miŋ kindiŋ le hunɔɔ o bɔŋaŋnda naalaŋ kpou a teleŋndo. Kɛ te o yɔŋ pɛ mi bɔŋaŋndo kanduŋ tuupa miŋ fuuluu, ŋ cho chaaŋaa cho niŋ wa loŋnda paaliaŋ. Vɛɛ naŋ paaliaŋ yɛ nda? Puaapilɛnɔ cho bɔŋaŋndo tosaa wo nɔ mbo kɛsiŋ fɛŋ sɔɔŋ pum o kɔl tuupa mbo piɔu waŋnda. Muŋ cho ni, te wanaa hiŋ o bɔŋaŋndo wa ve a bɔɔ le, o tosa kɛɛsiaa ma kɔ dimi yooŋgu kɛndɔɔ o tanda nda kandu kɛ a chii le wo. Te a ŋpelu apum hiŋ o fondaŋ naŋ cho bɔŋaŋndo biyɔɔ wo ni, nduyɛ mi tiŋndo bandu le kɔlaŋ o tanda nda cho kɔlaŋ yooŋgu kɛndɔɔ dimioo wo, o piɔu nda a wanaa nɔ nyɛm nyaanaŋndoŋnda. Te o wa tanda sɔɔŋ wɔɔŋndoŋ hiu yɔŋnɔŋndo woŋ pɛ, mɛɛ o piɔu puaapiliaa a ndepiliaa le yooŋgu kɛndɔɔ dimioo loŋ ma waŋ naŋ kpɛɛlaŋ. O yɔŋgu wanaa dimiaa yooŋgu kɛndiaa nɔ kɛndiaa sɔvɛ le wa ma kuɛ o fondaŋ dɛŋgbɔɔ cho wo ɔɔ chiɛila nɔ helɔɔ bɛndu le laŋ. O piɔu wanaa chaa yooŋgu kɛndɔɔ dimioo nyɛkɛndɛiya a wanaa laŋga kandu sɛnɛiya. Kɛ te wanaa dimiaa yooŋgu kɛndiaa komal niŋ pɛ ma chii waŋnda piɔu, mɛɛ kɛɛsiaa koŋ cho vɛlɛ siŋgaŋ le mi wanaa mɛɛlu hunɔɔ wa sɔla wanaa nda kua o wali pollo niŋnda. Tonya icho ni maa lepum, mi isɔɔ yɔŋnuŋ ŋ keleŋa fuuluu o bɔŋaŋndo le. Kɛ te ŋ siiŋgu ndu pɛ maa kaa naa le mɛɛloo hunɔɔ, mɛɛ o bɛnda miŋ nyunaŋ naapila aa, baa balika melaa naŋ cho kiɔɔ chɔmndo le bɔŋaŋnda naŋ bii le kɔlaŋ o wali pollo niŋndo ni, ɔɔ walta naalaŋ naŋ kɛɛ le tosaa a teleŋndo ni?

12. Te o yɔŋ pɛ aa numpila tosa kɛɛsiaa lɔɔlɔɔ le wana nya kua o wali pollo niŋndo ni, yɛɛ ŋ nɔ yɛ ma kɛsiŋ o kɔl?

¹² Tuupa mi teleŋndo fuuluu le bɔŋaŋ naŋ bii le kɔlaŋ o wali pollo niŋndo, wanaa dimiaa yooŋgu kɛndiaa kɛɛsiaa le wana nda cho la kɔ o wali pollo niŋndo te a yeema pɛ ɔɔ a chum ma ke nda wana nda cho la kɔ wo. Kɛ te numpila tosa kɛɛsiaa lɔɔlɔɔ ni le wana nya kua o wali pollo niŋndo, a yiyaŋ maa o ve o bɛndaa ma tosa chaŋyɛi a wanaa cheleŋnda le? O wa ko kɔlaŋ a chaaŋaa numaa piliaa lɔɔlɔɔ le. (Kɔl. Diiŋ Ndɔɔ 6:11-13, ftn.) Baa o bɛnda ma tosa kɛɛsiaa teleŋndaŋ lapum le kɔlaŋ o wali pollo niŋ nya wana laŋga kandu yooŋgu kɛndɔɔ dimioo wo le ndu malaa mbo tosa hiuowɔɔ lachioo a mɛɛ o pɛɛku yɛ le? (Kɔl. Tasoo 10:24; Tim. Tasoo 4:13, 15) Silala kɛ kɛ nda ke num pɛ nduyɛ ma chɔm num naa ŋ nɔ le kandɔɔ yooŋgu kɛndɔɔ dimioo wa, yaŋ nilaŋ nyɛkɛndɛi. Te bɔŋaŋndo chuu dɔɔ pɛ, la keleŋa la kɔ o tanda nya cho laŋ niŋndo nduyɛ la faŋaŋ kɛɛsiaala tosaŋndaŋ siŋgaa kɔɔli.

13. Te wana o wana huŋ o bɔŋaŋnda naŋ bii le kɔlaŋ o wali pollo niŋndo kɛsiŋ pɛ o kɔl nyɛ o nɔ le tosaa wo, tɔnɔ yɛɛ bɔŋaŋndaŋ la chuu yɛ naa?

¹³ Mɛɛ buɛiyaa 70 Chiisu chuuŋgiaa naapilɛ mbo viam nda yooŋgu kɛndɔɔ dimioo wa kɔ chii, ma miiŋgu a nyaaloo naa ndu cha. (Luku 10:17) Tonya icho ni maa bɔŋaŋ Chiisu bii a buɛiyaa nduaa tuupa ma kandu yooŋgu kɛndɔɔ dimioo wo mala nda ni ma sɔla fulamakɔɔli kɛndɔɔ. Hau bɛɛ, tɔnɔ pilɛ koŋ kpe bɔŋaŋnda naŋ bii tuupa miŋ kuɛ o wali pollo niŋndo chuu naa ni. Te wana o wana huŋ o bɔŋaŋnda naŋ bii le kɔlaŋ o wali pollo niŋndo kɛsiŋ pɛ o kɔl nyɛ o nɔ le tosaa wo, mɛɛ bɔŋaŋndaŋ ndaŋ la dɛɛniaa naa, la bɛɛndiaa naa, nduyɛ mi la kɔɔna naa nyɛkɛndɛi le yooŋgu kɛndɔɔ dimioo “mi waŋnda kpou a tuei”.—Mat. 24:14.